17 Jan 2024, 23:52
ސަރުކާރު ކުންފުނިތަކުގައި ތިބި މުވައްޒަފުން މިހާރު ވަކިކުރަމުން އަންނަނީ އެއްވެސް ހަމައެއް ނެތިކަމަށް ބުނެ، އެ ކަން 'ހަރު އަޑުން' ކުށްވެރިކުރާކަމަށް އިދިކޮޅު އެމްޑީޕީން މިރޭ ބުނެފިއެވެ.
އެމްޑީޕީން ކަންބޮޑުވުން ފާޅުކޮށް މިރޭ ބަޔާނެއް ނެރެފައި މިވަނީ ހއ. ދިއްދޫ ފެނަކައިގައި ކޮންޓްރެކްޓް އުސޫލުން މަސައްކަތް ކުރަމުންދިޔަ 70 މުވައްޒަފުންގެ ކޮންޓްރެކްޓު އާނުކޮށް ވަޒީފާއިން ވަކިކޮށްފައިވަނިކޮށެވެ.
އެ ޕާޓީން ބުނީ ރިޔާސީ ކެމްޕެއިންގެ ތެރޭ، ސަރުކާރުގެ ވަޒީފާއެއްގައި ހުރި އެއްވެސް މުވައްޒަފެއް ވަކި ނުކުރައްވާނެކަމަށް ރައީސް ޑރ. މުޙައްމަދު މުއިއްޒު ވައުދުވެވަޑައިގެންނެވި ކަމަށެވެ.
ނަމަވެސް ސަރުކާރަށް 60 ދުވަސް ނުވަނީސް އެ ވައުދާ ޚިލާފަށް ސަރުކާރުގެ ކުންފުނިތަކުގައި ތިއްބެވި އެތައް ސަތޭކަ މުވައްޒަފުންނެއް ވަކިކުރަމުން އަންނަކަމަށް ވަނީ ތުހުމަތުކޮށްފައެވެ.
އަދި އެއީ ކުރިއަށް އޮތް މަޖިލިސް އިންތިޚާބަށް ނުފޫޒު ފޯރުވަން ކުރާ ކަމެއް ކަމަށް ވެސް ވަނީ ތުހުމަތުކޮށްފައެވެ.
"ރައީސް ޑރ. މުއިއްޒުގެ ސަރުކާރުން މިފަދައިން ނިންމީ ކުރިއަށް އޮތް ރައްޔިތުންގެ މަޖިލީހުގެ އިންތިޚާބަށް ނުފޫޒު ފޯރުވުމަށް ކަމުގައި ދިވެހި ރައްޔިތުންގެ ޑިމޮކްރެޓިކް ޕާޓީން ދެކެމެވެ،" ޕާޓީން ނެރުނު ބަޔާނުގައިވެއެވެ.
އެ ޕާޓީން ބުނީ، ވަކި ސިޔާސީ ޕާޓީއަކަށް ތާއީދުކުރުމަކީ އެއްވެސް ރައްޔިތެއްގެ ވަޒީފާ އަދާކުރުމުގެ ހައްގަށް އެއްވެސް މިންވަރަކަށް ހުރަސްއަޅައި ހައްގުން މަހުރޫމުކުރެވިގެންވާނެ ކަމެއް ނޫންކަމަށެވެ.
އަދި އެ ޕާޓީން ވަނީ ސަރުކާރު ކުންފުނިތަކުގައި ތިބި މުވައްޒަފުންނަށް ވަޒީފާގެ ބިރާއި ވަޒީފާތަކުން ވަކިކުރުން މިހާރުން މިހާރަށް ހުއްޓައިލުމަށް ގޮވައިލައިފައެވެ.
އަދި މިހާތަނަށް ވަޒީފާތަކުން ވަކިކޮށްފައިވާ މީހުންނަށް އެ ވަޒީފާތައް އިއާދަކޮށްދިނުމަށް ގޮވައިލައިފައެވެ.