20 Jan 2024, 09:45
މާނަވް ފެންވަރަން ވަނުމުން އާރިޒް އަވަހަށް ޓެބްލެޓަށް ނަޒަރު ހުއްޓައިލިއެވެ. ކުރިން ބަލަމުންދިޔަ ސީސީޓީވީ މަންޒަރު ހުޅުވިއެވެ. ފެނުނު މަންޒަރުން އާރިޒްގެ ބޮލަށް އެނބުރުން ނޭރީ ކިރިޔާއެވެ. ދުވެފައި ކޮޓަރިން ނުކުތްއިރު، ލައިގެން ހުރި އެއްޗެއްސާއި މެދުގައިވެސް އޭނާއަށް ވިސްނައެއް ނުލެވުނެވެ.
********
އާރިޒް ނުކުތްއިރު، ސަޗިން ހުރީ ކާރު ފޮހޭށެވެ. އާރިޒް ދިޔަ ބާރުމިނުގައި ކާރަށް އެރުމުން، ސަޗިންވެސް ކުރަން ހުރި މަސައްކަތް ހުއްޓާލާފައި އަވަހަށް ކާރަށް އެރިއެވެ. ސަޗިން ހައިރާންވީ ނިދާ ހެދުމުގައި އާރިޒް ބޭރަށް ނުކުތްތަން ފެނުނީމައެވެ. އަބަދުވެސް ޝާހީކޮށް ހެދުން އަޅައިގެން ނޫނީ ބޭރަށް ނުދާ އާރިޒްއަށް މިއަދު ވީ ކިހިނެއް ހެއްޔެވެ؟
"ޕިންކްވިލާއަށް... އަވަސް..." ވާހަކަ ދެއްކިއިރު އާރިޒްގެ ނޭވާ ވަނީ އަވަސްވެފައެވެ.
ކުރަންޖެހުނީ ބައިގަޑިއިރުގެ ދަތުރެއް ނަމަވެސް، އާރިޒަށް ހީވީ ގަޑިއެއްހާއިރު ފާއިތުވެގެން ދިޔަ ހެންނެވެ. އޭނާގެ ހިތް ނެގިނެގިފައި ޖެހެމުން ދިޔައެވެ. އެންމެ ހިނދުކޮޅަކަށް ނަމަވެސް އަތުގައި އޮތް ޓެބްލެޓުން ނަޒަރު ވަކިކޮށްނުލައެވެ.
"މިތަނަށް ހުއްޓާ!..." މަގުގެ ވަކި ހިސާބަކުން ކާރު ހުއްޓުމަށް އާރިޒް އެދުނެވެ.
ސަޗިން ކުއްލިއަކަށް ބުރަކި ޖެއްސިއެވެ. އޭނާ ހައިރާންވެފައި މަގުގެ ދެފަރާތް ބަލައިލިއެވެ. ހަނި މަގުގެ ދެފަރާތުގައިވަނީ ބިޔަ ގަސްތަކެވެ. ވަށައިގެން ފެންނަން އޮތީ ޖަންގައްޔެވެ. މަގުމަތިން ދުއްވާ އެއްޗެއް ކީއްކުރަން މީހަކުވެސް ފެންނާކަށް ނެތެވެ. ޕިންކްވިލާއަށް ދިޔުމަށް އަދި ފުދޭވަރަކަށް އިރު ދުއްވަން ޖެހެއެވެ.
"އަހަރެން އަންނަންދެން މިތާ މަޑުކުރޭ!..." އާރިޒް އެދުނެވެ.
އާރިޒް ކާރުން ފައިބައިގެން ދުވެފައި ދިޔަގޮތުން، ސަޗިން އިނީ ހަދަންވީގޮތެއް ނޭނގިފައެވެ. އާރިޒް އުޅުނުގޮތުން ކަމެއް ގޯސްވެއްޖެކަން އޭނާއަށް އެނގުނެވެ. ޕިންކްވިލާއަށް އައީ އާރިޒްގެ މެހެމާނުންނެވެ. އެކަމަކު އެހާ ކުއްލިގޮތަކަށް އާރިޒް ޕިންކްވިލާއަށް ދާން އެދުމުން ސަޗިން އިނީ ގަބޫލުނުކުރެވިފައެވެ. އަބަދުވެސް އެކަހެރި ދިރިއުޅުމެއް އުޅެމުން އަންނަ އާރިޒަކީ އެހެން މީހުންގެ ކަންކަމަށް މާބޮޑު ފަރުވާލެއް ބަހައްޓާ މީހެއް ނޫނެވެ. ވެރިމީހާ ހިމާޔަތް ކުރުމަކީ ސަޗިންގެ ޒިންމާއެކެވެ. އެކަމަކު އާރިޒް މަޑުކުރަން ބުނެފައި އޮއްވައި ފަހަތުން ދިޔުމަކީވެސް ވަކި ރަނގަޅު ގޮތެއް ނޫނެވެ.
