17 Jan 2024, 21:36
އިސްލާމް އާބާދު (17 ޖަނަވަރީ 2024) : އަންނަ މަހު ޕާކިސްތާނުގައި ބޭއްވުމަށް ހަމަޖެހިފައިވާ އާންމު އިންތިޚާބު, ކުރީގެ ބޮޑުވަޒީރު ނަވާޒް ޝަރީފުގެ ޕާޓީއަށް ކާމިޔާބު ކޮށްދިނުމަށް ޓަކައި އެ ގައުމުގެ ސިޔާސީ މަސްރަހަށް ބާރާއި ނުފޫޒު ފޯރުވާ ސިފައިންގެ މުއައްސަސާ އިން ގިނަ ކަންތައްތަކެއް ކުރަމުން ގެންދާކަމަށް ޚަބަރު ލިބިއްޖެއެވެ.
ކޮރަޕްޝަނާއި ޚިޔާނާތުގެ އެތައް ދައުވާއެއް ސާބިތުވެގެން ދިގު މުއްދަތަކަށް ޖަލަށް ލައިފައިވަނިކޮށް ނަވާޒް ޝަރީފު ޖަލުން ސަލާމަތްވެވަޑައިގެން އަލުން އިންތިޚާބުގައި ބައިވެރިވުމުގެ ފުރުސަތު ލިބިވަޑައިގަތީ ވެސް ސިފައިންގެ މުއައްސަސާގެ ނުފޫޒުގެ ސަބަބުންކަމަށް ޕާކިސްތާނުގެ އާންމުންނާ އަދި މަގާމުން ދުރުކޮށްފައިވާ ކުރީގެ ބޮޑުވަޒީރު އިމްރާންޚާންގެ ޕާޓީން ދެކެއެވެ.
ނަވާޒް ޝަރީފުގެ ޕާޓީ މުސްލިމް ލީގް ނަވާޒް އިން އިއްޔެވަނީ ކޭންޕޭން ހަރަކާތްތައް ރަސްމީ ސިފައެއްގައި ފަށައިފައެވެ. އެ ޕާޓީގެ ކެމްޕޭން ފައްޓަވައިދެއްވީ ނަވާޒް ޝަރީފުގެ ދަރިކަނބަލުން އަދި އޭނާއަށްފަހު ޕާޓީ ހިންގުމާ ހަވާލުވެވަޑައިގަންނަވާނެ ކަމަށް ބެލެވިފައިވާ މަރްޔަމް ނަވާޒް ޝަރީފެވެ.
އިމްރާން ޚާން
ކޭންޕޭން ފެއްޓެވުމުގެ ގޮތުން ދެއްކެވި ވާހަކަފުޅުގައި މަރްޔަމްވަނީ ޕާކިސްތާނުގެ އާންމުންނަށް ކުރިމަތިވެފައިވާ ތަކެތީގެ އަގުތައް އުފުލުން އެ ޕާޓީގެ ވެރިކަމެއްގައި ދަށްވެގެންދާނެކަމަށް ވިދާޅުވެ އާންމުންގެ ހިތްތައް އަތުލުމުގެ އުކުޅުތަކެއް ބޭނުންކުރައްވައިފައެވެ.
ނަވާޒް ޝަރީފުގެ ޕާޓީއަކީ ކޮރަޕްޝަނުގައި ހައްދު ފަހަނައަޅައިފައިވާ ޕާޓީއެއްކަން މާކުރީއްސުރެ ހާމަވެފައިވާ ކަމަށާއި ޕާކިސްތާނުގައި ތަކެތީގެ އެންމެ ބޮޑަށް އަގުތައް އުފުލި އިންފްލޭޝަން މައްޗަށް ގޮސްފައިވަނީ ވެސް އެޕާޓީގެ ވެރިކަމުގައި ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.
