18 Jan 2024, 06:49
ބެލުންތެރިންގެ މެދުގައި ބޮޑު މަޝްހޫރު ކަމެއް ހޯދި އެމެރިކަން ކޮމެޑީ-ޑްރާމާ ސީރީސް "ނެވާ ހޭވް އައި އެވާ"ގެ އެކްޓަރު ސެންދިލް ރާމަމުތްރީ ބޮލީވުޑް ފިލްމަކަށް ސޮއިކޮށްފިއެވެ.
ބަތަލާ ވިދިއާ ބާލަން، އިލިއާނާ ޑި ކްރޫޒް އަދި ޕްރަތީކް ގާނދީ މުހިއްމު ރޯލްއިން ފެންނާނެ މި ފިލްމުގެ ނަމަކީ "ދޯ އޯރް ދޯ ޕިޔާރު"އެވެ.
މި އަހަރުގެ މާޗު މަހު 29ގައި ސިނަމާތަކުގައި ރިލީޒް ކުރުމަށް ތައްޔާރުވަމުން އަންނަ މި ފިލްމަކީ ހެއްވާ މަޖާ ހާދިސާތަކެއް ހިމެނޭ ރޮމޭންޓިކް ކޮމެޑީ ޑްރާމާއެކެވެ. މި ފިލްމަކީ ބެލުންތެރިންގެ ބޮޑު މަގުބޫލު ކަމެއް ލިބުނު ފިލްމު "ބްލެކް" އަދި ވިދްޔާ ބާލަން ލީޑު ރޯލު ކުޅުނު "ތުމާރީ ސުލޫ"ފަދަ ފިލްމުތައް އުފައްދާފައިވާ އެލިޕްސައިސް އަދި އެޕްލޯސް އެންޓަޓެއިންއިން ގެނެސްދޭ ފިލްމެކެވެ. ހެއްވާ މަޖާ ހާދިސާތަކާ އެކު ގެނެސްދޭ މި ފިލްމުގައި ބެލުންތެރިން ހެއްވާލާނެ ގިނަ ހާދިސާތަކެއް އެކުލެވޭއިރު ފިލްމު ބައްޓަންކޮށްފައި ވަނީ މި ޒަމާނުގެ ދިރިއުޅުމުގެ ވައްޓަފާޅިއަށް ފެތޭގޮތަށް ކަމަށް ފިލްމު އުފައްދާ ކުންފުނިން ވަނީ ބުނެފައެވެ.
އެކްޓަރު ސެންދިލް ވެބް ސީރީސް 'ނެވަ ހެވް އައި އެވަ'ގެ މަންޒަރެއްގައި-- ފޮޓޯ/އިންޓަނެޓް
ފިލްމުގެ ޕޯސްޓަރެއް ސޯޝަލް މީޑިއާގައި ހިއްސާ ކުރަމުން އެކްޓަރު ސެންދިލް ބުނެފައި ވަނީ ބަތަލާ ވިދިޔާ ބާލަންއާ އެކު މަސައްކަތް ކުރުމަކީ އަބަދު ވެސް ދުށް ހުވަފެނެއް ކަމަށެވެ. ސެންދިލް އެންމެ ފަހުން އިންޑިއާ ފިލްމެއްގައި މަސައްކަތްކުރީ 2009ވަނަ އަހަރު ކަމަށާއި ފިލްމުގެ މަސައްކަތް ކުރިޔަށްދިޔަ ގޮތާމެދު ވަރަށް ބޮޑަށް ހިތްހަމަޖެހޭ ކަމަށް ސެންދިލް ވަނީ ބުނެފައެވެ.
މި ފިލްމަކީ، އަލަށް ޑައިރެކްޓްކުރުމުގެ ދާއިރާއަށް ނުކުންނަ ޝީރްޝާގެ ފުރަތަމަ ފީޗާ ޑެބިއުވެސް މެއެވެ. ބަތަލާ ވިދިއާ ބާލަން އެންމެ ފަހުން ބެލުންތެރިންނަށް ފެނިފައި ވަނީ މިދިޔަ އަހަރު ރިލީޒްވި ފިލްމު "ނީޔަތު"އިންނެވެ.