18 Jan 2024, 13:47
ރައްޔިތުންގެ މަޖިލީހުގެ އިންތިޚާބުގައި ވާދަންކުރަން ކުރިމަތިލާ މީހުންނަށް ކުށުގެ ރެކޯޑު ސާފުކޮށްދިނުމުގެ ކަންތައްތައް ފަސޭކޮށްދީފައިވާ ކަމަށް ޕްރޮސެކިއުޓާ ޖެނެރަލް އޮފީސް (ޕީޖީ)އިން ބުނެފިއެވެ.
އެ އޮފީހުން މިއަދު ނެރުނު ބަޔާނެއްގައި ބުނީ، ކުށުގެ ރެކޯޑެއް ނެތް މީހަކުނަމަ، އެމީހަކު ރެކޯޑަށް އެދޭތާ ފަސް މިނިޓު ތެރޭގައި ރެކޯޑު ސާފުކޮށްދޭނެ ކަމަށެވެ. އަދި، ރެކޯޑެއް އޮތްނަމަ، އެއް ދުވަހުގެ ތެރޭގައި ކުށުގެ ރެކޯޑު ސާފުކޮށްދޭނެ ކަމަށް އެ އޮފީހުން ބުންޏެވެ.
މިކަން ކުރިއަށްދާއިރު އިތުރު މައްސަލައެއް ދިމާވެއްޖެނަމަ، އެމައްސަލައެއް ހައްލު ކުރުމަށްފަހު ކުރިއަށް ގެންދާން ހަމަޖެހިފާވާ ކަމަށް ވެސް އެ އޮފީހުން ބުންޏެވެ.
އެކަމާ ގުޅުންހުރި އެއްވެސް ސުވާލެއް އޮތްނަމަ، ޕީޖީ އޮފީހުގެ ނަންބަރު 3000655 އާ ގުޅުމަށް އެ އޮފީހުން ވަނީ އެދިފައެވެ.
ރައްޔިތުންގެ މަޖިލީހުގެ އިންތިޚާބަށް ކުރިމަތިލުމަށް އެދި ހުށަހަޅަންޖެހޭ ތަކެތީގެ ތެރޭގައި ހިމެނޭ ކުށާއި ދަރަނީގެ ރެކޯޑު ފޯމާއި، އިންތިޚާބަށް ޚާއްޞަކޮށްގެން ހުޅުވާ ބޭންކް އެކައުންޓް ހުޅުވުމުގެ ފުރުސަތު މިހާރު ވަނީ ހުޅުވައިލައިފިއެވެ.
ރޯދަމަހުގެ ފުރަތަމަ ހަފުތާ ތެރޭގައި، އަންނަ މާޗު މަހުގެ 17ގައި ބާއްވަން ހަމަޖެހިފައިވާ މަޖިލިސް އިންތިޚާބަށް ވާދަކުރުމުގެ ފުރުސަތު ހުޅުވާލާނީ މި މަހުގެ 30ގައެވެ. އެ ފުރުސަތު އޮންނާނީ އަންނަަ މަހުގެ 14ގެ ނިޔަލަށެވެ.