17 Jan 2024, 17:42
މާލޭގައި ހުރި ރެސްޓޯރެންޓެއްގައި މިއަދު ހަވީރު ގޭސް ފުޅިއެއް ގޮވައި އެކަކަށް ސީރިއަސް އަނިޔާތަކެއް ލިބިއްޖެއެވެ.
މައުލޫމާތު ލިބޭ ގޮތުގައި ގޭސް ފުޅިއެއް ގޮވީ، ހެންވޭރު ކިނބިގަސް މަގުގައި ހުރި އެންޖީބީ ފާސްޓު ފުޑް އައުޓްލެޓުގައެވެ.
ހާދިސާގެ މައުލޫމާތު ހިއްސާކުރަމުން އެމްއެންޑީއެފުން ބުނީ މި ހާދިސާގައި ސީރިއަސް އަނިޔާތަކެއްވެފައިވަނީ އެ ވަގުތު އެ ތަނުގައި ހުރި ލަންކާއަށް ނިސްބަތްވާ ކައްކާއަށް ކަމަށެވެ.
މިހާރު އޭނާއަށް ފަރުވާ ދެމުން އަންނަކަމަށް ވެސް މައުލޫމާތު ލިބެއެވެ. ނަމަވެސް ލިބުނު އަނިޔާގެ ތަފުސީލެއް އަދި ނުދެއެވެ.
މި ކަމާ ގުޅިގެން ފުލުހުން ބުނީ، ހާދިސާގެ ރިޕޯޓު ފުލުހުންނަށް ލިބުނީ މިއަދު ހަވީރު 17:02 ގައި ކަމަށެވެ. މި ހާދިސާގައި އިތުރު ދެ ދިވެހިންނަށް ވެސް އަނިޔާވެފައިވާކަމަށް ފުލުހުން ބުނެއެވެ. އެ މީހުންނަށް ވެސް އަންނަނީ ފަރުވާދެމުން ކަމަށް ފުލުހުން ބުންޏެވެ.
އަދި އެ ހާދިސާ ތަހުގީގުކުރަމުން އަންނަކަމަށް ވެސް ވަނީ ބުނެފައެވެ.
މަންޒަރުތަކުން ފެންނަ ގޮތުން، ގޭސް ފުޅި ގޮވުމުގެ ސަބަބުން އެ ތަނުގެ ބޭރު ބިއްލޫރިގަނޑު ވެސް ވަނީ އެއްކޮށް ތަޅައިގެން ގޮސްފައެވެ.
މި ހާދިސާގައި ގޭސް ފުޅި ގޮވައި، އަލިފާން ރޯވުން ފަދަ އިތުރު ކަމެއް ހިނގައިފައިވާ ކަމުގެ މައުލޫމާތު ލިބިފައެއް ނުވެއެވެެ.
މީގެކުރިން ވެސް މާލޭގެ ރެސްޓޯރެންޓުތަކާއި ގޭގޭގެ ބަދިގޭގައި ވެސް ގޭސް ލީކުވުން ފަދަ ކަންކަން ހިނގައި އަލިފާނުގެ ނުރައްކާތެރި ހާދިސާތައް ހިނގައި، މީހުންނަށް އަނިޔާވެ، ގެއްލުން ލިބިފައި އެބަހުއްޓެވެ.