19 Jan 2024, 13:30
މުޖުތަމައު އިސްލާހުކޮށް، މަސްތުވާތަކެތި ފަދަ ބޮޑެތި ޖަރީމާތަކުންނާއި ފާހިޝް އަމަލުތަކުން މުޖުތަމައު ސަލާމަތްކުރެވޭނީ އީމާންކަމުގެ އަގީދާ ވަރުގަދަކޮށް ޣައިބުގައިވާ ކަންތައްތަކަށް ފުރިހަމަ މާނައިގައި އީމާންވެގެން ކަމަށް މިއަދުގެ ހުކުރު ޚުތުބާގައި ބުނެފިއެވެ.
އީމަންކަން ހަރުދަނާކުރުމުގެ މައްޗަށް މިއަދުކީ ޚުތުބާގައި ބުނީ، ގައުމުގެ ތައުލީމީ ފަލްސަފާއާއި، ގައުމީ މަންހަޖު ފުރިހަމައަށް ތަންފީޒުކޮށް، ޅަދަރީންގެ ހިތްތަކުގައި އީމާންކަން ހަރުދަނާ ކުރެވޭނެ ގޮތްތަކެއް މިއަދު ރާވަން ޖެހޭކަމަށެވެ. އަދި، އިސްލާމީ އުއްމަތް ބިނާކޮށް ތަރައްގީކުރުމުގައި ޒުވާނުންގެ ދައުރަކީ ވަރަށް މުހިންމު ދައުރެއް ކަމަށާއި މިކަމުގައި ޒުވާނުން އިސްނަގަން ޖެހޭކަމަށް ޚުތުބާގައި ބުންޏެވެ.
ގައުމުގެ އާބާދީގެ ބޮޑު ބަޔަކީ ޒުވާނުންކަމުގައި ވީއިރު، ހިތާމައަކީ ޒުވާނުންގެ ތެރޭގައި ދީނާ ދުރު، ވައްކަމާއި، ފޭރުމާއި، މީހުން މެރުމާއި، މަސްތުވާތަކެތި ބޭނުންކުރުން ފަދަ ﷲ ނަހީކުރެއްވި ބޮޑެތި ކުށްތަކަށް އަރައިގަންނަ މީހުން ތިބިކަން ކަމަށް ޚުތުބާގައި ބުންޏެވެ.
މިއަދުގެ ޒުވާނުން ކުށުގެ ޝިކާރައަކަށް ވުމުގައި ޖަވާބުދާރީވާން ޖެހޭނެ ބަޔަކު ވާކަމަށް ޚުތުބާގައި ބުންޏެވެ.
"ތިޔަބައިމީހުންގެ ތެރެއިން ކޮންމެ މީހަކީ ބެލެހެއްޓިންތެރިއެކެވެ. އަދި ކޮންމެ މީހަކު ވެސް އެ މީހެއްގެ ބެލެހެއްޓުމުގެ ދަށުގައިވާ މީހަކާ މެދު ސުވާލު ކުރެއްވޭނެއެވެ،" ޚުތުބާގައި ބުންޏެވެ.
އެހެންކަމުން އަހަރެމެންގެ ހުރިހާ ކަމެއް ބައްޓަންކުރަން ޖެހޭނީ އިސްލަމީ ހަމަތަކާ އެއްގޮތަށް ކަމަށާއި ތައުލީމީ ފޮތްތަކުގައި އަގީދާއާއި، އީމާންކަމުގެ ބައި އިތުރުކުރަން ޖެހޭކަމަށް ޚުތުބާގައި ބުންޏެވެ.
"މުދައްރިސުންނާއި އުނގަންނައިދޭ މީހުންނަކީ އީމާންކަމުގެ ފޭރާމުން ޒީނަތްތެރިވެފައިވާ މީހުންނަށް ވާންޖެހޭ. މާތް ﷲގެ ގުދްރަތްތެރިކަމާއި ކުޅަދުންވަންތަކަން އެންމެ ކުޑައިރުއްސުރެ ދަރީންނަށް އުނގަންނައިދިނުމަކީ، ހަރުދަނާ އަގީދާއެއްގެ މަތީގައި އެ ކުދީންގެ ނަފުސު ބިނާކުރުމަށް ވަރަށް މުހިންމު ކަމެއް،" ޚުތުބާގައި ބުންޏެވެ.
އޭގެ ސަބަބުން އެކުދިންގެ ދީނީ އަގީދާ ވަރުގަދަވެ، ދީނީ ކަންތައްތަކަށް ފަރުވާތެރިކަން ބަހައްޓާ ބަޔަކަށް އެ ކުދިން ވާނެކަމަށް ޚުތުބާގައި ބުންޏެވެ.