19 Jan 2024, 16:37
އެފްރިކަން ކަޕް އޮފް ނޭޝަންސް ގްރޫޕް އޭގައި ނައިޖީރިއާއިން މުބާރާތް ބާއްވާ ޤައުމު ކޯޓޭޑިއުއާ ބަލިކޮށް، ދެވަނަ ބުރުގެ އުންމީދު އާކޮށްފިއެވެ.
އަބީދްޖާގެ އަލަސާނޭ އޮއުއަޓާރާ ސްޓޭޑިއަމްގައި ކުޅުނު މި މެޗު ނައިޖީރިއާއިން ކާމިޔާބު ކޮށްފައިވަނީ 1-0 އިންނެވެ.
މެޗުގެ ކުރީކޮޅު ދެ ޓީމަށް ވެސް ލަނޑު ޖަހާނެ ރަނގަޅު ފުރުސަތު ލިބިގެންދިޔައެވެ. ނަމަވެސް ފުރުސަތުތަކުގެ ބޭނުން ނުހިފި ދިއުމުގެ ނަތީޖާއަކަށް ވެގެންދިޔައީ ފުރަތަމަ ހާފުގައި ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި ނިމުމެވެ.
މެޗުގެ ހަމައެކަނި ލަނޑު ފެނިގެންދިޔައީ މެޗުގެ 55 ވަނަ މިނެޓުގައި ނައިޖިރިއާއަށް ލިބުނު ޕެނަލްޓީ އަކުންނެވެ. ކޯޓޭޑިއުއާގެ ޕެނަލްޓީ އޭރިއާ ތެރެއިން އެ ޓީމުގެ އުސްމާން ޑިއޮމަންޑޭ ނައިޖީރިއާގެ ވިކްޓާ އޮސިމްހޭންއަށް ކުރި ފައުލް ރެފްރީއަށް ފާހަގަނުވި ނަމަވެސް ވީއޭއާރުން ވަނީ އެކަން ފާހަގަކުރެވި ރެފްރީގެ ސަމާލުކަމަށް ގެނެސް އެ ހާދިސާ ބެލުމަށް ލަފާ ދީފައެވެ. ބެލުމަށް ފަހު ރެފްރީ ވަނީ ނައިޖީރިއާއަށް ޕެނަލްޓީއެއް ދޭން ނިންމާފައެވެ. ޕެނަލްޓީ ކާމިޔާބު ކޮށްދީ ނައިޖީރިއާއަށް ލީޑު ނަގައިދިނީ ވިލިއަމް ޓްރޫސްޓް އިކޮންގްއެވެ.
މި ކާމިޔާބީއާ އެކު ނައިޖިރިއާއިން ވަނީ މިހާތަނަށް ކުޅުނު ދެ މެޗުން ލިބިފައިވާ ހަތަރު ޕޮއިންޓާ އެކު ކޯޓެޑިއުއާ ފަހަތަށް ޖައްސައިލާ ތާވަލުގެ ދެވަނައަށް ކުރިއަށް ޖެހިލައިފައެވެ. މިހާރު އޮތް ގޮތުން މުބާރާތުގެ ދެވަނަ ބުރުން ޖާގައެއް ހޯދާނަމަ ކޯޓެޑިއުއާއަށް ޖެހޭނީ ފަހު މެޗުގައި ގްރޫޕްގެ އެއްވަނައިގައި އޮތް އިކުއެޓޯރިއަލް ގިނީއާ ބައްދަލުކުރާ މެޗު ކާމިޔާބުކުރާށެވެ.
މުބާރާތުގައި އިކުއެޓޯރިއަލް ގިނީއާއި ގިނީ ބިސާއު ބައްދަލުކުރި މި ގްރޫޕްގެ އަނެއް މެޗު 4-2 އިން ކާމިޔާބުކުރީ އިކުއެޓޯރިއަލް ގިނީއެވެ. އެ ޓީމު އެއްވަނައިގައި އޮތީ ހަތަރު ޕޮއިންޓާ އެކު ފައިދާ ގޯލުގެ ތަފާތުންނެވެ.