20 Jan 2024, 09:50
މިދިޔަ ޑިސެމްބަރު މަހުގެ 29 ވަނަ ދުވަހު ނެޓްފްލިކްސް މެދުވެރިކޮށް ސްޓްރީމް ކުރަންފެށި ފިލްމު "އަންނަޕޫރްނީ:ދަ ގޯޑެސް އޮފް ފުޑް" ނެޓްފްލިކްސްއިން އުނިކުރުމާ ގުޅިގެން ފުރަތަމަ ފަހަރަށް ބަތަލާ ނަޔަންތާރާ ވާހަކަ ދައްކައިފިއެވެ.
ފިލްމުގެ ލީޑް ރޯލް ކުޅެފައިވާ ބަތަލާ ނަޔަންތާރާގެ އަމިއްލަ އިންސްޓްގްރާމް މެދުވެރިކޮށް ނެރުނު ސްޓޭޓްމަންޓެއްގައި ބުނެފައި ވަނީ، އިންޑިއާގެ ސެންސަރު ބޯޑުން ފާސްކޮށް ސިނަމާތަކުގައި ވެސް ދެއްކި ފިލްމެއް ސްޓްރީމިންގް ޕްލެޓްފޯމަކުން އުނިކޮށްފާނެ ކަމަށް އުއްމީދު ނުކުރާ ކަމުގައެވެ.
މިހާތަނަށް ފިލްމީ ދާއިރާގައި ކުރި އެއްވެސް މަސައްކަތަކީ ބަޔަކުގެ އިހުސާސްތަކާ ކުޅެ ދެރައެއް ދިނުމުގެ ނިޔަތުގައި ކުރި މަސައްކަތްތަކެއް ނޫން ކަމަށާއި ފިލްމު "އަންނަޕޫރްނީ"އަކީ ކެއްކުމުގެ ދާއިރާއިން ކުރިޔަށްދާން ބޭނުންވާ ފަރާތްތަކަށް ހިތްވަރުދިނުމުގެ މަޤްސަދުގައި ކުރި މަސައްކަތެއް ކަމަށް ބަތަލާ ވަނީ ބުނެފައެވެ.
ނަޔަންތާރާ ފިލްމުގައި ކުޅުނު ރޯލްގެ ސަބަބުން އެއްވެސް ބަޔަކަށް އޭގެ ނޭދެވޭ އަސަރުކޮށްފައި ވާނަމަ އެކަމަށް މަޢާފުކޮށްދިނުމަށް ވެސް ބަތަލާގެ އިންސްޓަގްރާމް ޕޯސްޓުގައި ވަނީ އެދިފައެވެ. ފާއިތުވެދިޔަ ދެ އަހަރު ދުވަހުގެ ތެރޭ ނަޔަންތާރާ ގިނަ ފިލްމުތަކެއްގައި މަސައްކަތްކުރި ކަމަށާއި މި މުއްދަތުގައި ވެސް މަސައްކަތް ކުރީ ބެލުންތެރިންނަށް ރަނގަޅު މެސެޖެއް ދެވޭނެ ފިލްމުތަކެއް ސިނަމާއަށް ގެނެސްދިނުމަށް ކަމަށް "ޖަވާން"ގެ ބަތަލާ ވަނީ ބުނެފައެވެ.
ސްޓްރީމިންގް ޕްލެޓްފޯމަކުން ފިލްމެއް އުނިކުރުމަކީ ވަރަށް ބޮޑު ހައިރާންކަމަކާ ސިހުމެއް ގެނުވި ކަމެއް ކަމަށާއި ފިލްމު "އަންނަޕޫރްނީ"އަކީ ކެއްކުމުގެ ދާއިރާއިން ކުރިޔަށްދާން ބޭނުންވާ އަންހެނުންނަށް ވަރަށް ރަގަޅު ނިޔަތެއްގައި މެސެޖެއް ފޯރުކޮށްދޭން ބޭނުންވި ފިލްމެއް ކަމަށް ބަތަލާ ވަނީ ބުނެފައެވެ.
ބަތަލާ ނަޔަންތާރާ ފިލްމު "ޖަވާން"ގެ މަންޒަރެއްގައި-- ފޮޓޯ/އިންޓަނެޓް
ފިލްމު "އަންނަޕޫރްނީ"އަކީ، އިންޑިއާގެ ހިންދޫންގެ ފައްޅިއެއްގައި ކައްކާއެއްގެ ގޮތުގައި މަސައްކަތްކުރާ މީހެއްގެ ދަރިއަކު ކެއްކުމުގެ ދާއިރާއިން ކުރިޔަށް ގޮސް ޕްރޮފެޝަނަލް ޝެފަކަށް ވުމަށް ކުރާ ދަތުރު ދައްކުވައިދޭ ފިލްމެކެވެ. މި ފިލްމުން ހިންދޫ ދީނާ ދެކޮޅު ފިކުރުތަށް ފެތުރުމަށް ބާރުއަޅާ ކަމަށާއި އެކަމަށް ހިތްވަރުދޭ ކަމަށް ބުނެ ހިންދޫ ދީނަށް ނިސްބަތްވާ ބަޔަކު ވަނީ ނެޓްފްލިކްސްއިން ފިލްމު ނެގުމަށް ގޮވާލާ ޕެޓިޝަނެއް ހުށަހަޅާފައެވެ.
ފިލްމުގެ ޕްރޮޑަކްޝަން ޓީމާ ވެސް ދެކޮޅަށް ޕެޓިޝަނެއް ހުށަހެޅުމާ ގުޅިގެން މި ފިލްމު ނެޓްފްލިކްސްއިން އުނިކޮށްފައި ވަނީ މި މަހުގެ ތިން ވަނަ ދުވަހުއެވެ.