18 Jan 2024, 09:29
ހައްޖާއި އުމްރާގެ އަޅުކަމަށް އެއްތަނުން އަނެއްތަނަށް މީހުން ގެންދިއުމަށް އެއާ ޓެކްސީތަކެއް (އުދުހޭ ޓެކްސީ) ތައާރަފުކުރަން ސައުދީ އަރަބިއްޔާއިން ނިންމައިފިއެވެ.
ސައުދީ ސަރުކާރުގެ ޕްރެސް އެޖެންސީ (އެސްޕީއޭ) އިން ބުނީ، އައްސޭރިފަށުގެ ސިޓީއެއް ކަމަށްވާ ޖިއްދާގެ ކިންގް އަބްދުލްއަޒީޒް އެއާޕޯޓުން ހައްޖަށް ދާ މީހުން މައްކާގެ ހޮޓާތަކަށް ގެންދިއުމަށް އެއާ ޓެކްސީތައް އޮޕަރޭޓް ކުރުމުގެ ހުއްދަ ކަމާބެހޭ ފަރާތްތަކުން ދޭނެ ކަމަށެވެ. ރިޕޯޓްތައް ބުނާ ގޮތުން އެއާ ޓެކްސީތަކުގެ ފްލައިޓްތަކުގެ ލޮޖިސްޓިކްސް ބަލަހައްޓާނީ ސައުދީގެ ގައުމީ އެއާލައިން ސައުދިއެއާ އިންނެވެ.
އިލެކްޓްރިކް ވާޓިކަލް ޓޭކް އޮފް އެންޑް ލޭންޑިން (އީވީޓީއޯއެލް) މަރުކާގެ އެއާ ޓެކްސީއަކީ ވޮލޮކޮޕްޓާ ކުންފުންޏާއި ސައޫދީގެ ކަމާބެހޭ ފަރާތްތަކުން ފަހަކަށް އައިސް އުފައްދާފައިވާ މަތިންދާ ބޯޓުތަކަކަށް ވާއިރު، މިއީ ހެލިކޮޕްޓަރު ފަދަ ދަތުރުފަތުރާއި މަތިންދާބޯޓުގެ އެހެނިހެން ބާވަތްތަކަށް ވުރެ އަގު ހެޔޮ، މާ ތަފާތު އަދި ތިމާވެއްޓާ ރައްޓެހި ގޮތެއްގައި މަސައްކަތް ކުރާގޮތަށް އުފައްދާފައިވާ އުޅަނދެކެވެ.
ތަރައްގީވަމުން އަންނަ ސައޫދީ މެގަސިޓީ ޕްރޮޖެކްޓް ކަމަށްވާ ނިއޯމްގައި މިދިޔަ އަހަރު އެއާ ޓެކްސީ ޓެސްޓު ކޮށްފައިވާއިރު، ވޮލޮކޮޕްޓާއާ ގުޅިގެން ކައިރި މުސްތަގުބަލެއްގައި އާންމު ދަތުރުފަތުރަށް ވެސް މިފަދަ މަތިންދާބޯޓުތައް ބޭނުންކުރަން ވަނީ ނިންމައިފައެވެ.
ހައްޖާއި އުމްރާގެ އަޅުކަން އަދާކުރުމަށް ދަތުރުފަތުރުގެ އާ ވައްތަރެއް ބޭނުންކުރަން މިދިޔަ އަހަރު ސައުދީ އަރަބިއްޔާގެ ޓްރާންސްޕޯޓް މިނިސްޓަރު ސާލިހް ބިން ނާސިރު އަލް ޖަސީރު އިއުލާން ކުރެއްވި އިރު، ކުރިއަށް އޮތް އަހަރުތަކުގައި އެ ބޭނުމަށް އެއާ ޓެކްސީ ޓެސްޓު ކުރާނެ ކަމަށް ވިދާޅުވި ކަމަށް ވެސް ރިޕޯޓްތައް ބުނެއެވެ.