20 Jan 2024, 18:21
ދޯނީގެ ބުރަފަތީގައި ފައިޖެހި ޑައިވިންއަށް ގޮސް އުޅުނު ފަތުރުވެރިއެއްގެ ފައި މިއަދު ބުރިވެއްޖެއެވެ.
މިކަމާ ގުޅިގެން ފުލުހުން ބުނީ މި ހާދިސާ ހިނގާފައި ވަނީ، ހުޅުމާލެއާ ދިމާ ބޭރުގައި އޮންނަ ޑައިވިން ޕޮއިންޓަށް ޑައިވިންއަށް ގޮސް މައްޗަށް އެރި ވަގުތު ދޯނީގެ ބުރަފަތީގައި ޖެހިގެން ކަމަށެވެ.
މި ހާދިސާގައި އަނިޔާވެފައި ވަނީ އުމުރުން 63 އަހަރުގެ އެމެރިކާ އަންހެނަކަށެވެ. އޭނާގެ ފައި ވަނީ ކަކުޅުހުޅުން ތިރި އެއްކޮށް ބުރިވެފައި ކަމަށް ފުލުހުން ބުންޏެވެ. މިވަގުތު އޭނާއަށް ފަރުވާދެމުންދަނީ ޓްރީޓޮޕް ހޮސްޕިޓަލުގައެވެ.
ފުލުހުން ބުނި ގޮތުގައި މި ހާދިސާ ފުލުހަށް ރިޕޯޓުކޮށްފައި ވަނީ، މިއަދު ހެނދުނު 08:30 ހާއިރެވެ. އަދި މި ހާދިސާ ފުލުހުން ދަނީ ތަހުގީގު ކުރަމުންނެވެ.
ޑައިވް ކުރުމުގެ ތެރެއިން މިފަދަ ހާދިސާތައް މަދުން ނަމަވެސް ރާއްޖޭގައި މީގެކުރިން ހިނގާފައި އެބަހުއްޓެވެ.