މަގު މެދުން ދުވަމުން އައި ލިޝާގެ މޫނުން ފެންނަމުން ދިޔައީ ބިރާއި ސިހުމެވެ. ފަސްއެނބުރި ބަލަމުން ދުވަމުން ދިޔައީ ދާނެ މަންޒިލެއް އޮވެގެން ނޫނެވެ. އަމިއްލަ ސަލާމަތް ހޯދަން މަޖުބޫރުވެގެންނެވެ. ލިޝާ ލައިގެން ހުރި ޓީޝާޓުގެ ކަރާއި ދިމާއިން އިރައިގެން ގޮސްފައިވާއިރު، މޭމަތިން ބޮޑުބައެއް ހާމަވާން ހުއްޓެވެ. އިސްތަށިގަނޑު ވަނީ ހޭވިފައެވެ. މޫނުމަތީގައި އަނިޔާގެ ނިޝާންތައް ފެންނަން ހުއްޓެވެ. ލިޝާގެ ފަހަތުން އަކްރަމާއި އިތުރު ފިރިހެނަކު ދުވަމުން އައެވެ. ހެނދުނުގެ ވަގުތުކަމުން މަގުމަތިން އެއްވެސް ދުއްވާ އެއްޗެއް ނުފެނެއެވެ. އެހިސާބުގައި މީހަކުވެސް ނެތެވެ. މާހައުލު ފިންޏެވެ. ނަމަވެސް ލިޝާގެ ނިތްކުރިމަތިން ވަނީ ދާހިއްލާލާފައެވެ.
ފަހަތް ބަލަމުންދިޔަ ލިޝާ ކޮންމެވެސް މީހެއްގެ ގައިގައި ލައިގަނެފައި ވެއްޓެން ދިޔައެވެ. އެމީހަކު ހުށިޔާރުކަމާއިއެކު ލިޝާގެ އުނަގަނޑުގައި ހިފައި، ހަށިގަނޑު ސީދާކުރުވިއެވެ.
"ޕްލީޒް... ސަލާމަތްކޮށްދީ..." ފަސްއެނބުރި ބަލަމުން ލިޝާ އާދޭސްކުރިއެވެ.
ރޮވޭވަރުން ލިޝާގެ އަޑުވެސް ބޭރުވަނީ ކިރިޔާއެވެ. ކައިރީގައި ހުރީ ކާކުތޯ ބަލާކަށްވެސް ލިޝާ ހަނދާނެއް ނުވިއެވެ. ކޮންމެ މީހެއްވިޔަސް ލިޝާގެ ފަރުވާލެއް ނެތެވެ. އޭނާ ބޭނުންވަނީ މީހެއްގެ ހިމާޔަތެވެ. އަމިއްލަ ސަލާމަތަށް ކަމެއް ކުރެވޭވަރަށްވުރެ ލިޝާ ހުރީ ވަރުބަލިވެފައެވެ.
