17 Jan 2024, 19:20
ރައްޔިތުންގެ މަޖިލީހުގެ އިންތިޚާބަށް ކުރިމަތިލުމަށް އެދި ހުށަހަޅަންޖެހޭ ތަކެތީގެ ތެރޭގައި ހިމެނޭ ކުށާއި ދަރަނީގެ ރެކޯޑު ފޯމާއި، އިންތިޚާބަށް ހާއްސަކޮށްގެން ހުޅުވާ ބޭންކް އެކައުންޓް ހުޅުވުމުގެ ފުރުސަތު މިހާރު ހުޅުވައިލައިފިއެވެ.
އިލެކްޝަންސް ކޮމިޝަނުން ބުނީ، މަޖިލީހުގެ އިންތިޚާބަށް ކުރިމަތިލުމުގެ ފުރުޞަތު މި މަހުގެ 31 ވަނަ ދުވަހުން ފެށިގެން އަންނަ މަހުގެ 14 ވަނަ ދުވަހުގެ ނިޔަލަށް ހުޅުވައިލާނެ ކަމަށެވެ.
އެހެންކަމުން ކުރިމަތިލުމަށް އެދި ހުށަހަޅަންޖެހޭ ތަކެތީގެ ތެރޭގައި ހިމެނޭ ކުށާއި ދަރަނީގެ ރެކޯޑު ފޯމާއި، އިންތިޚާބަށް ޚާއްސަކޮށްގެން ހުޅުވާ ބޭންކް އެކައުންޓް ހުޅުވުމުގެ ފުރުޞަތު، ކެންޑިޑޭޓުންނަށް ފަސޭހަކުރުމުގެ ގޮތުން، ދުރާލައި ދިނުމަށް އެ ކޮމިޝަނުން ބޭނުންވާ ކަމަށް ވަނީ ބުނެފައެވެ.
އެގޮތުން، ރައްޔިތުންގެ މަޖިލީހުގެ އިންތިޚާބަށް ކުރިމަތިލާން އެދޭ މީހާއާއި އޭނާގެ ރަސްމީ އިންތިޚާބީ އޭޖެންޓްގެ ކުށާއި ދަރަނީގެ ރެކޯޑު ސާފުކުރި ފޯމު ބަލައިގަތުމަށް ކޮމިޝަނުން މިހާރު ނިންމައިފައިވާކަމަށް ވަނީ ބުނެފައެވެ.
އެހެންކަމުން ދަރަނީގެ ރެކޯޑު ދުރާލާ ސާފުކުރުމުގެ ކަންކަން ކުރިޔަށް ގެންދިއުމަށާއި، އިންތިޚާބަށް ޚާއްސަ ބޭންކް އެކައުންޓް ހުޅުވުމުގެ ކަންކަން މިއަދުން ފެށިގެން ކުރިއަށް ގެންދިއުމަށް އެ ކޮމިޝަނުން އެދުނެވެ.
ނަމަވެސް ރަސްމީ އިންތިޚާބީ އޭޖެންޓުގެ މޯލްޑިވްސް ކަރެކްޝަނަލް ސާވިސަސް އިން ދޭ ކުށުގެ ރެކޯޑު ސާފުކުރާކަށް ނުޖެހޭނެ ކަމަށް ބުންޏެވެ.
މި އަހަރު ބާއްވަން ހަމަޖެހިފައިވާ 20ވަނަ ރައްޔިތުންގެ މަޖިލީހުގެ އިންތިޚާބަށް ވާދަކުރުމުގެ ފުރުސަތު މި މަހުގެ 30ގައި ހުޅުވައިލާއިރު އިންތިޚާބު އޮތޯ ރޯދަމަހުގެ ފުރަތަމަ ހަފުތާ ތެރޭގައެވެ.