17 Jan 2024, 21:09
މާލޭ ސިޓީ ކައުންސިލްގެ ދަށުން ހިންގަމުން އައި ބޮޑެތި މަޝްރޫއުތަކެއް ކޮންސްޓްރަކްޝަން އެންޑް އިންފްރާސްޓްރަކްޗަރު މިނިސްޓްރީއަށް ބަދަލުކުރަން މިއަދު އޮތް ކައުންސިލް ބައްދަލުވުމުގައި ސަރުކާރަށް މެޖޯރިޓީ އޮތް ކައުންސިލުން ނިންމުމާއެކު، އެ ކަންކަން ހުއްޓައިލަން މާލޭގެ އިންތިޚާބީ މޭޔަރު އާދަމް އާޒިމް މިރޭ ގޮވައިލައްވައިފިއެވެ.
މިއަދު ބޭއްވި މާލޭ ސިޓީ ކައުންސިލްގެ ހަތަރުވަނަ ދައުރުގެ 130 ވަނަ ޖަލްސާއަށް އޮތީ މަޝްރޫއުތަކާ ގުޅޭ ގޮތުން ހުރި ބައެއް ހުށަހެޅުންތަކާ ގުޅޭ ގޮތުން ގޮތެއް ނިންމުމެވެ.
ކައުންސިލުން ހިންގި މަޝްރޫއުތަކާ ހަވާލުވެގެން އޭރު ހުންނެވި މިހާރު ރައީސް އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ކޯޕަރޭޓް ޑިވެލޮޕްމަންޓް، މުހައްމަދު ޝާހިދު ވަނީ މިއަދުގެ ބައްދަލުވުމުގައި ބައިވެރިވެވަޑައިގެން ބައެއް މަޝްރޫއުތައް އަވަސްކުރަން ކަމާ ގުޅުންހުރި މިނިސްޓްރީއާ ހަވާލުކުރަން ހުށަހަޅުއްވައިފައެވެ.
ސަރުކާރަށް މެޖޯރިޓީ އޮތް ކައުންސިލުން ވަނީ އެ ހުށަހެޅުން އޮތް ގޮތަށް ފާސްކޮށްފައެވެ. ބައްދަލުވުމުގައި ބައިވެރިވި 11 ކައުންސިލަރުންގެ ތެރެއިން 10 ކައުންސިލަރުން ވަނީ އެ ކަމަށް ތާއީދުކުރައްވައިފައެވެ. އެއް ކައުންސިލަރު ވަކި ގޮތަކަށް ވޯޓެއް ނުދެއްވައެވެ.
އެ ކަމާ ގުޅިގެން އާޒިމް މިރޭ ވިދާޅުވީ މާލޭގެ ކަންކަން ކުރިއަށްގެންދަންވީ ގޮތް މާލޭ ރައްޔިތުން ވޯޓުން ބުނެދީފައިވާ ކަމަށެވެ.
އެހެން އޮއްވައި މިވަގުތު ސަރުކާރުގެ އިސް ބޭފުޅުން ނުފޫޒު ފޯރުވައިގެން ނިންމުންތައް ނިންމުން ހުއްޓައިލުމަށް އާޒިމް ވަނީ ގޮވައިލައްވައިފައެވެ.
"...އަދި ގާނޫނު އަސާސީގެ އަށްވަނަ ބާބާއި ލާމަރުކަޒީ ގާނޫނުގައި ކަނޑައަޅައިފައިވާ ގޮތާ ޚިލާފަށް، ރައީސް އޮފީހުގެ ވަޒީރު ބޭފުޅުން ވަންނަވައިގެން ސިޓީ ކައުންސިލުގެ މަސައްކަތްތައް އަތުލައްވަން ކުރައްވާ މަސައްކަތްތައް ހުއްޓައިލެއްވުމަށް ސަރުކާރަށް ގޮވައިލަން،" އާޒިމް ވިދާޅުވިއެވެ.
އެއާއެކު އޭނާވަނީ، މާލޭ މޭޔަރުކަމުގެ މަގަމާ ހަވާލުވަންދެން، މިއަދު، ކައުންސިލުން ނިންމި ނިންމުންތަކަށް އަމަލުކުރުން ފަސްކުރުމަށް އެދިލައްވައިފައެވެ.
މިދިޔަ ހޮނިހިރު ދުވަހު، އާޒިމް ވަނީ މާލޭގެ މޭޔަރުކަމަށް އިންތިޚާބުވެފައެވެ. އާޒިމް ހުވާ ކުރެއްވުން އޮންނާނީ އަންނަ ހޯމަ ދުވަހުއެވެ.
އޭނާ ވަނީ އޭނާގެ ސިޔާސަތަކީ ވެސް ސަރުކާރުގެ ސިޔާސަތުތައް ކަމަށާއި، ސަރުކާރަށް ފުރިހަމަ އެއްބާރުލުން ދެއްވާނެކަމަށް މީގެ ކުރިން ވެސް ތަކުރާރުކޮށް ވިދާޅުވެފައެވެ.