އާރިޒް އެއްޗެއް ނުބުނެ ލިޝާއަށް ބަލަން އިރުކޮޅަކު ހުއްޓެވެ. ނިކަމެތިކަން ފިޔަވާ އިތުރު އެއްޗެއް އެ އަންހެންކުއްޖާގެ ކިބައިން އޭނާއަކަށް ނުފެނުނެވެ. ބިރުންގޮސް އެ ނާޒުކު އަންހެންކުއްޖާގެ ހަށިގަނޑު ތުރުތުރުއަޅައެވެ. ބޮޑު ދެލޮލުން ފެންނަމުން ދިޔައީ ސިހުމެވެ. ފައިވާނަށް ނާރާ ދުވުމުގެ ސަބަބުން ދެފައި ހަލާކުވެފައި ހުންނާނެކަމީ ޝައްކެއް އޮތް ކަމެއް ނޫނެވެ. ލިޝާގެ އޮމާން މޫނުގައި ވަނީ އަނިޔާގެ ނިޝާންތަކެވެ. މޫނުމަތީގައި ދިރުމެއް ނެތެވެ. ހިތާމައާއި ހިތްދަތިކަން ފިޔަވާ އިތުރު އެއްޗެއް އެކުއްޖާއަށް ލިބުމެއް ނެތް ކަހަލައެވެ. އެއީ އާރިޒް ދެކެން ބޭނުންވި މަންޒަރެކެވެ. ލިޝާއަށް އުފަލެއް ލިބިގެން ނުވާނެއެވެ. އެކަމަކު، ހުރިހާ ކަމެއް ހަމަލޮލަށް ފެނުމުން، އާރިޒްގެ ހިތަކަށް އުފާވެރިކަމެއް ނުލިބުނެވެ. ކީއްވެ ހެއްޔެވެ؟ ސަބަބަކީ، އެ އަންހެންކުއްޖާއަށް އަނިޔާ ދެވޭނެ ހަމައެކަނި އިންސާނަކީ އޭނާ ކަމަށް ވާތީއެވެ. އެހެން މީހަކަށް އެ އަންހެންކުއްޖާގެ ގައިގައި އިނގިލިކުރިވެސް ޖައްސާލެވިގެން ނުވާނެއެވެ. ހިތުގައި ޖައްސައިގެންވެސް ނުވާނެއެވެ. އެ ހައްގުވެސް އޮންނާނީ އޭނާއަށެވެ. އާރިޒްގެ ދެއަތް މުށްކެވުނީ އޭނާގެ އިހުތިޔާރުން ބޭރުގައެވެ. ދުވެފައި އެދިމާއަށް އައި ދެ ފިރިހެނުންނަށް އޭނާ އަވަސް ނަޒަރެއް ދިނެވެ. އަކްރަމް ކައިރިވަމުންދިޔަ ވަރަކަށް ލިޝާ އާރިޒާއި ގާތަށް ޖެހެމުން ދިޔައެވެ.
އަކްރަމާއިއެކު ހުރީ ޖާނުން ވަރުގަދަ ފިރިހެނެކެވެ. ދެމީހުން އާރިޒްގެ ކުރިމަތީގައި ހުއްޓުނުއިރު، އިންޒާރެއް ދޭފަދަ ބެލުމަކުން އާރިޒަށް ބަލަމުން ދިޔައެވެ.
"ދުރަށްޖެހޭ!..." އަކްރަމް އަމުރުކުރިއެވެ. "އެއީ އަހަރެންގެ އަނބިމީހާ... ދުރަށްދޭ!..."
އާރިޒް އެއްޗެއް ނުބުނެ ބަލަހައްޓައިގެން ހުރީއެވެ. އަކްރަމް ހުރީ މަސްތުގެ ހާލަތުގައެވެ. އެހާލުގައި ހުރެ، ކޮންމެފަދަ ކަމެއްވެސް ކުރަން ފަސްނުޖެހޭނެއެވެ. ލިޝާ ރޮއެރޮއެފައި ސަލާމަތްކޮށްދިނުމަށް އެދެމުން ދިޔައެވެ. އިރުކޮޅަކު އެގޮތުގައި ހުރެފައި އާރިޒް ލިޝާއާއި ދުރަށް ޖެހުނީ އަތުގައި އޮތް ޖެކެޓުން ލިޝާގެ ހަށިގަނޑު ނިވާކުރުމަށްފަހުގައެވެ. އަކްރަމް އުޅުނީ ލިޝާގެ އަތުގައި ހިފައި ދަމައިގަންނާށެވެ. އާރިޒް ހުށިޔާރުކަމާއިއެކު އަކްރަމްގެ އަތުގައި ހިފެހެއްޓިއެވެ.
"ހަމަ މިހާރު ދޫކުރޭ!..." އަކްރަމް އަމުރުކުރިއެވެ.
އާރިޒް ބާރުގަދައެވެ. އޭނާ އަކްރަމްގެ އަތުގައި ހިފައިގެން ހުރިލެއް ބާރުކަމުން، އަތުގެ ނާރުތައް ފުފިގެންދާކަށް ގިނައިރެއް ނުނެގިއެވެ. ތަރުތީބުން ބަލަހައްޓަމުންދާ އަތުގެ މަސްތައް ހުރީ ހަރުވެފައެވެ. އެއީ އަންހެންކުދިން ނުހަނު ހިތްއެދޭނޭ ސިފައެކެވެ. އާރިޒް ލައިގެން ހުރީ އަތްކުރު ޓީޝާޓެއްކަމުން އެ މަންޒަރު ލިޝާއަށް ރީތިކޮށް ފެނުނެވެ.
