20 Jan 2024, 16:30
އެންބީއޭ ބާސްކެޓް ބޯޅަ މުބާރާތުގައި އެންމެ ފަހުގެ ޗެމްޕިއަން ޑެންވާ ނަގެޓްސް އާއި މި ސީޒަންގައި އެންމެ ރަނގަޅު ކުޅުމެއް ދައްކަމުން ދާ ބޮސްޓަން ސެލްޓިކްސް ބައްދަލުކުރި މެޗު ނަގެޓްސް ކާމިޔާބު ކޮށްފިއެވެ.
ބޮސްޓަންގެ ޓީޑީ ގާޑެންގައި ކުޅުނު މި މެޗު ނަގެޓްސްއިން ކާމިޔާބު ކޮށްފައިވަނީ 102 ޕޮއިންޓް 100 ޕޮއިންޓުންނެވެ. މި މެޗުގައި ދެ ޓީމުގެ ފަރާތުން ވަނީ ވަރަށް ވާދަވެރި އަދި ފޯރިގަދަ ކުޅުމެއް ފެނިގެން ގޮސްފައެވެ.
މި މެޗުގެ ހަތަރު ކުއާޓާގެ ކުޅުންވެސް ދިޔައީ ވަރަށް ހަމަހަމަ ކޮށެެވެ. މި މެޗުގައި ނަގެޓްސްއަށް އެންމެ ރަނގަޅު ކުޅުމެއް ދެއްކީ 34 ޕޮއިންޓް ހޯދައިދީ 12 ރީބައުންޑް ނަގައިދީ ނުވަ އެސިސްޓް ދިން ނިކޮލާ ޔޮކިޗްއެވެ. އަދި ސެލްޓިކްސްއަށް އެންމެ ރަނގަޅު ކުޅުމެއް ދެއްކީ 22 ޕޮއިންޓް ހޯދައިދީ އަށް ރީބައުންޑް ނަގައިދީ ފަސް އެސިސްޓް ދިން ޖޭސަން ޓެޓުމްއެވެ.
މި މުބާރާތުގައި ފިލަޑެލްފިއާ ސެވަންޓީ ސިކްސާސް އާއި އޯލާންޑޯ މެޖިކް ބައްދަލުކުރި މެޗު 124 ޕޮއިންޓް 109 ޕޮއިންޓުން ކާމިޔާބު ކުރީ ސެވަންޓީ ސިކްސާސްއެވެ. މި މެޗުގައި ސިކްސާސްގެ ޖޮއެލް އެމްބިޑްވަނީ 36 ޕޮއިންޓް ހޯދައިދީ ހަތް ރީބައުންޑް ނަގައިދީ ދެ އެސިސްޓް ކޮށްފައެވެ. އަދި މެޖިކްއަށް އެންމެ ރަނގަޅު ކުޅުމެއް ދެއްކީ 25 ޕޮއިންޓް ހޯދައިދީ 11 ރީބައުންޑް ނަގައިދިން ވެންޑެލް ކާޓާ ޖޫނިއާއެވެ.
މީގެ އިތުރުން ފީނިކްސް ސަންސް އާއި ނިއުއޯލިއަންސް ޕެލިކަންސް ބައްދަލުކުރި މެޗު 123 ޕޮއިންޓް 109 ޕޮއިންޓުން ކާމިޔާބު ކުރީ ސަންސްއެވެ. މި މެޗުގައި ސަންސްގެ ޑެވިން ބޫކާވަނީ 52 ޕޮއިންޓް ހޯދައިދީ ހަތަރު ރީބައުންޑް ނަގައިދީ ފަސް އެސިސްޓް ދީފައެވެ. އަދި ޕެލިކަންސްއަށް އެންމެ ރަނގަޅު ކުޅުމެއް ދެއްކީ 17 ޕޮއިންޓް ހޯދައިދީ ހަތް ރީބައުންޑް ނަގައިދީ 11 އެސިސްޓް ދިން ބްރެންޑަން އިންގްރާމްއެވެ.
މި މުބާރާތުގައި ކުޅުނު އެހެން މެޗުތަކަށް ބަލާލާއިރު އެޓްލާންޓާ ހޯކްސް އާއި މައޭމީ ހީޓް ބައްދަލުކުރި މެޗު އެންމެ ޕޮއިންޓެއްގެ ތަފާތުން 109 ޕޮއިންޓް 108 ޕޮއިންޓުން ހޯކްސް ކާމިޔާބު ކުރިއިރު ޗާލޮޓް ހޯނެޓްސް އާއި ސެން އެންޓޯނިއޯ ސްޕާސް ބައްދަލުކުރި މެޗު 124 ޕޮއިންޓް 120 ޕޮއިންޓުން ކާމިޔާބު ކުރީ ހޯނެޓްސްއެވެ.
މީގެ އިތުރުން ގޯލްޑަން ސްޓޭޓް ވޮރިއާސްގެ އެސިސްޓަންޓް ކޯޗް ޑެޔާން މިލޮޔެވިޗް މަރުވުމާ ގުޅިގެން ޑެލަސް މެވްރިކްސްއާ އެކު ރޭ ކުޅުމަށް ހަމަޖެހިފައިވާ މެޗު ވަނީ ފަސް ކޮށްފައެވެ.
މައުލޫމާތު ލިބިފައިވާގޮތުގައި އޭނާ މަރުވެފައިވަނީ މިދިޔަ އަންގާރަ ދުވަހު ސޯލްޓް ލޭކް ސިޓީގައި ޓީމާއެކު ރޭގަނޑު ކާން އިންދާ ހާޓަޓޭކެއް ޖެހިގެން ހޮސްޕިޓަލަށް ގެންގޮސް ފަރުވާދެމުން ދަނިކޮށެެވެ. އެ ހާދިސާ އާ ގުޅިގެން ޔޫޓާ ޖޭޒް އާ ބުދަ ދުވަހު ކުޅެން އޮތް މެޗު ވެސް ވަނީ ފަސްކުރެވިފައެވެ. އެން.ބީ.އޭ. އިން ހާމަކުރިގޮތުގައި މި މެޗުތައް އަލުން ކުޅެވޭނެ ދުވަސްތައް ފަހުން ހާމަކުރެވޭނެއެވެ.