19 Jan 2024, 10:33
ސައުދީ ޕްރޯ ލީގުގެ އަލް އިއްތިފާގަށް ކުޅެމުންދިޔަ އިންގްލަންޑްގެ ބައިނަލްއަޤުވާމީ ކުޅުންތެރިޔާ ޖޯޑަން ހެންޑަސަން ނެދަލަންޑްސްގެ އަޔެކްސް އެމެސްޓަޑަމްއަށް ސޮއިކޮށްފިއެވެ.
ހެންޑަސަން އަޔެކްސްއަށް ސޮއިކޮށްފައިވަނީ ދެ އަހަރާއި ބައިގެ އެއްބަސްވުމެއްގެ ދަށުންނެވެ.
އޭނާ އަލް އިއްތިފާގް ދޫކޮށް އަޔެކްސްއަށް ބަދަލުވީ ހަފުތާއަކު ހަތް ސަތޭކަ ހާސް ޕައުންޑްގެ ފީއަކަށް ތިން އަހަރު ދުވަހުގެ އެއްބަސްވުމެއްގެ ދަށުން އެ ޓީމާ ގުޅުނުތާ ހަ މަސްދުވަހުގެ ތެރޭގައެވެ. އަލް އިއްތިފާގުން ވެސް ވަނީ މި ކަމުގައި އެއްބާސްރުލުން ދިނުމުގެ ގޮތުން ހެންޑަސަންގެ އެއްބަސްވުން ބާތިލުކޮށްފައެވެ.
އަޔެކްސްގެ ކޯޗް ޖޯން ވެންޓް ޝިޕް ބުނީ، އޭނާ ބޭނުންވީ ތަޖުރިބާ ހުރުމުގެ އިތުރުން ދަނޑުމަތީ ލީޑަރެއްގެ ރޯލު އަދާކުރެވޭ ފެންވަރުގެ މިޑްފީލްޑަރެއް ކަމަށެވެ. މި ވަގުތު ޓީމަށް ދިމާވެފައިވާ އަނިޔާގެ މައްސަލަތަކާ އެކު ބޭނުންވީ ވަގުތުން ޓީމާ ގުޅެވޭ ހާލަތެއްގައި ހުރި ކުޅުންތެރިއެއް ކަމަށާއި އެގޮތުން ހެންޑަސަންއަކީ އޭނާ ބޭނުންވި ފެންވަރުގެ ގާބިލު ކުޅުންތެރިއެއް ކަމަށް އޭނާ ބުންޏެވެ.
ޖޯން ބުނީ ހެންޑަސަން ޓީމާ ގުޅުން މިއީ މި ވަގުތަށް އޭނާގެ ޓީމަށް ލިބިގެންދިޔަ ވަރަށް ބޮޑު ކުރިއެރުމެއް ކަމަށެވެ. އަދި، އެ ޓީމުގައި ތިބި ޒުވާން ކުޅުންތެރިންނަށް މަގު ދައްކައިދިނުމުގައި ހެންޑަސަން ފެންވަރުގެ ކުޅުންތެރިއެއްގެ ބޭނުން ދަނޑު މަތީއާއި ދަނޑުން ބޭރުގައި ވެސް ވަރަށް ބޮޑަށް ހިފޭނެކަން އޭނާ ފާހަގަކުރިއެވެ.
ހެންޑަސަން އަޔެކްސްއަށް ބަދަލުވިޔަސް އަލް އިއްތިފާގަށް ވެސް މާލީ ގޮތުން ގެއްލުމެއް ލިބިފައެއް ނުވެއެވެ.
އަލް އިއްތިފާގާ ވަކިވުމަށް ފަހު ހެންޑަސަން ވަނީ އެ ޓީމާއި އެ ޓީމުގެ ސަޕޯޓަރުންނަށް ޝުކުރު އަދާކޮށްފައެވެ. އަދި ސީޒަންގެ ބާކީ އޮތް ބަޔަށް ކާމިޔާބީއަށް އެދޭކަމުގައި ވެސް އޭނާ ބުންޏެވެ.