18 Jan 2024, 15:47
ފަތުރުވެރިކަމުގެ ދާއިރާގައި މަސައްކަތް ކުރާ އަންހެނުން އިތުރުކުރުމަށްޓަކައި 'ފަހި ފަތުރުވެރިކަމަށް އަންހެނުން' ގެ ނަމުގައި ޚާއްސަ ޕްރޮގްރާމެއް މިއަދު ފަށައިފިއެވެ.
މިއީ ފަތުރުވެރިކަމުގެ ދާއިރާގައި މަސައްކަތްކުރާ ދިވެހި އަންހެނުންގެ އަދަދު އިތުރުކުރުމަށްޓަކައި، އަންހެނުންނަށް ޚާއްސަކޮށްގެން ބާއްވާ 'މެންޓާޝިޕް ޕްރޮގްރާމް'އެކެވެ.
މި ޕްރޮގްރާމް އިފްތިތާހުކުރުމުގެ ގޮތުން މިއަދު މީރުމާ ހޮޓަލުގައި ބޭއްވި ރަސްމިއްޔާތު ޝަރަފުވެރި ކޮށްދެއްވީ އިކޮނޮމިކް މިނިސްޓަރު މުހައްމަދު ސައީދެވެ.
ޓޫރިޒަމް ދާއިރާއަށް އަންހެނުން ނެރުމުގެ ޕްރޮގްރާމް އިކޮނޮމިކް މިނިސްޓަރު މުޙައްމަދު ސައީދު އިފްތިތާހު ކޮށްދެއްވާއިރު އަރިހުގައި ޓޫރިޒަމް މިނިސްޓަރު ފައިސަލް-- ފޮޓޯ: ޓޫރިޒަމް މިނިސްޓްރީ
މި ރަސްމިއްޔާތުގައި ވާހަކަ ދައްކަވަމުން ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވީ މި ޕްރޮގްރާމަކީ ރައީސް ޑރ. މުހައްމަދު މުޢިއްޒުގެ ހަފުތާ 14ގެ މަގު ޗާޓުގައި ހިމެނޭ ވައުދު ތަކުގެ ތެރޭގައި ހިމެނޭ ވައުދުފުޅެއް ކަމަށެވެ.
"ފަތުރުވެރިކަމަކީ ވަޒީފާގެ ބާޒާރަށް ސީދާ ގޮތުންނާއި ނުސީދާ ގޮތުންވެސް ފައިދާ ލިބިދޭ ސިނާއަތެއް އަދި މިދިޔަ 2022 ވަނަ އަހަރަށް ބާލާއިރުވެސް ޖީޑީޕީއަށްވެސް ފަތުރުވެރިކަމުގެ ސިނާއަތް ވަނީ 40 ޕަސެންޓް ހިއްސާކޮށްފަ،" މިނިސްޓަރު ވިދާޅުވިއެވެ.
ޓޫރިޒަމް މިނިސްޓްރީން ބުނިގޮތުގައި މި ޕްރޮގްރާމް ކުރިއަށް ދާނީ ތިން މަސް ދުވަހުގެ މުއްދަތަކަށެވެ.
އަދި މި ތިން މަހުގެ ތެރޭގައި ދަރިވަރުން މެންޓަރުންނާ ގުޅުވައިދީ އެ މެންޓަރުންގެ އެހީގައި އެ ކުދިން ވަޒީފާގެ މާހައުލަށް ތައްޔާރު ކުރެވިގެންދާނެ ކަމަށް ވެސް މިނިސްޓްރީން ވަނީ ބުނެފައެވެ.
މި ޕްރޮގްރާމުގެ މައިގަނޑު އެއް މަގުސަދަކީ ފަތުރުވެރިކަމުގެ ސިނާއަތަށާއި، މި ސިނާއަތުގެ ތެރެއިން ގައުމުގެ އިގްތިސާދު ކުރި އެރުވުމުގައި ހިއްސާވާ ބާރުވެރި އަންހެނުންގެ ނެޓްވޯކެއް އުފެއްދުމެވެ.
މީގެ އިތުރަށް އެ މިނިސްޓްރީން ބުނީ މި ޕްރޮގްރާމް ކޮންމެ އަހަރަކުވެސް ދެ ފަހަރު ކުރިއަށް ގެންދާނެ ކަމަށެވެ. އަދި މި ޕްރޮގްރާމު ބިނާ ވާނީ މައިގަނޑު ތިން މަރުހަލާއެއްގެ މައްޗަށް ކަމަށްވެސް މިނިސްޓްރީން ބުންޏެވެ. އެއީ:
ފަތުރުވެރިކަމުގެ ދާއިރާއަށް އަހުލުވެރި ކުރުވުމާއި ހޭލުންތެރިކަން އިތުރުކުރުން
- ފަތުރުވެރިކަމުގެ ދާއިރާއަށް ނުކުތުމަށް މަގު ކޮށައިދިނުން.
- ޕްރޮގްރާމް ފުރިހަމަ ކުރާ ދަރުވަރުންނަށް ސެޓްފިކެޓު ދިނުމާއި، ޕްރޮގްރާމަށް އިތުރު އަންހެން ބައިވެރިން ހޯދާ، ފުރަތަމަ މަރުހަލާ އަލުން ކުރިއަށް ގެންދިއުން
މި ޕްރޮގްރާމް އަމާޒު ކުރަނީ ސެޓްފިކެޓް، ޑިޕްލޮމާ ނުވަތަ ޑިގްރީ ހަދާ އަންހެން ދަރިވަރުންނަށް ކަމަށް ޓޫރިޒަމް މިނިސްޓްރީން ބުންޏެވެ.
މިއަދު އިފްތިތާހު ކުރި މި ޕްރޮގްރާމުގެ ތެރެއިން ފަތުރުވެރިކަމުގެ އެކި ދާއިރާތަކުން ކިޔަވައިދޭނެ ކަމަށް އެ މިނިސްޓްރީން ވަނީ ބުނެފައެވެ.
އެގޮތުން މި ޕްރޮގްރާމުގެ މެންޓަރުންގެ ގޮތުގައި ތިބޭނީ ރިސޯޓު، ގެސްޓްހައުސް އަދި ހޮޓެލް ތަކުގައި މަސައްކަތްކުރާ މީހުން ކަމަށްވެސް އެ މިނިސްޓްރީން ވަނީ ބުނެއެވެ.
އަދި ޕްރޮގްރާމްގެ ބައިވެރިން ޝައުގުވެރިވާ ދާއިރާތައް ދެނެގަތުމަށްފަހު އެ ދާއިރާތަކުން ކުރިއަށް ދިއުމުގެ ފުރުސަތުވެސް މި ޕްރޮގްރާމުން ހޯދައިދޭނެ ކަމަށް އެ މިނިސްޓްރީން ވަނީ ބުނެފައެވެ.
މި ޕްރޮގްރާމުގައި ބައިވެރިވާން ބޭނުންވާ ބައިވެރިންނާއި މެންޓަރުން[email protected]އަށް މެއިލް ކުރުމަށް މިނިސްޓްރީން ވަނީ އެދިފައެވެ.