19 Jan 2024, 13:37
ރާއްޖެއަށް މަސްތުވާތަކެތި އެތެރެކޮށް އެ ވިޔަފާރިކުރިކަމުގެ ތުހުމަތުގައި ހައްޔަރުކުރި ދެމަފިރިންގެ ބަންދަށް އިއްޔެ ކްރިމިނަލް ކޯޓުން 15 ދުވަސް ޖަހައިފިއެވެ.
ކޯޓު އަމުރުގައި ވާގޮތުން، ހަ ޕެކެޓް މަސްތުވާތަކެތި ފެނިފައި ވަނީ 20 އަހަރުގެ އަންހެން މީހާއާއި 27 އަހަރުގެ ފިރިހެންމީހާގެ ލަގެޖުންނެވެ. ބަރުދަނުގައި 994 ގްރާމު ހުރި މި ތަކެތި ވަނީ، މަސްތުވާތަކެތީގެ ބާވަތެއް ކަމަށްވާ ރެސިމޭޓަށް ޕޮޒިޓިވްވެފައެވެ. އަދި، ފިރިހެންމީހާގެ ކުޑަކަމުދާ ތަކެތި ވަނީ، ސީއޯސީ، ޓީއެޗްސީ އަދި ބެންޒޯއަށް ޕޮޒިޓިވްވެފައެވެ.
ކޯޓުގައި އަންހެން މީހާ ފާހަގަކޮށްފައި ވަނީ އޭނާއަށް ލަގެޖުގައި މަސްތުވާތަކެތި ހުރިކަން ނޭނގޭ ކަމަށާއި އެއީ އޭނާއާ ގުޅުންހުރި އެއްޗެއް ނޫން ކަމަށެވެ. ނަމަވެސް އޭނާގެ ހެންޑް ބޭގުން 1751 ޔޫއެސް ޑޮލަރު ފެނިފައިވާކަން ކޯޓު އަމުރުގައި ފާހަގަކޮށްފައި ވެއެވެ.
މި ދެމަފިރިންނަށް ކުރާ ތުހުމަތުތަކުގެ ތެރޭގައި ޚާއްސަ އުކުޅެއް ބޭނުންކޮށްގެން ރާއްޖެއަށް މަސްތުވާތަކެތި އެތެރެ ކުރަން އުޅުން ހިމެނެއެވެ.