21 Jan 2024, 07:00
މިދިޔަ ޑިސެމްބަރު މަހުގެ 22 ވަނަ ދުވަހު ސިނަމާތަކުގައި އެޅުވި ފިލްމު "ސަލާރު: ޕާޓް1-ސީޒްފަޔަ" ނެޓްފްލިކްސްގައި ސްޓްރީމް ކުރަން ފަށައިފިއެވެ.
ފިލްމު "ސަލާރު" އިއްޔެ ނެޓްފްލިކްސްގައި ސްޓްރީމް ކުރަން ފަށާފައިވާއިރު މީގެ ކުރިން މި ފިލްމު ނެޓްފްލިކްސްގައި ރިލީޒްކުރަން ނިންމާފައި ވަނީ މި މަހުގެ 22 ވަނަ ދުވަހުއެވެ.
ފިލްމު "ބާހޫ ބަލީ"އިން ގިނަ ބައެއްގެ މަގުބޫލުކަން ހޯދި ތެލުގޫ އެކްޓަރު ޕްރަބާސް ލީޑު ރޯލު ކުޅެފައިވާ ފިލްމު "ސަލާރު"އަކީ ބޮކްސް އޮފީހުގައި ބޮޑު ކާމިޔާބީއެއް ހޯދި "ކޭޖީއެފް"ގެ ޑައިރެކްޓަރު ޕްރަޝާންތު ނީލްގެ އުފެއްދުމެކެވެ. ފިލްމު "ސަލާރު"އަށް "ކޭޖީއެފް"ގެ ރެކޯޑް މުގުރާލެވޭނެ ކަމަށް ގިނަ ބަޔަކު ބުނަމުން އައި ނަމަވެސް މި ފިލްމަށް އެކަން ކާމިޔާބެއް ނުކުރެވުނެވެ.
ނަމަވެސް 270 ކްރޯރް ރުޕީސްއިން އުފެއްދި ފިލްމުގެ ޚަރަދު ފޫބެއްދޭ ވަރަށް ތިއޭޓަރު ތަކުން ފިލްމަށް ވަނީ އާމްދަނީ ލިބިފައެވެ. ސިނަމާތަކުގައި ފިލްމު ރިލީޒް ކުރުމުގެ ކުރިން ސްޓްރީމިން ޕްލެޓްފޯމްތަކަށް ސެޓެލައިޓް ރައިޓްސް ވިއްކައިގެން މި ފިލްމަށް ވަނީ 350 ކްރޯރް ރުޕީސް ލިބިފައެވެ. އެއީ 44 މިލިއަން އެމެރިކާ ޑޮލަރެވެ.
ޕްރަބާސް ޑައިރެކްޓަރު ޕްރަޝާންތު ނީލްއާ އެކު-- ފޮޓޯ/އިންޓަނެޓް
ތެލުގޫ އެކްޓަރު ޕްރަބާސްގެ ވަރަށް ވަރުގަދަ އެކްޝަން މަންޒަރުތައް ފެންނަ މި ފިލްމަކީ، ތާރީހީ ރަސްކަމެއްގެ ތަހުތު ހާސިލުކުރުމަށް ބަޔަކު ހިންގާ ހީލަތްތެރި ސިޔާސީ ރޭވުންތަކެއް ދައްކުވައިދޭ ފިލްމެކެވެ.
ޕްރަބާސްގެ އިތުރުން ފިލްމުގެ މުހިއްމު ރޯލުތައް ކުޅެފައިވާ ތެލުގޫ ތަރިންގެ ތެރޭ އެކްޓަރު ޕްރިތްވީރާޖް ސުކުމަރަން އަދި ބަތަލާ ޝްރޫތީ ހާސަން ހިމެނެއެވެ. މި ފިލްމުގެ ދެވަނަ ބައެއް އުފައްދާނެކަން އިއުލާނުކޮށްފައިވާއިރު ފިލްމުގެ ސީކުއަލް ބެލުންތެރިންނާ ހަމައަށް ގެނެސްދޭން ނިންމާފައި ވަނީ އަންނަ އަހަރުގެ މެދުތެރޭގައެވެ.