19 Jan 2024, 23:48
އޮސްޓްރޭލިއަން އޯޕަން ޓެނިސް މުބާރާތުގެ އަންހެން ސިންގަލްސް އިވެންޓްގެ ހަތަރުވަނަ ބުރުން މުބާރާތުގައި ދެވަނައަށް ސީޑް ކުރެވިފައިވާ ބެލަރޫސްގެ އަރީނާ ސަބަލެންކާ ޖާގަ ހޯދައިފިއެވެ.
މި މުބާރާތުގެ ހަތަރުވަނަ ބުރުން ސަބަލެންކާ ޖާގަ ހޯދައިފާވަނީ ތިންވަނަ ބުރުގައި ލެސިއާ ސުރެންކޯ އާއި ބައްދަލުކުރި މެޗް ފަސޭހަ ކަމާއެކު ސީދާ ދެ ސެޓުން ކާމިޔާބު ކޮށްގެންނެެވެ. މި މެޗްގެ ސެޓްތައް ސަބަލެންކާ ކާމިޔާބު ކޮށްފައިވަނީ ހައެއް ސުމެއް އަދި ހައެއް ސުމަކުންނެވެ. މެޗަށްފަހު ވާހަކަދައްކަމުން ސަބަލެންކާ ހާމަކުރި ގޮތުގައި މި ސީޒަންގައި އޭނާ މިވަގުތު ހުރީ މިދިޔަ ސީޒަނަށްވުރެ ރަނގަޅު ފޯމެއްގައި ކަމަށެވެ.
މިގޮތުން 2024ވަނަ އަހަރުގެ އަރީނާ މިދިޔަ އަހަރުގެ ސަބަލެންކާގެ މައްޗަށް ކުރި ހޯދާނެ ކަމަށް އޭނާ ހާމަކުރިއެވެ. ސަބަލެންކާ މިދިޔަ ސީޒަންގައިވަނީ އަހަރުގެ ގްރޭން ސްލޭމް ހަތަރު މުބާރާތުގެ ވެސް ސެމީފައިނަަލަށް ދަތުރު ކޮށްފައެވެ.
އަދި ސަބަލެންކާވަނީ މިދިޔަ ސީޒަންގެ އޮސްޓްރޭލިއަން އޯޕަން ވެސް ކާމިޔާބު ކޮށްފައެވެ. އަދި މި މުބާރާތުގައި މިހާތަނަށް ދައްކަމުންދާ ކުޅުމަށް ބަލާއިރު މި ފަހަރުގެ ތައްޓަށް ވެސް ވާދަކުރާ ކުޅުންތެރިންގެ ލިސްޓުގައި އޭނާގެ ނަން ވަނީ ހިމެނިގެން ގޮސްފައެވެ. މި މުބާރާތުގެ ހަތަރު ވަނަ ބުރުގައި ސަބަލެންކާ ބައްދަލުކުރާނީ އަމަންޑާ އަނިސިމޯވާއާއެވެ.