20 Jan 2024, 23:40
ސަދަގާތުގެ ފައިސާ ބޭރު ގައުމުތަކަށް ޚަރަދުކުރާއިރު، ރާއްޖޭގެ އެތެރޭގެ ޙާލަތަށް ރިއާޔަތްކުރުމަކީ މުހިންމު ކަމެއް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިރޭ ވިދާޅުވެއްޖެވެ.
މިނިސްޓަރު ފޭސްބުކްގައި ކުރެއްވި ޕޯސްޓެއްގައި ވިދާޅުވީ، ރާއްޖޭގައި އެހީތެރިކަމަށް ބޭނުންޖެހިފައިވާ ގުރުއާން ކްލާސްތަކާއި މިސްކިތްތަކާއި އެދުރުގެތައް ގިނަ އަދަދަކަށް ހުރި ކަމަށެވެ. އެ ތަންތަނަށް ގޮނޑިއާއި އެނޫންވެސް ވަސީލަތްތަކުގެ ބޭނުން ޖެހިފައިވާ ކަމަށް އޭނާ ވިދާޅުވިއެވެ.
ރާއްޖޭގެ ވަރަށް ގިނަ ބަޔަކު އެމީހުންގެ ސަދަގާތުގެ ފައިސާ ބޭރަށް ޚަރަދު ކުރާކަން ފާހަގަކުރައްވައި ޝަހީމް ވިދާޅުވީ، އެއީ ވެސް ރަނގަޅުކަންކަން ކަމަށާއި، އެހެން ނަމަވެސް ސަދަގާތް ކުރުމުގައި ރާއްޖޭގެ އެތެރޭގެ ޙާލަތަށް ވެސް ރިއާޔަތްކުރަން ޖެހޭ ކަމަށެވެ. އެގޮތުން އިންސާނީ ޚާއްޞަ ހާލަތެއް މެދުވެރިވެފައިވާ ބޭރުގެ ފަރާތްތައް އިސްތިސްނާވެގެންވާ ގޮތުގައި، ރާއްޖޭގެ ރައްޔިތުން ސަދަގާތް ޚައިރާތާއި ހެޔޮކަންކަމަށް ކުރާ ޚަރަދު ރާއްޖޭގެ އެތެރެއަށް ކުރުން ވަރަށް މުހިންމު ކަމަށް ޝަހީމް ވިދާޅުވިއެވެ.
ރާއްޖޭގައި ހުރި ކުޑަކުދިންގެ ހިޔާއާއި ޚާއްޞަ އެހީއަށް ބޭނުންވާ މީހުން ތިބޭ މަރުކަޒުތަކަަށް ނުހަނު އެހީތެރިކަން ބޭނުންވާ ކަމަށާއި، ސަދަގާތުގެ ފައިސާ ނަގާ އަމިއްލަ ޖަމިއްޔާތަކުން ވެސް ރާއްޖޭގެ އެތެރޭގެ ކަންކަމަށް ޚަރަދުކުރުން މުހިންމުކަމުގައި ޝަހީމް ވިދާޅުވިއެވެ.
އޭނާ ވިދާޅުވީ، ކުރިއަށް އޮތްތަނުގައި މިނިސްޓްރީގެ ޗެރިޓީ ފަންޑު ފުޅާކޮށް ފަސޭހައިން ސަދަގާތް ކުރެވޭނެ ނިޒާމެއް ގާއިމު ކުރާނެ ކަމަށެވެ.
ފަލަސްތީނާއި، ސީރިއާއާއި ޔަމަނުގެ ރައްޔިތުންނަށް އެހީވުމަށް ގިނަ އަދަދެއްގެ ދިވެހިން ފައިސާ ހަދިޔާކުރެއެވެ.