20 Jan 2024, 16:03
ކުރިއަށް އޮތް ރައްޔިތުންގެ މަޖިލީހުގެ އިންތިޙާބުގައި ވޯޓު ދިނުމުގެ ހައްޤު ލިބިފައިވާ މީހުންގެ ލިސްޓަށް، އިއްޔެގެ ނިޔަލަށް 325 ޝަކުވާ ލިބިފައިވާ ކަމަށް, އިލެކްޝަންސް ކޮމިޝަން (އީސީ) އިން ހާމަކޮށްފިއެވެ.
އީސީގެ ނައިބު ރައީސް އަދި ސްޕޯކްސްޕާސަން އިސްމާއިލް ހަބީބް މިއަދު އެކްސް ގައި ކުރެއްވި ޕޯސްޓެއްގައި ވަނީ ލިބުނު ޝަކުވާތަކުގެ ތަފުސީލް ހިއްސާ ކުރައްވައިފައެވެ.
ވޯޓުލުމުގެ ހައްޤު ލިބިގެންވާ މީހުންގެ އެޑްރެސް ބަދަލުވެގެން 185 ޝަކުވާ ލިބިފައިވާއިރު، މަރުވެފައި ތިބި މީހުންގެ ނަން ލިސްޓުގައި ހިމެނިގެން 131 ޝަކުވާ ލިބިފައިވެއެވެ.
އަދި، ވޯޓު ދިނުމަށް ކަނޑައެޅިފައިވާ އިންތިޚާބީ ދާއިރާ ބަދަލުވެގެން ހަތަރު ޝަކުވާ ހުށަޙަޅައިފައިވެއެވެ.
މި މަހުގެ 10ވަނަ ދުވަހު އީސީން ޢާންމުކޮށްއިވާ ރައްޔިތުންގެ މަޖިލީހުގެ އިންތިޚާބު ގައި ވޯޓުދިނުމުގެ ހައްޤު ލިބިފައިވާ މީހުންގެ ރަޖިސްޓަރީއާ ގުޅޭ ޝަކުވާ ބަލައިގަތުމުގެ ސުންގަޑިއަކީ މާދަމާގެ މެންދުރުފަހު، 15:00 އެވެ.
މަޖިލީހުގެ އިންތިޚާބު އަންނަ މާޗު މަހުގެ 17ގައި ބޭއްވުމަށް އީސީން ވަނީ ނިންމައިފައެވެ.
އެ އިންތިޚާބުގައި ވޯޓުލުމުގެ ހައްގު ލިބިފައިވާ މީހުންގެ އަދަދު 284،327 މީހުންނަށް އަރާއިއިރު އޭގެ ތެރޭގައި ހިމެނެނީ 14،5162 ފިރިހެނުންނާއި 139،165 އަންހެނުން ކަމަށް އީސީން ބުންޏެވެ.
އެއީ، ނިމިދިޔަ ރިޔާސި އިންތިޚާބުގެ ދެވަނަ ބުރުގައި ވޯޓުލި މީހުންނަށް ވުރެ 1،523 އިތުރު އަދަދެކެވެ.