20 Jan 2024, 13:50
ގއ. ވިލިނގިލިން ފަރުވާއަށް މާލެ ގެނައުން ލަސްވި ކަމަށް އާއިލާއިން ބުނި ކުއްޖާ، އައިޖީއެމްއެޗްގައި ފަރުވާ ދެނިކޮށް މިއަދު ނިޔާވެއްޖެއެވެ.
އައިޖީއެމްއެޗްއިން މިއަދު ބުނީ މިދިޔަ ބުރާސްފަތި ދުވަހު މާލެ ގެނައި އުމުރުން 13 އަހަރުގެ އެ ކުއްޖާ ނިޔާވެފައިވަނީ މިއަދުގެ 11:10 ގައި ކަމަށެވެ. އިތުރު ތަފުސީލެއް ނުދެއެވެ.
މީގެ ކުރިން އެ ރަށު ކައުންސިލުން ވަނީ، އަވަސް ފަރުވާއަށް މާލެ ގެނެވޭނެ ގޮތެއް ނެތި، އެތައް ގަޑިއިރެއް ހޭދަކުރަން ޖެހުމުގެ ސަބަބުން ވިލިނގިލީ ހޮސްޕިޓަލުގައި ފަރުވާދެމުންދިޔަ 13 އަހަރުގެ އެ ކުއްޖާގެ ހާލު ދަށްވަމުންދާ ކަމަށް ބުނެފައެވެ.
މީގެ ކުރިން އެ ކުއްޖާއަށް ދޭންޖެހޭ ފަރުވާ ނުލިބި ލަސްވެގެން ކަމަށް ބުނެ، އެ ރަށު ރައްޔިތުން އެއްވެ، އެ ރަށު ހޮސްޕިޓަލުގެ ނަން ބޯޑު ބަދަލުކޮށް، ހޮސްޕިޓަލް ކުރިމަތީގައި ވަނީ މުޒާހަރާވެސް ކޮށްފައެވެ.
މިކަމާ ގުޅޭ ގޮތުން ހެލްތު މިނިސްޓްރީގެ ބަހެއް ހޯދުމަށްޓަކައި މަސައްކަތް ކުރިނަމަވެސް އެ މިނިސްޓްރީގެ ބަހެއް އަދި ލިބިފައެއް ނުވެއެވެ.