19 Jan 2024, 09:29
މިހާރު އޮލިމްޕަހުގައި ދައްކަމުން އަންނަ ރޮމްކޮމް ފިލްމު "މީ އިޝްގު" އަތޮޅު ތެރޭގައި ދައްކަން ފެށުމަށް ތައްޔާރުވެއްޖެއެވެ.
ޝަރަފް އަބްދުﷲ އާއި އައިމިނަތު ރަޝްފާ (އާޝާ) ލީޑުން ފެންނަ މި ފިލްމު ވަނީ މި މަހުގެ ހަވަނަ ދުވަހުގައި އޮލިމްޕަހުގައި ޕްރިމިއާކޮށް ދައްކަން ފަށާފައެވެ.
އެއާއެކު ފިލްމު އަތޮޅު ތެރޭގައި ބަލަން ބޭނުންވާ އެތައް ބަޔަކު ތިބި ކަމަށް ވަނީ އާންމުކޮށްފައެވެ. އެންމެފަހުން އެ ފުރުސަތު ވަނީ މިހާރު ހުޅުވާލާފައެވެ.
އަޒްހާން އިބްރާހީމް ޑައިރެކްޓު ކުރާ މި ލޯބީގެ ފިލްމު މިހާރު އަތޮޅު ތެރޭގައި އަޅުވަން ބޭނުންވާ ނަމަ އެ ފުރުސަތު ހުޅުވާލާފައިވާ ކަމަށް ޕްރޮޑަކްޝަނުން ބުނެއެވެ. އަދި ފިލްމު ބުކް ކުރުމަށްޓަކައި ގުޅާނީ 9633326 އަށެވެ.
މި ފިލްމަކީ އާޝާއާއި ޝަރަފު އެކީގައި މަސައްކަތް ކުރާ ތިންވަނަ ޕްރޮޖެކްޓެވެ. އަދި ޖޯޑެއްގެ ގޮތުގައި ދެ މީހުން ފެނިގެންދާ މިއީ ދެވަނަ ފަހަރެވެ. މީގެ ކުރީން އުފައްދާފައިވާ ވެބް ސީރީޒެއް ކަމަށްވާ "ހިނދުކޮޅެއް"ގައި ވެސް ދެ މީހުން ވަނީ ޖޯޑެއްގެ ގޮތުގައި ފެނިގެން ގޮސްފައެވެ.
މިއީ އަޒްހާން ޑައިރެކްޓު ކުރާ ފުރަތަމަ ފިލްމެވެ.
ފިލްމުގެ އިތުރު ޝޯތައް މާލޭގައި ދައްކަމުން ދާއިރު މި ޝޯތަކަށް ޓިކެޓު މިހާރު ވެސް ދޫކުރަމުން އެބަދެއެވެ. އޮލިމްޕަސް ކައުންޓަރުން ޓިކެޓު ވިއްކަމުންދާއިރު ޓިކެޓު ބުކް ކުރުމަށްޓަކައި ގުޅާނީ 9633326 އަށެވެ.
އަޒްހާން ބުނާގޮތުގައި މި ފިލްމަކީ އާއިލާ އެކު ގޮސް އެންމެންނަށް ވެސް ބަލައިލެވޭނެ ފިލްމެކެވެ. އަދި ދިވެހި އޯޑިއެންސްއާ ގުޅޭ ތީމުތައް މި ފިލްމުން ފެންނާނެ ކަމަށް ވެސް އޭނާ ބުނެއެވެ.