21 Jan 2024, 07:04
މިހާރު އޮލިމްޕަހުގައި ދައްކަމުން އަންނަ ރޮމްކޮމް ފިލްމު "މިއީ އިޝްގު"ގެ ވަދާއީ ޝޯ ދެއްކުމަށް ތައްޔާރު ވެއްޖެއެވެ.
ޝަރަފް އަބްދުﷲ އާއި އައިމިނަތު ރަޝްފާ (އާޝާ) ލީޑުން ފެންނަ މި ފިލްމު ވަނީ މި މަހުގެ ހަވަނަ ދުވަހުގައި އޮލިމްޕަހުގައި ޕްރިމިއާކޮށް ދައްކަން ފަށާފައެވެ.
ކާމިޔާބު ގިނަ ޝޯތަކަކަށް ފަހު މިހާރު ފިލްމުގެ ވަދާއީ ޝޯތައް ދެއްކުމަށް ވަނީ ހަމަޖެހިފައެވެ. ޕްރޮޑަކްޝަނުން ހާމަކޮށްފައިވާ ގޮތުގައި މި ފިލްމުގެ އެންމެ ފަހު ޝޯ އަންގާރަ ދުވަހު އަޅުވާނެއެވެ.
އަޒްހާން އިބްރާހީމް ޑައިރެކްޓު ކުރާ މި ލޯބީގެ ފިލްމު ގެ ފަހު ޝޯ އަށް އަދިވެސް ހުސް ޖާގަ ހުރި ކަމަށް ޕްރޮޑަކްޝަނުން ބުނެއެވެ. އޮލިމްޕަސް ކައުންޓަރުން ޓިކެޓު ވިއްކަމުންދާއިރު ޓިކެޓު ބުކް ކުރުމަށްޓަކައި ގުޅާނީ 9633326 އަށެވެ.
މި ފިލްމަކީ އާޝާއާއި ޝަރަފު އެކީގައި މަސައްކަތް ކުރާ ތިންވަނަ ޕްރޮޖެކްޓެވެ. އަދި، ޖޯޑެއްގެ ގޮތުގައި ދެ މީހުން ފެނިގެންދާ މިއީ ދެވަނަ ފަހަރެވެ. މީގެ ކުރީން އުފައްދާފައިވާ ވެބް ސީރީޒެއް ކަމަށްވާ "ހިނދުކޮޅެއް"ގައި ވެސް ދެ މީހުން ވަނީ ޖޯޑެއްގެ ގޮތުގައި ފެނިގެން ގޮސްފައެވެ.
މިއީ އަޒްހާން ޑައިރެކްޓު ކުރާ ފުރަތަމަ ފިލްމެވެ.
އަޒްހާން ބުނާ ގޮތުގައި މި ފިލްމަކީ އާއިލާ އެކު ގޮސް އެންމެންނަށް ވެސް ބަލައިލެވޭނެ ފިލްމެކެވެ. އަދި ދިވެހި އޯޑިއެންސްއާ ގުޅޭ ތީމުތައް މި ފިލްމުން ފެންނާނެ ކަމަށް ވެސް އޭނާ ބުނެއެވެ.
މިއީ އިޝްގުގެ ފަހު ޝޯ ދެއްކުމަށް ތައްޔާރުވަމުން ދާއިރު މި އަހަރަކީ އޮލިމްޕަހަށް ބިޒީ ވާނެ އަހަރެކެވެ. އެގޮތުން ޖެނުއަރީ ފެށުނީ އޮލިމްޕަހުގައި ވަރުގަދަ ފިލްމަކާއެކުގައެވެ. އަދި، އަންނަ މަހުގެ ފުރަތަމަ ދުވަހުން ފެށިގެން އައިފިލްމްސްގެ "ކަންބަޅި" ދައްކަން ފަށާނެއެވެ. މައުލޫމާތު ލިބޭ ގޮތުގައި ޑާކްރެއިން އެންޓަޓެއިންމެންޓުން ވެސް މި އަހަރު މަދުވެގެން ދެ ފިލްމު އޮލިމްޕަހުގައި އެޅުވުމަށް ވަނީ ހަމަޖެހިފައެވެ. ހަމައެއާ އެކު މުހައްމަދު ނިޔާޒު (ޓެޑްރީ)ގެ އާ ފިލްމު "ލަސްވިޔަސް" ވެސް މި އަހަރު އޭޕްރިލް މަހުގައި ދެއްކުމަށް އަންނަނީ ތައްޔާރުވަމުންނެވެ.