18 Jan 2024, 21:04
އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބުގެ ދައުރު ހަމަވާތީ ކޮމިޝަންގެ މެމްބަރުކަމަށް ކުރިމަތިލުމަށް ރައީސް އޮފީހުން މިރޭ ހުޅުވައިލައިފިއެވެ.
ހަބީބްގެ ދައުރު ހަމަވާނީ އަންނަ މާޗު މަހުގެ 13ވަނަ ދުވަހެވެ.
ރައީސް އޮފީހުން ބުނީ، ކޮމިޝަންގެ މެމްބަރުކަމަށް ކުރިމަތިލުމުގެ ފުރުސަތު ހުޅުވައިލައިފައި ވަނީ، މިއަދުން ފެށިގެން މި މަހުގެ 30ވަނަ ދުވަހުގެ 12:30 އާ ހަމައަށް ކަމަށެވެ.
އެހެންކަމުން ޝަރުތު ހަމަވާ އަދި މެމްބަރުކަމަށް ކުރިމަތިލުމުގެ ޝައުގުވެރިކަން ހުރި ބޭފުޅުން ރައީސް އޮފީހަށް ހުށަހެޅުމަށް އެ އޮފީހުން އެދިފައިވެއެވެ.
އީސީގައި ފަސް މެމްބަރުން ތިއްބަވާއިރު، އެންމެ ފަހުން ދައުރު ހަމަވެފައިވަނީ އެ ކޮމިޝަންގެ މެމްބަރު އަލީ ނަޝާތުގެއެވެ. ނަމަވެސް އަލުން މެމްބަރުކަމަށް ކުރިމަތިލައްވައި، ރުހުން ލިބުމާއެކު މިހާރު އޭނާ ހުންނެވީ މެމްބަރުކަމުގައެވެ.