20 Jan 2024, 13:04
އިންޑިއާ ކަނޑުގައި އޮންނަ އިނގިރޭސިވިލާތާއި އެމެރިކާގެ އަސްކަރީ މަރުކަޒުތައް ގާއިމުކޮށްފައިވާ ޑިއޭގޯ ގާސިޔާ އަކީ ހިޖުރަ ކުރާ މީހުން ދިގު މުއްދަތެއް ވަންދެން ތިބުމަށް އެއްގޮތަކަށްވެސް އެކަށީގެންވާ ތަނެއް ނޫން ކަމަށް، ރެފިއުޖީންނާބެހޭ އދ ގެ އިދާރާ، (ޔޫއެންއެޗްސީއާރް) އިން ބުނެފިއެވެ.
ސްރީ ލަންކާގެ ތަމަޅައިގެން އެތައް ބަޔަކު ޑިއޭގޯގައި ހުންނަ ކޭމްޕްތަކުގައި ތިބޭތާ ދެ އަހަރަށް ވުރެ ގިނަ ދުވަސް ވެއްޖެއެވެ.
އދ ން އެގޮތަށް ބުނެފައި ވަނީ ޔޫއެންއެޗްސީއާރުގެ މަންދޫބުން 2023 ވަނަ އަހަރުގެ ފަހުކޮޅު ޑިއޭގޯ ގާސިޔާއަށް ޒިޔާރަތްކޮށްފައި ވަނިކޮށެވެ. ހިޖުރަ ކޮށްފައިވާ މީހުން ޑިއޭގޯއަށް ދިޔައީއްސުރެ އެ ރަށަށް އެރުމުގެ މަސައްކަތްކުރަމުން އައި އދގެ މަންދޫބުންނަށް ޑިއޭގޯއަށް އެރުމުގެ ހުއްދަ ލިބުނީ އިނގިރޭސިވިލާތުގެ ކަމާބެހޭ ފަރާތްތަކުން މަގުފަހުކޮށްދިނުމުންނެވެ.
"ޑިއޭގޯ ގާސިޔާ އަކީ އާންމުން ދިރިނޫޅޭ އަސްކަރީ މަރުކަޒުތައް ގާއިމުކޮށްފައި އޮންނަ ޖަޒީރާއެއް. އެއީ އެތަނަށް ހިޖުރަކުރާ މީހުން ދިގު މުއްދަތަކަށް ދިރިއުޅެން އެކަށީގެންވާ ތަނެއް ނޫން." އދގެ ތަރުޖަމާނަކާ ހަވާލީ ބީބީސީން ރިޕޯޓުކޮށްފައިވެއެވެ.
އެކަމާ ގުޅިގެން ބައިނަލްއަގުވާމީ ހިމާޔަތް ބޭނުންވާ މީހުންނަށް ގާނޫނުތަކާއެއްގޮތްވާ ގޮތުގެ މަތިން ހިމާޔަތް ހޯދައިދުނުމަށް އދ ން ވަނީ އިނގިރޭސިވިލާތަށް ގޮވައިލައިފައެވެ.
އިނގިރޭސިވިލާތުން ބުނެފައިވާ ގޮތުން އެކަމަށް ދިގު މުއްދަތެއްގެ ހައްލެއް ހޯދުމަށް އެ ގައުމުން އަންނަނީ މަސައްކަތްކުރަމުންނެވެ.
ތަމަޅައިންގެ ފުރަތަމަ ގްރޫޕް ޑިއޭގޯ ގާސިޔާއަށް ހިޖުރަކޮށްފައި ވަނީ 2021 ވަނަ އަހަރުގެ އޮކްޓޯބަރު މަހުއެވެ. އެ މީހުންނަށް އެ ރަށަށް ހިޖުރަކުރަން ޖެހުނީ ކެނެޑާއަށް ދަތުރުކުރަމުން ދިޔަ އެ މީހުންގެ ދޯނީގެ އިންޖީނު ހަލާކުވެގެންނެވެ.
އެ ބޯޓުން ކެނެޑާއަށް ހިޖުރަ ކުރަން އުޅުނީ 2009 ވަނަ އަހަރު ނިމުނު ލަންކާގެ ދާޚިލީ ހަނގުރާމައިގައި ބަލިވި ލަންކާގައި ތިބި ކުރީގެ ތަމަޅަ ޓައިގަރުންނާ ގުޅުން އޮންނަ ކަމަށް ބުނާ ބައެކެވެ. ހަނގުރާމައަށްފަހު ލަންކާއިން ފިލައިގެން ދިއުމަށް އެ މީހުންނަށް މަޖުބޫރުވީއެވެ.
އެ ރަށުގައި ދިރިއުޅުމަކީ އެތައް ވޭނެއް ތަހައްމަލުކުރަންޖެހޭ ކަމެއް ކަމަށް ހިޖުރަކޮށްފައިވާ މީހުން ބުނެއެވެ. ޖިންސީ ފުރައްސާރަ ކުރުމާއި، ބޭސް ފަރުވާ ނުލިބުން ފަދަ އެތައް ކަމަކާ އެ މީހުންނަށް ވަނީ ކުރިމަތިލާން ޖެހިފައެވެ. އޭގެ ސަބަބުން އަމިއްލައަށް މަރުވާން އުޅުމާއި، ބަނޑުހައިހޫނުކަމުގެ ހަޅުތާލު ކުރުން ފަދަ ކަންކަން އެ މީހުން ވަނީ ކޮށްފައެވެ. އެކަން ކަމުން ސަލާމަތްވުމަށް އެ މީހުން ވަނީ ބައިނަލްއަގުވާމީ އެހީތެރިކަމަށް އެދިފައެވެ.