17 Jan 2024, 22:00
އިސްރާއީލާއި ހަމާސްއާ ދެމެދު ވެފައިވާ އެއްބަސްވުމެއްގެ ދަށުން ހަނގުރާމައިގެ ހާލަތު އޮތް ޣައްޒާއަށް އިންސާނި އެހީ ފޯރުކޮށްދޭން ފަށައިފިއެވެ.
އެ އެހީގެ ތެރޭގައި ހަމާސްގެ ބެލުމުގެ ދަށުގައި ތިބި އަސީރުންނަށް ފޯރުކޮށްދޭ ބޭސް ވެސް ހިމެނެއެވެ. ޣައްޒާއަށް އެހީ ފޯރުކޮށްދީފައި ވަނީ ފަރަންސޭސިވިލާތުން ގަތަރަށް ގެނެސް ގަތަރުން މިސްރަށް އެހީ ގެންގޮސްގެނެވެ.
އިންސާނި އެހީ ފޯރުކޮށްދިނުމަށް ހަމަލާތައް މެދުކަނޑައިލުމަށް އިސްރާއީލާއި ހަމާސްއިން ވެފައިވާ އެއްބަސްވުން މިދިޔަ ޑިސެމްބަރު މަހުގެ އެއްވަނަ ނިމުނުފަހުން އެހީ ފޯރުކޮށްދިނުމަށް އާ އެއްބަސްވުމެއް ހަދައިފައިވާކަން ފަރަންސޭސިވިލާތާއި ގަތަރުން އިއުލާނުކޮށްފައިވަނީ އިއްޔެއެވެ.
އޮކްޓޯބަރު ހަތް ވަނަ ދުވަހު ހަމާސްއިން އިސްރާއީލަށް ދިން ހަމަލާގައި ހަމާސްގެ ބެލުމުގެ ދަށަށް ގެންދިޔަ 240 ވަރަކަށް އަސީރުންގެ ތެރެއިން 100 އަށްވުރެ ގިނަ އަސީރުން މިނިވަންކޮށްފައި ވަނީ ހަފުތާއެއްހައި ދުވަހުގެ މުއްދަތަށް ދެމިގެންދިޔަ ހަނގުރާމަ މެދުކަނޑައިލައިފައިވާ ދުވަސްވަރެވެ.
އަސީރުންގެ ބަދަލުގައި އިސްރާއީލުގެ ޖަލުތަކުގައި ތިބި ފަލަސްތީނުގެ ގިނަ އަދަދެއްގެ ގައިދީންވަނީ މިނިވަންކޮށްފައެވެ.
އެ މުއްދަތަށްފަހު ހަނގުރާމަ ހުއްޓައިލުމަށް ހަމާސްއާއި އިސްރާއިލާއެކު މަޝްވަރާތައް ކުރަން މަސައްކަތްކުރި ނަމަވެސް އެކަން ކާމިޔާބުވެފައެއް ނުވެއެވެ. އަސީރުން މިނިވަންކޮށް، ހަމާސް ނައްތައިލުމަށްފަހު ނޫނީ ހަނގުރާމަ ހުއްޓައިނުލުމަށް އިސްރާއީލުން އަންނަނީ ބުނަމުންނެވެ. އަނެއްކޮޅުން ހަމާސް ބުނަނީ ހަނގުރާމަ ހުއްޓައިނުލަނީސް އަސީރުން ދޫކޮށްނުލާނެ ކަމަށެވެ.