18 Jan 2024, 13:21
އިސްލާމް އާބާދު (18 ޖަނަވަރީ 2024): ޕާކިސްތާނުގެ އިމުގެ ތެރޭގައި ފިލައި ތިބެގެން އީރާނަށް ހަމަލާދޭ ޖައިޝުލްއަދްލު ނަމަކަށް ކިޔާ ހަނގުރާމަވެރި ޖަމާއަތަށް އީރާނުން ދިން ހަމަލާތަކާ ގުޅިގެން ޕާކިސްތާނުން ވެސް އީރާނުގެ އެތެރޭގައި ހަރަކާތްތެރިވާ ހަނގުރާމަވެރި ޖަމާއަތްތަކަކަށް ހަމަލާތަކެއް ދީފިއެވެ.
ޕާކިސްތާނުގެ ޖާސޫސީ މަސްއޫލުވެރިއަކު ވިދާޅުވި ގޮތުގައި ޕާކިސްތާނުގެ ހަމަލާތައް އަމާޒުކުރީ އީރާނުގެ އިމުގެ ތެރޭގައި ހަރަކާތްތެރިވާ ހަނގުރާމަވެރި ޖަމާއަތްތަކެއްގެ މަރުކަޒުތަކަކަށެވެ. މި ހަމަލާތަކާ ބެހޭ ގޮތުން ޕާކިސްތާނުގެ ޚާރިޖީ ވުޒާރާއިން ބުނެފައިވަނީ މިއީ އީރާނުގެ މިނިވަންކަމާއި ސިޔާދަތަށް ނުރައްކާ ކުރުމުގެ ނިޔަތުގައި ދިން ޙަމަލާތަކެއް ނޫން ކަމަށާއި މިއީ ޕާކިސްތާނަށް ގޯނާކުރާ ހަނގުރާމަވެރި ޖަމާއަތްތަކެއް އީރާނުގައި މަރުކަޒުކޮށްގެން ތިބޭކަން ޖާސޫސީ މައުލޫމާތުގެ އެހީގައި އެނގިގެން އެ ޖަމާއަތްތަކަށް ދިން ޙަމަލާތަކެކެވެ.
ޕާކިސްތާނުން މިހެން ބުނި ނަމަވެސް އެ ގައުމުން އީރާނުގެ ސަރަހައްދީ ރޮނގުގެ އެތެރޭގައިވާ ބައެއް ތަންތަނަށް ހަމަލާދީފައިވަނީ މީގެ ދެ ދުވަސްކުރިން އީރާނުން ޕާކިސްތާނުގެ އެތެރެއަށް ދިން ހަމަލާތަކަށް ބަދަލު ހިފުމުގެ ގޮތުންކަމަށް ވަނީ ބެލެވިފައެވެ.
އީރާނާއި ޕާކިސްތާނުގެ ސަރަހައްދީ ރޮގުގެ ކައިރީގައި އެ ދެ ގައުމަށް ވެސް ޓެރަރިސްޓް ހަމަލާތައް ދޭ ހަނގުރާމަވެރި ކުދި އަދި ހަރުކަށި ޖަމާއަތްތައް އެކި ނަންނަމުގައި ހަރަކާތްތެރިވެއެވެ. މި ޖަމާއަތްތަކުގެ ތެރޭގައި ވަކިވެގަތުމުގެ ރޫހުގައި މަސައްކަތްކުރާ ގައުމީ ޖަމާއަތްތަކާއި ދީނުގެ ނަމުގައި ހަރުކަށި އަދި ތަކްފީރީ ވިސްނުން ގެންގުޅޭ ޖަމާއަތްތައް ހިމެނެއެވެ.
އީރާނާއި ޕާކިސްތާނުގެ ސަރަހައްދީ ރޮނގު ގުޅިފައިވާ ޗިސްތާން ބަލޫޗިސްތާން ސަރަހައްދަކީ މިފަދަ ހަނގުރާމަވެރި ޖަމާއަތްތައް ފިލައިގެން އުޅޭ އަދި ރައްކާތެރިކަން ހޯދައިގެން އުޅޭ ސަރަހައްދެކެވެ.
