19 Jan 2024, 09:21
ހިންދީ ސިނަމާއަށް ރީތި ފިލްމުތަކެއް ކުޅެދިން ކުރީގެ ބަތަލާ ނޫޓާންގެ މާމަ ދަރިފުޅު ޕްރަނޫޓާންއަށް ހޮލީވުޑްގެ ފިލްމަކުން ފުރުސަތު ލިބިއްޖެއެވެ.
ޕްރަނޫޓާން އަކީ ކުރީގެ ވަރަށް ގިނަ ފިލްމުތަކުން ފެނިފައިވާ އެކްޓަރު މޯނިޝް ބަލްގެ ދަރިފުޅެވެ. ފިލްމު "ނޯޓް ބުކް"އިން 2019ވަނަ އަހަރު ފިލްމީ ދާއިރާއަށް ތަޢާރަފުވި ޕްރަނޫޓާން ވަނީ އެ އަހަރުގެ ފިލްމުފެއަގެ ބެސްޓް ފީމޭލް ޑެބިއު ކެޓެގަރީއަށް ނޮމިނޭޓް ވެސް ވެފައެވެ.
ޒުވާން ބަތަލާ ޕްރަނޫޓާންއަށް ފުރުސަތު ލިބިފައިވަނީ ހޮލީވުޑްގައި މަސައްކަތް ކުރާ އިންޑިއާއަށް ނިސްބަތްވާ ރަހްސާން ނޫރު އުފައްދާ ފިލްމަކުންނެވެ. "ކޮކޯ ނަޓް"ގެ ނަމުގައި އުފައްދާ މި ފިލްމުގައި އިންޑިއާގެ ރަހަތައް އެކުލެވޭއިރު ޕްރަނޫޓާން ކުޅެން ހަމަޖެހިފައި ވަނީ ސިއްހީ ދާއިރާއިން ތައުލީމު އުނގެނެމުންދާ ދަރިވަރެއްގެ ރޯލެވެ.
ބަތަލާ ޕްރަނޫޓާން، މާމަ ނޫޓާން އަދި ބައްޕަ މޯނިޝް ބަލް-- ފޮޓޯ/އިންޓަނެޓް
އެމެރިކާގެ ޗިކާގޯގައި ފިލްމުގެ ބޮޑު ބައެއް ޝޫޓްކުރަން ނިންމާފައިވާއިރު މި އަހަރުގެ ޖޫން އަދި ޖުލައި މަހު ފިލްމުގެ ކާސްޓުން އިންޑިއާ އަދި އެމެރިކާގައި ހަރަކާތްތެރިވާނެ ކަމަށް ރިޕޯޓުތަކުން ބުނެއެވެ. އިނގިރޭސި އަދި ހިންދީ ބަހުން ގެނެސްދޭން ނިންމާފައިވާ މި ފިލްމާ އެކު ޒުވާން ޕްރަނޫޓާންގެ އޮއްސިފައިވާ ފިލްމީ ކެރިއަރު އިތުރަށް ކޮޅަށްޖެހޭނެ ކަމަށް އުއްމީދުކުރާ ކަމަށް ބަތަލާއަށް ތާއީދުކުރާ ފަރާތްތަކުން ވަނީ ބުނެފައެވެ.
ގާނޫނީ ވަކީލު ކަމުގެ ރޮނގުން މަތީ ތައުލީމު ހާސިލުކޮށްފައިވާ ބަތަލާ ބުނީ، ލޯބީގެ ހާދިސާއެއްގެ މައްޗަށް ބިނާކޮށް އުފައްދާ ފިލްމު ތަކަކީ އަބަދުވެސް ވަރަށް ޝައުގުވެރިވާ ފިލްމުތައް ކަމަށެވެ. ފިލްމު "ކޮކޯ ނަޓް" ބެލުންތެރިންނާ ހަމައަށް ގެނެސްދޭން ނިންމާފައި ވަނީ އަންނަ އަހަރުއެވެ.