އަކްރަމް އަތް ދަމައިގަންނަން އުޅެއުޅެ ގުޑުވާވެސް ނުލެވުނެވެ. އޭނާ ހިތްހަމަނުޖެހިފައި ހުތުރު ބަސްތަކުން އާރިޒާއި މުހާތަބުކުރަމުން ދިޔައެވެ.
"ހަމަ މިހާރު އޭނަ އަތުން ދޫކުރޭ!... ނުބެހޭ ކަންތައްތަކާ ދުރުގަ ހުރޭ!..." އަކްރަމްގެ ކައިރީގައި ހުރި މީހާ ވާހަކަ ދެއްކީ ހިންދީ ބަހުންނެވެ. އޭނާވެސް ހުރީ މަސްތުގެ ހާލަތުގައެވެ.
"އޭނަ އެބުނަނީނު ދާކަށް ބޭނުމެއް ނޫނޭ... އަނބިމީހާއަށްވިޔަސް، ނުރުހުމުގަ އެއްވެސް ކަމެއް ނުކުރެވޭނެ..." އަކްރަމްގެ އަތް ފޮޅުވައިލާފައި، ލިޝާގެ އަތުގައި ހިފައި ކައިރިކޮށްލަމުން އާރިޒް ބުންޏެވެ.
"ރީތިކޮށް ދުރަށް ދާނީތަ؟.... ނޫނީ..." އަކްރަމް އިންޒާރު ދިނެވެ.
"ނޫނީ؟..." އާރިޒް ކުރިއަށް ޖެހިލިއެވެ. އޭނާގެ ދެލޮލުގައި ޖެހިލުމުގެ އެއްވެސް އަސަރެއް ފެންނާކަށް ނެތެވެ.
އަކްރަމް އަތް އުފުލައިލީ އާރިޒްގެ މޫނުމަތީގައި ޖަހާށެވެ. އާރިޒް ހުށިޔާރުކަމާއިއެކު އެ ހަމަލާއިން ސަލާމަތްވިއެވެ. އަކްރަމްގެ އަތުގައި ހިފައި، ފުރަގަހަށްވާހެން އަނބުރައިލިއެވެ. އެއަށްފަހު، ބިންމައްޗަށް ތިރިކޮށްލީ އަކްރަމަށް ވިސްނައިލާނޭ ފުރުސަތެއްވެސް ނުދީއެވެ. އަކްރަމް ރޮއެގަތެވެ. ވީތަދުން ހަޅޭއްލެވިއެވެ. އެފަދަ އަނިޔާއެއް ދުވަހަކުވެސް އޭނާއަށް މީހަކު ނުދެއެވެ. އެވަރުގެ ބާރެއް އެހެން މީހެއްގެ ފުށުން އޭނާއަށް އިހުސާސްކުރަން ޖެހިފައިވެސް ނުވެއެވެ.
"ޔޫ..." އަކްރަމްގެ ކައިރީގައި ހުރި މީހާ ގޮށްމުށުގެ ހަމަލާއެއް އާރިޒަށް އަމާޒުކުރިއެވެ.
އާރިޒް އެ ހަމަލާއިންވެސް ސަލާމަތްވިއެވެ. އޭނާ ފައި އުފުލާލުމަށްފަހު އަނެއް ފައިގެ އެހީގައި އެނބުރިލިއެވެ. ނުހަނު ފަސޭހައިން އޭނާގެ ފައިން ކުރިމަތީގައި ހުރި މީހާގެ މޫނުމަތީގައި ޖަހައި، ބިންމައްޗަށް ތިރިކޮށްލިއެވެ. ލިޝާ ހުރީ ދެލޯ ބޮޑުވެފައެވެ. ބަލާބެލުމަށް އާރިޒަކީ އެހާ ކުޅަދާނަ މީހެއް ހެން ހީވެސް ނުވެއެވެ. އެފަދަ އުކުޅުތައް އެނގޭނީ އެތައް ދުވަހަކުން އެ ހުނަރު ދަސްކޮށްގެންނެވެ. އާރިޒްގެ ކުޅަދާނަކަން ފެނި ކޮންމެ އަންހެންކުއްޖަކުވެސް އަޖައިބުވާނެއެވެ. ހަށިގަނޑުގެ މަސްތައް އެހާ ވަރުގަދަވެފައި ކަސްރަތުކޮށް ބަލަހައްޓަމުންދާކަށް އެނގެއެވެ.
