18 Jan 2024, 06:44
ފިލްމީ ތަރި ސުޝްމިތާ ސެންގެ އަލަތު ވެބް ސީރީޒް "އާރިޔާ"ގެ ތިންވަނަ ސީޒަންގެ އާ އެޕިސޯޑުތަކެއް އަންނަ މަހުގެ ނުވަވަނަ ދުވަހުން ފެށިގެން ސްޓްރީމް ކުރާނެކަން އިއުލާނުކޮށްފިއެވެ.
މީގެ ކުރިން ދެ ސީޒަން ގެނެސްދީފައިވާ "އާރިޔާ"ގެ ތިންވަނަ ސީޒަން މިދިޔަ އަހަރުގެ ނޮވެމްބަރު މަހު ވަނީ ސްޓްރީމް ކުރަން ފަށައިފައެވެ. ނަމަވެސް ތިންވަނަ ސީޒަންގައި އޭރު ގެނެސްދިނީ އެންމެ ހަތަރު އެޕިސޯޑެވެ.
ކުރިއަށް އޮތް ފެބްރުއަރީ މަހު ތިންވަނަ ސީޒަންގެ އާ އެޕިސޯޑުތަކެއް ގެނެސްދޭން ނިންމާފައިވާއިރު މިއީ މި ސީރީޒްގެ ފަހު ބައި ކަމަށް ބެލެވޭކަމުގައި ރިޕޯޓުތަކުން ވަނީ ބުނެފައެވެ. ސުޝްމިތާ ސެން ބަދަލު ހިފުމުގެ ރޫހެއްގައި މި ފަހަރުގެ ބައިން ވެސް ފެންނާނެއިރު އަލަށް ސްޓްރީމް ކުރެވޭ އެޕިސޯޑުތަކުގެ ކުޑަ ޓީޒާއެއް ވެސް ވަނީ އާއްމުންނަށް ދައްކާލާފައެވެ.
ރާމް މަދްވާނީއާއި ސަންދީޕް މޯދީ ގުޅިގެން ގެނެސްދެމުން އަންނަ "އާރިޔާ" ވެބް ސީރީޒް އަކީ ނެދަލޭންޑްގެ އުފެއްދުމެއް ކަމަށްވާ "ޕެނޯޒާ" ވެބް ސީރީޒް އަސްލަކަށް ބަލައިގެން އުފައްދަމުން އަންނަ ސީރީޒް އެކެވެ.
ބަތަލާ ސުޝްމިތާ ސެން ވެބް ސީރީޒް "އާރިޔާ"ގެ މަންޒަރެއްގައި-- ފޮޓޯ/ޓްރިބިއުން އިންޑިއާ
ސުޝްމިތާ ސެން ޖެހިލުން ކުޑަ އަންހެނެއްގެ ރޯލް ކުޅެފައިވާ މި ވެބް ސީރީޒް ޑިޒްނީ ހޮޓް ސްޓާގައި ދައްކަން ފެށީ 2020ވަނަ އަހަރުއެވެ. އާއިލާއަށް ކުރިމަތިވާ އެކި ނުރައްކާތެރި ހާދިސާތަކުން އާއިލާ މެންބަރުން ސަލާމަތް ކުރުމަށް މަސައްކަތް ކުރާ އަންހެނެއްގެ ރޯލާ އެކު ސުޝްމިތާއަށް ފިލްމު އިންޑަސްޓްރީއިން އިތުރު ފުރުސަތުތައް ވެސް މަގުފަހިވިއެވެ. އޭގެ ތެރޭގައި ސުޝްމިތާގެ ދެވަނަ ވެބް ސީރީޒް "ތާލީ" ހިމެނެއެވެ.
މީގެ ކުރިން ބޮލީވުޑްގެ ފިލްމުތަކުގައި މަސައްކަތް ކޮށްފައިވާ ބަތަލާގެ ނަޒަރުގައި ސްޓްރީމިންގް ޕްލެޓްފޯމްތަކުން ލިބޭ ފުރުސަތާ އެކު ފިލްމީ ކެރިއަރު ކުރިއެރުވުމަށް ވަރަށް ބޮޑަށް އެހީތެރި ވެދެއެވެ.
އޭގެ އިތުރުން ފިލްމުތަކުން ލިބޭ އާމްދަނީއަށް ވުރެ މާ ބޮޑު އާމްދަނީއެއް ސްޓްރީމިންގް ޕްލެޓްފޯމްތަކުގެ އުފެއްދުންތަކުން ފިލްމީ ތަރިންނަށް، ހާއްސަކޮށް ބަތަލާއިންނަށް ލިބޭ ކަމަށް ސުޝްމިތާ ވަނީ ކުރީގެ އިންޓަވިއުއެއްގައި ބުނެފައެވެ.