18 Jan 2024, 13:08
މި މަހުގެ 16 ވަނަ ދުވަހުގެ ނިޔަލަށް އެކަނި ވެސް 96,077 ފަތުރުވެރިން ރާއްޖެއަށް ޒިޔާރަތް ކުރިކަމަށް, ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
މިދިޔަ އަހަރުގެ ޖެނަވަރީ މަހުގެ 16 ވަނަ ދުވަހުގެ ނިޔަލަށް ޖުމުލަ 87,178 ފަތުރުވެރިން އައިސްފައިވާއިރު މި އަހަރުގެ އެ މުއްދަތުގައި ރާއްޖެ ޒިޔާރަތްކުރި ފަތުރުވެރިންގެ އަދަދު 10.2 އިންސައްތައިން އިތުރުވެފައިވާ ކަމަށް އެ ތަފާސްހިސާބިތަކުން ދައްކައެވެ.
ދުވާލަކު ރާއްޖެއަށް އެވްރެޖުކޮށް 6,005 ފަތުރުވެރިން ޒިޔާރަތްކުރާ މިނިސްޓްރީގެ ތަފާސްހިސާބުތަކުން ދައްކައެވެ.
އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވަނީ މި މަހުގެ 13ވަނަ ދުވަހުއެވެ. އެ ދުވަހު ރާއްޖެއަށް 7،703 ފަތުރުވެރިން ޒިޔާރަތްކުރިއެވެ.
އަހަރުގެ މިހާތަނަށް ފަތުރުވެރިން ޒިޔާރަތްކުރި މާކެޓުތަކަށް ބަލާއިރު، އެއްވަނައިގައި އޮތީ ރަޝިއާއެވެ. އެގޮތުން، މި މަހު މިހާތަނަށް އެ ގައުމުން 11,778 ފަތުރުވެރިން ވަނީ ޒިޔާރާތްކޮށްފައެވެ. ދެވަނައަށް އެންމެ ގިނަ ފަތުރުވެރިން އައީ އިޓަލީންނެވެ. އެއީ، 11,094 ފަތުރުވެރިންނެވެ.
ތިންވަނައިގައި އިނގިރޭސިވިލާތް އޮތްއިރު އެ ގައުމުން މިހާތަނަށް 7,672 ފަތުރުވެރިން އައިސްފައިވެއެވެ. އަދި، ހަތަރުވަނައިގައި އިންޑިއާ އޮތްއިރު އެ ގައުމުން ވަނީ 7,633 ފަތުރުވެރިން އައިސްފައެވެ.
މީގެ އިތުރުން، ތަފާސްހިސާބުން ދައްކާ ގޮތުގައި ފަތުރުވެރިންނަށް ޚިދުމަތް ދިނުމަށް ރަޖިސްޓްރީ ކޮށްފައިވާ 1,151 ތަނެއްގައި 61,750 އެނދު މިހާރު އެބަ ހިންގައެވެ. އޭގެ ތެރެއިން ބޮޑު އިންސައްތައަކީ ރިސޯޓްތަކުގައި ރަޖިސްޓްރީ ކޮށްފައިވާ އެނދެވެ.
މި އަހަރަށް ސަރުކާރުން އަމާޒު ހިފާފައިވަނީ ދެ މިލިއަން ފަތުރުވެރިން ރާއްޖެ ގެނައުމަށެވެ.