18 Jan 2024, 14:14
މޯލްޑިވިއަންއިން ޅ. އަތޮޅު މަޑިވަރު އެއާޕޯޓަށް ކުރާ ދަތުރުތަކުގެ ޓިކެޓް ދުރާލާ ނެގުމުން، ޓިކެޓްގެ އަގުހެޔޮކޮށްދޭ ޕްރޮމޯޝަނެއް ފަށައިފިއެވެ.
މޯލްޑިވިއަންއިން މިއަދު ބުނީ މަޑިވަރު އެއާޕޯޓަށް ކުރާ އެއްކޮޅު ދަތުރެއްގެ އަގު އުޅެނީ 1377 ރުފިޔާގައިއެވެ. ނަމަވެސް ޕްރޮމޯޝަނަލް ފެއާގެ ދަށުން މަޑިވަރާއި މާލެއާ ދެމެދު ކުރާ އެއްކޮޅު ދަތުރުގެ އަގަކީ 949 ރުފިޔާ ކަމަށް އެ ކުންފުނިން ބުންޏެވެ.
މޯލްޑިވިއަންއިން ބުނީ އެ ފެއާ ލިބޭނީ އަންނަ ހޮނިހިރު ދުވަހުގެ ފަހުން ދަތުރުކުރާ މީހުންނަށް ކަމަށެވެ. އެގޮތުން ޕްރޮމޯޝަނަލް ފެއާ ލިބޭނީ އޮންލައިންކޮން މޯލްޑިވިއަންގެ މޯބައިލް އެޕް ނުވަތަ ވެބްސައިޓް މެދުވެރިކޮށް ޓިކެޓް ނެގުމުން ކަމަށް ވެސް، އެ ކުންފުނިން ބުންޏެވެ.
އައިލެންޑް އޭވިއޭޝަނުން ހިންގާ ގައުމީ އެއާލައިން މޯލްޑިވިއަންއިން މާލެއިން މަޑިވަރަށް ކުރާ ދަތުރު އޮންނަނީ 18:20ގައެވެ. އަދި މަޑިވަރުން މާލޭއަށް ކުރާ ދަތުުރުތައް އޮންނަނީ 6:10ގައި އާއި 13:10ގައެވެ.
މަޑިވަރުގައި ތަރައްގީކޮށްފައިވާ އެއާޕޯޓް ހުޅުވީ ފެބްރުއަރީ 18، 2022ގައެވެ.
އެ އެއާޕޯޓުގައި އެއާ ޓްރެފިކް ކޮންޓްރޯލް ޓަވަރުގެ އިތުރުން، ޓާމިނަލް އިމާރާތްތަކާއި އެކޮމޮޑޭޝަން ބްލޮކެއް ގާއިމުކޮށްފައި ހުރެއެވެ. އަދި އެ އެއާޕޯޓުގައި ވަނީ 1200 މީޓަރުގެ ރަންވޭއަކާއި، ފްލައިޓް ޕާކު ކުރާނެ ސަރަހައްދެއް ވެސް ގާއިމުކޮށްފައެވެ.