އާރިޒް ލިޝާއާއި ދިމާއަށް އެނބުރިފައި އަކްރަމްމެންނަށް ބަލައިލިއިރު، ދެމީހުން ކޮރާޖަހަމުން ދުވެފައި މާދުރަށް ގޮސްފިއެވެ.
"ޔޫ އޯކޭ؟..." އާރިޒްގެ މޫނަށް އަވަސް ނަޒަރެއް ދެމުން ލިޝާ އަހައިލީ ކަންބޮޑުވެފައެވެ. ހުސްފައިގައި ކޮރާޖަހަމުން އާރިޒާއި ދިމާއަށް އައިއިރު، އަމިއްލަ ހަށިގަނޑުގައި ވޭނެއް އަޅަމުންދާކަން އިހުސާސްވެސް ނުވާ ކަހަލައެވެ.
އާރިޒް ހައިރާންވިއެވެ. އަނިޔާވެފައި ހުރީ ލިޝާއަށެވެ. އެހީތެރިކަން ބޭނުންވަނީވެސް ލިޝާއެވެ. އެކަމަކު އަމިއްލަ ނަފުސަށްވުރެވެސް ލިޝާއަށް މުހިއްމުވީ އާރިޒް ހެއްޔެވެ؟ ލިޝާގެ ބެލުމުގައި ދެއްކުންތެރިކަމެއް ނެތެވެ. އޭނާ ހުރީ އާރިޒާއިމެދު ކަންބޮޑުވެފައެވެ. ފިނިވެގެން މުޅި ހަށިގަނޑުގައި މަޑު ތުރުތުރެއް އުފެދިފައިވާއިރުވެސް، ލިޝާއަށް އަމިއްލަ ނަފުސު މުހިއްމެއް ނުވިއެވެ. އޭނާ ވިސްނީ ނުވެސް ދަންނަ މީހަކާއި މެދުގައެވެ.
އާރިޒް ޖަވާބެއް ނުދެއެވެ. ފަސްއެނބުރި ހިނގައިގަތެވެ. ލިޝާ ހުރީ ދެފިކުރެއްގައެވެ. އެންމެފަހުން އާރިޒްގެ ފަހަތުން ހިނގައިގަތެވެ. ކާރާއި ހަމައަށް ގޮސްފައި ލިޝާ އަންނަން ފެށުމުން، އާރިޒް އޭނާގެ މިސްރާބު ބަދަލުކޮށްލިއެވެ. ސަޗިންއަށް އެމަންޒަރު ފެނިގެން، ކާރުން ފައިބަން ފެށުމުން، އާރިޒް އަތުގެ އިޝާރާތުން އެކަން މަނާކުރިއެވެ. ކުރު މެސެޖެއް ލިޔެ ސަޗިންއަށް ފޮނުވައިލިއެވެ.
"އެކްސްކިއުޒް..." އާރިޒް އާއި އަރާ ހަމަކުރަމުން ލިޝާ ބުންޏެވެ. "އެންމެ ރަނގަޅުތަ އަހަރެން ތިމީހާއާއެކު ތިގެއަށް ދިޔަސް؟..."
އާރިޒްގެ ފިޔަވަޅުތައް ހުއްޓުނެވެ. އޭނާގެ ފުރިހަމަ ސަމާލުކަން ލިޝާއަށް ހުއްޓައިލިއެވެ. ކަޅިޖަހާނުލައި ލިޝާގެ މޫނަށް ބަލަން ހުރިގޮތުން ލިޝާ ރަކިވިއެވެ. އާރިޒް ހީކުރީ ލިޝާ އެންމެ ފުރަތަމަވެސް އެދޭނީ ޕޮލިސްސްޓޭޝަންއަށް ދިޔުމަށް ކަމަށެވެ.
"ސޮރީ... އަހަރެންގެ ހުރިހާ އެއްޗެއް ހުރީ އެހެން ގެއެއްގަ... އަހަރެން މީ އެހެން ގައުމެއްގެ މީހެއް.... އަހަރެން ވަންނާނެ އިތުރު ތަނެއް މިތާކު ނެތް... އަހަންނަށް ދެން އެގެއަށް ދާކަށް ނުކެރޭނެ... ޕާސްޕޯޓާ ފޯނުވެސް ވީ އެތާ... ހަމަ ކުޑަ ދުވަސްކޮޅަކަށް އަހަރެން ތިގޭގަ ހުންނާނީ..." ލިޝާ އިސްޖަހައިލިއެވެ.
