18 Jan 2024, 08:37
އީރާނުން ޕާކިސްތާނަށް ދިން ހަމަލާއަކީ ޕާކިސްތާނުގެ ހަތިޔާރުއެޅި ޖަމާއަތަކަށް އަމާޒުކޮށް ކަމަށް އީރާނުގެ ހާރިޖީ ވަޒީރު ޙުސައިން ޢާމިރު ޢަބްދުﷲހަޔާން ވިދާޅުވެއްޖެއެވެ.
ޢަބްދުﷲ އެގޮތަށް ވިދާޅުވީ ސްވިޓްޒަލޭންޑުގައި މިހާރު ކުރިއަށްދާ ދުނިޔޭގެ އިގުތިސާދާބެހޭ ފޯރަމްގެ ހަވާސާގައި ވާހަކަފުޅު ދައްކަވަމުންނެވެ.
އީރާނުގެ އިންގިލާބީ ލަޝްކަރުން ދިން އެ ހަމަލާއަކީ ޕާކިސްތާނުގެ ބަލޫޗިސްތާން ޕްރޮވިންސްގައި ހަރަކާތްތެރިވާ ޖައިޝް އަލް އަދްލް ނަމަކަށް ކިޔާ ޖަމާއަތަކަށް އަމާޒުކޮށްދިން ހަމަލާއެއް ކަމަށް ޢަބްދުﷲ ވިދާޅުވިއެވެ.
އެ ގޮތުން އީރާނުން ވަނީ މިސައިލާއި ޑްރޯން ބޭނުންކޮށްގެން އެ ޖަމާއަތުގެ މަރުކަޒުތަކަށް ހަމަލާ ދީފައެވެ. ޖައިޝް އަލް އަދްލުން ވަނީ މީގެ ހަފުތާތަކެއް ކުރިން އީރާނުގެ ފުލުހުންގެ މަރުކަޒަކަށް ހަމަލާދީ 11 މީހުން މަރައިލައިފައެވެ. ޕާކިސްތާނަށް ދިން އެ ހަމަލާއަކީ އޭގެ ބަދަލުގައި ދިން ހަމަލާއެއް ކަމަށް ވެސް ޢަބްދުﷲ ވިދާޅުވިއެވެ. އަދި، އިރާނުން ޕާކިސްތާނުގެ އިސްތިގުލާލާއި ސަރަހައްދީ އެއްބައިވަންތަކަމަށް އިހުތިރާމު ކުރާނެ ކަމަށާއި އެ ގައުމުގެ ސަލާމަތަށް ގެއްލުންވާން ފުރުސަތު ނުދޭނެ ކަމަށް ވެސް ޢަބްދުﷲ ވިދާޅުވިއެވެ.
އީރާނުން ދިން އެ ހަމަލާއާ ގުޅިގެން ޕާކިސްތާނުން ނެރުނު ބަޔާނެއްގައި ބުނެފައިވަނީ އެ ގައުމުގެ ވައިގެ ސަރަހައްދުގެ ހުރުމަތް ކަނޑާލުމަށް ފަހު އީރާނުން ދިން ހަމަލާގައި ދެ ކުޑަކުދިން މަރުވެފައިވާ ކަމަށެވެ. އެ ބަޔާނުގައި ފާހަގަކޮށްފައިވާ ގޮތުން އީރާނުން އެ ހަމަލާ ދީފައިވަނީ އެ ގައުމާ އެކު ރަނގަޅު ގުޅުމެއް އޮއްވައެވެ. އަދި އެ ހަމަލާގެ ފުރިހަމަ ޒިންމާ އީރާނުން އުފުލަން ޖެހޭނެ ކަމަށް ބުނެ ޕާކިސްތާނުން ވަނީ އީރާނުގެ ސަފީރު އެ ގައުމުގެ ޚާރިޖީ ވުޒާރާއަށް ހާޒިރުކޮށްފައެވެ.
ޕާކިސްތާނަށް ހަމަލާދިނުމުގެ ކުރިން އީރާނުން ވަނީ އިރާގާއި ސޫރިޔާއަށް ވެސް ހަމަލާ ދީފައެވެ.