ޕާކިސްތާނުގެ ސަރަހައްދީ ރޮނގުގައިވާ ބައެއް ސަރަހައްދުތަކަކީ ހަނގުރާމަވެރިންގެ ސަބަބުން އެ ތަންތަނުގެ ކޮންޓްރޯލް ޕާކިސްތާން ސަރުކާރަށް ނޯންނަ ތަންތަނެވެ. އެ ތަންތަނުގައި އީރާނަށް ހަމަލާދޭ "ޖައިޝުލް އަދްލު" އަދި "ޖުންދުﷲ" ފަދަ ޖަމާއަތްތައް ފައިހަރުކޮށްލައިގެން ރައްކާތެރިކަން ހޯދައިގެން ތިބެއެވެ.
އީރާން ބުނާ ގޮތުން ޕާކިސްތާނުގެ ހަމަލާތަކުގައި އީރާނުގެ ތިން އަންހެނަކާއި ހަތަރު ކުޑަކުދިން މަރުވިއެވެ. ޕާކިސްތާން ބުނާގޮތުން މިދިޔަ ހޯމަ ދުވަހު އީރާނުން ޕާކިސްތާނުގެ އެތެރެއަށް ދިން ޙަމަލާތަކުގައި އެ ގައުމުގެ ކުޑަ ދެ ކުދިން މަރުވެ ހަތަރު މީހަކު ޒަޚަމްވިއެވެ.
އީރާނުގެ ހަމަލާތަކާ ގުޅިގެން ޕާކިސްތާނުން އީރާނާ ދެކޮޅަށް ޑިޕްލޮމެޓިކް ފިޔަވަޅުތަކެއް ވެސް އެޅިއެވެ. މީގެ ތެރޭގައި އީރާނުގައި ހުންނަވާ ޕާކިސްތާނުގެ ސަފީރު ވަގުތީގޮތުން އަނބުރައި ގައުމަށް ގެނައުމާއި އީރާނުގެ ހަމަލާތައް ކުށްވެރިކުރުން ހިމެނެއެވެ.
އީރާނުގެ ހަމަލާތަކަށް ފަހު އީރާނާއި ޕާކިސްތާނުގެ ޚާރިޖީ ވަޒީރުން ވަނީ ފޯނުން ގުޅުއްވައި ވާހަކަ ދައްކަވާފައެވެ. މި ވާހަކަތަކުގައި އީރާނުގެ ޚާރިޖީ ވަޒީރު ވަނީ އީރާނުގެ ހަމަލާތައް އަމާޒުކުރީ މީގެ ދެ ހަފުތާ ކުރިން އީރާނުގެ ފުލުހުންގެ މަރުކަޒަކަށް ބޮމުގެ ހަމަލާއެއްދީ 11 މީހުން މަރާލި ޖަމާއަތް ކަމަށްވާ ޖައިޝުލްއަދްލުގެ މަރުކަޒަކަށް ކަމަށާއި އެއީ ޕާކިސްތާނުގެ މިނިވަންކަމަށް އަރައި ގަތުމުގެ ރޫހުގައި ދިން ހަމަލާއެއް ނޫންކަން ޕާކިސްތާނުގެ ޚާރިޖީ ވަޒީރަށް ކަށަވަރު ކޮށްދެއްވައިފައެވެ.
ޕާކިސްތާނާއި އީރާނަކީ ގުޅުންތައް ރަނގަނޅު ދެ ގައުމެވެ. އެ ދެ ގައުމުގެ ދެމެދުގައި ފާހަގަ ކުރެވޭވަރުގެ ބޮޑު މައްސަލައެއް ކައިރި މުސްތަގުބަލެއްގައި ޖެހިފައެއް ނުވެއެވެ.
އެހެންކަމުން ބެލެވެނީ އެއް ގައުމުން އަނެއް ގައުމެއްގެ އެތެރެއަށް ސަރަހައްދީ ރޮނގު ހުރަސްކޮށް ހަމަލާތައްދިނީ އެ ގައުމެއްގެ ސަލާމަތާއި ރައްކާތެރިކަން ކަށަވަރުކޮށް ގައުމީ މަސްލަހަތު އިސްކުރުމުގެ ސިޔާސަތުގެ ދަށުން ކަމުގައެވެ. އެއް ގައުމު އަނެއް ގައުމާ ހަނގުރާމަކޮށް ތަޅާފޮޅުމުގެ ބޭނުމެއްގައި ނޫން ކަމުގައެވެ.