"އަހަރެންގެ ގެއަށް ދާން ކެރޭނެ؟..." އާރިޒްގެ ބަރު އަޑުން ބުނެލިއެވެ. "އަހަރެން މީ ސްޓްރޭންޖާއެއް... ކިހިނެއް އެނގެނީ އަހަރެން ގޯސްކަމެއް ނުކުރާނެ ކަމެއް؟..."
އެ އަޑު ޖެހުމުން ލިޝާ ފިނިވިއެވެ. ހަށިގަނޑުގެ އެންމެ ހިމަ ނާރުތަކާއިވެސް ކުޅެލާފަދަ ފިރިހެންވަންތަ އަޑެކެވެ. ލިޝާ އެއްޗެއް ނުބުނެއެވެ. ވިސްނައިލިއެވެ. އާރިޒަށް އިތުބާރު ކުރުން ނޫންގޮތެއް އެނާއަކަށް ނެތެވެ.
"ގޯސްމީހަކު އަހަރެންގެ ހަށިގަނޑު ނިވާކޮށެއްނުދޭނެ..." ލިޝާ ހިތާއިހިތުން ވާހަކަ ދެއްކިއެވެ.
އަކްރަމްގެ ކައިރީގައި ހުރުމަށްވުރެ ނުދަންނަ މީހަކާއިއެކު އުޅެންވެސް އެވަގުތު ލިޝާއަށް މާ ރައްކާތެރިއެވެ. އަނެއްކޮޅުން ފުލުހަށް ގޮސްގެން މައްސަލަ އިތުރަށް ގޯސްވާކަށް ލިޝާ ބޭނުމެއް ނުވެއެވެ. އެފަދަ ކަމެއް ހިނގައިގެން އުޅޭކަން އޭނާގެ މަންމަމެންނަށް އެނގިއްޖެނަމަ، ހިތް ހުއްޓިގެން މަރުވެސް ވެދާނެއެވެ. ލިޝާ ބޭނުންވީ އަކްރަމް ހަމަޖެހުމުން، ރީތިކޮށް ވާހަކަ ދައްކައިގެން މައްސަލަ ހައްލުކޮށް، އެނބުރި ގައުމަށް ދާށެވެ. އެކަމަކު، އަކްރަމަކީ ވާހަކަދެއްކޭ ފެންވަރުގެ މީހެއް ހެއްޔެވެ؟ މަސްތުވެގެން ހުރި އަކްރަމްގެ ނުބައިކަން ހައްދުފަހަނަ އަޅައިގެން ދާނޭ ކަމަށް ލިޝާ ހީވެސް ނުކުރެއެވެ. އިތުރު މީހަކާއިއެކު ލިޝާގެ އިއްފަތްތެރިކަން ފޭރިގަންނަން މަސައްކަތް ކުރިއިރު، އިސްލާމްދީނުގެ ރިވެތި އަދަބުތަކުގެ މަތީންވެސް އޭނާ ހަނދާނެއް ނެތެވެ. ލިޝާ އާރިޒްގެ ފައިން ފެށިގެން މޫނަށް ނަޒަރު ހިންގައިލިއެވެ. އާދައިގެ ޓީޝާޓަކާއި ސޯޓެއްގައި ހުރިއިރު، އާރިޒް އަރާފައި ހުރީވެސް އާދައިގެ ފައިވާނަކަށެވެ. ދިގުކޮށްފައިވާ ތުނބުޅިއާއި، ލައިގެން ހުރި ހެދުމުން އާރިޒް ވައްތަރީ ވަރަށް ފަގީރު ދިރިއުޅުމެއް އުޅެމުން އަންނަ މީހަކާއެވެ. އަމިއްލަ ނަފުސަށް މާބޮޑަށް އަޅާލާ މީހެއް ވައްތަރު ނުޖަހައެވެ. ލިޝާގެ ހިތުގައި އުފެދުނު ހަމްދަރުދީ އެހެން ހުރިހާ ކަމެއްގެ މައްޗަށް ބާރުފޯރުވިއެވެ.
(ނުނިމޭ)