20 Jan 2024, 11:35
ހަނގުރާމައަށްފަހު ފަލަސްތީނުގައި މިނިވަން ދައުލަތެއް ގާއިމުކުރުމާ ދެކޮޅު ކަމަށް އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެއެވެ.
ނަތަންޔާހޫ އެގޮތަށް ވިދާޅުވީ އިސްރާއީލުން ޣައްޒާއަށް ދޭ ހަމަލާތައް މަދުކޮށް ހަނގުރާމަ ނިމުމުން ފަލަސްތީނުގެ ދައުލަތެއް ގާއިމުކުރުމަށް އެމެރިކާއިން ގޮވާލުމުންނެވެ. އޭނާ ވިދާޅުވީ ފަލަސްތީނުގައި މިނިވަން ދައުލަތެއް ގާއިމުކުރުމާ ދެކޮޅުކަން އެމެރިކާއަށް އަންގައިފައިވާނެ ކަމަށެވެ.
އިސްރާއީލު ފައުޖުތަކުން ޣައްޒާއަށް ދެމުންދާ އުދުވާނީ ހަމަލާތަކަށް މާލީ ގޮތުންނާއި އަސްކަރީ ގޮތުންވެސް އެންމެ ބޮޑަށް ވާގިވެރިވާ ގައުމަކީ އެމެރިކާއެވެ.
ޣައްޒާގެ ވެރިކަންކުރާ ހަމާސް ޖަމާއަތާ ދެކޮޅަށް އިސްރާއީލުން ހިންގަމުންދާ ހަނގުރާމަ ހުއްޓައިލާނީ ހަމާސް ނައްތައިލައިފައި ކަމަށްވެސް ނަތަންޔާހޫ ވަނީ ވިދާޅުވެފައެވެ. އަދި އުރުދުންގެ ހުޅަނގު ސަރަހައްދުގައިވާ ހުރިހާ ބިމެއްގެ ސަލާމަތީ ކަންކަން އިޒްރޭލުން ބަލަހައްޓަން ބޭނުންވާ ކަމަށެވެ. ނަތަންޔާހޫ އެ އިޝާރާތް ކުރައްވަނީ ފަލަސްތީނުން މިނިވަން ދައުލަތެއް ގާއިމުކުރަން ބޭނުން ކުރާނެ ބިންތަކެއްގެ ވާހަކަ ކަމަށްވާއިރު، އޭނާ ވަނީ އޭގެ ސަބަބުން ފަލަސްތީނުގެ ސިޔާދަތަށް ފުށޫއަރާނަމަ ކުރާނެ ކަމެއް ނެތް ކަމަށް ވިދާޅުވެފައެވެ.
ނަތަންޔާހޫގެ އެ ވާހަކަތަކާ ގުޅިގެން އެމެރިކާގެ ގައުމީ ސަލާމަތާބެހޭ މުޝީރު، ޖޯން ކާބީ ވިދާޅުވީ "ޓޫ ސްޓޭޓް ސޮލިއުޝަން" ނުވަތަ ފަލަސްތީނާއި، އިސްރާއީލަކީ ވަކި ދެ ދައުލަތެއްގެ ގޮތުގައި ގާއިމު ކުރުމުގެ މަސައްކަތް އެމެރިކާ އިން ހުއްޓާނުލާ ކުރާނެ ކަމަށެވެ.
އޮކްޓޫބަރު ހަތް ވަނަ ދުވަހުން ފެށިގެން އިސްރާއީލު ފައުޖުތަކުން ޣައްޒާއަށް ދެމުންދާ އުދުވާނީ ހަމަލާތަކުގައި މިހާތަނަށް ވަނީ 24000 އަށްވުރެ ގިނަ މީހުން ޝަހީދުކޮށްލައިފައެވެ. އޭގެތެރޭގައި ގިނައީ ކުޑަކުދިންނާއި އަންހެނުންނެވެ.
ހަމަލާތަކުގެ ސަބަބުން 2.3 މިލިއަން މީހުންގެ އާބާދީއެއް އޮންނަ ޣައްޒާގެ 85 އިންސައްތަ މީހުންގެ ގެދޮރު ވަނީ ގެއްލިފައެވެ.