މުހައްލިލުން ވިދާޅުވާ ގޮތުގައި ޕާކިސްތާނުގެ އަސްކަރިއްޔާއިން ނަވާޒް ޝަރީފްގެ ޕާޓީއަށް ތާއީދުކުރަނީ އެ ޕާޓީ ވެރިކަމަށް އައިސްފިނަމަ ދައުލަތުގެ ގުނަވަންތަކަށް ބާރާއި ނުފޫޒު ފޯރުވުމުގެ ފުރުސަތު ސިފައިންނަށް އިތުރަށް ބޮޑުވެގެން ދާނެތީއެވެ. އާންމު ރައްޔިތުންގެ މަސްލަހަތަށްވުރެ ސިފައިންގެ އިސް ޖެނެރަލުންގެ އަމިއްލަ މަސްލަހަތަށް ސަރުކާރުގެ ކަންކަން ބައްޓަން ކުރުމުގެ ފުރުސަތު އިތުރަށް ފަހިވެގެންދާނެތީއެވެ.
ޚިޔާލު ހޯދުމުގެ ސާވޭތަކުން ހާމަވެފައިވާ ގޮތުގައި ޕާކިސްތާނުގެ އާންމުންގެ ތާއީދު އެންމެ ބޮޑީ އިމްރާން ޚާންގެ ޕާޓީކަމަށްވާ "ޕާކިސްތާން ތަހްރީކޭ އިންސާފު" ޕާޓީ (ޕީޓީއައި) އަށެވެ. ނަމަވެސް މި ޕާޓީ ވެރިކަމަށް އަތުވެއްޖެނަމަ ސިފައިންގެ އިސް ޖެނެރަލުން އެދޭހާގޮތަކަށް ކަންކަން ބައްޓަން ކުރަން ފަސޭހައެއް ނުވާނެއެވެ.
ދެހާސް ބާވީސްވަނަ އަހަރު ޕާކިސްތާނުގެ ޕާލަމެންޓުގައި އިތުބާރު ނެތްކަމުގެ ވޯޓެއް ނަގައިގެން އިމްރާންޚާން ބޮޑުވަޒީރުކަމުން ދުރުކުރުމުގެ ފަހަތުގައި އޮތީ ވެސް ޕާކިސްތާނުގެ ސިފައިންގެ މުއައްސަސާއެވެ. އިމްރާން ޚާންވަނީ ސިފައިން ޕާކިސްތާނުގެ ސިޔާސީ މަސްރަހަށް އަތްބާނާ ބޭނުމަށް ފާޅުކަން ބޮޑުގޮތެއްގައި ފާޑު ވިދާޅުވެފައެވެ.
އޭނާގެ ވެރިކަމުގައި ސިފައިންނާ ސަރުކާރާ ޖެހުނު މައިގަނޑު މައްސަލައަކީ ވެސް ސިފައިންގެ އިސް އޮފިސަރުންގެ އެދުންތަކަށް އިމްރާން ޚާން ދީލައި ނުލެއްވުމެވެ. އެއާއެކު ޕާކިސްތާނުގެ ސިފައިންގެ މުއައްސަސާ އާއި އިމްރާން ޚާންގެ ޕާޓީއާ ދެމެދު މިހާރުވަނީ ސިޔާސީ ހަތުރުވެރިކަމެއް އުފެދިފައެވެ.
އިމްޜާންޚާން ވެރިކަމުން ދުރުކުރުމަށް ޓަކައި ޕާލަމެންޓްގައި އިތުބާރުގެ ވޯޓު ނެގީ ނަވާޒް ޝަރީފުގެ ޕާޓީއާ އަދި ކުރީގެ ބޮޑޫވަޒީރު ބޭނަޒީރު ބުއްޓޫގެ ޕާޓީކަމަށްވާ "ޕާކިސްތާން ޕީޕްލްސް ޕާޓީ" (ޕީޕީޕީ) ގުޅިގެން އެޕާޓީއަށް ނިސްބަތްވާ ޕާލަމެންޓްގެ ބައެއް މެންބަރުން "ގަނެލައިގެން" ކަމަށާ މިކަމުގެ ފަހަތުގައި ވެސްވަނީ ސިފައިންކަމަށް ރިޕޯޓްތައް ބުނެއެވެ.
ޕާކިސްތާނުގެ ސްޕްރީމް ކޯޓުން މިދިޔަ އާދީއްތަ ދުވަހުވަނީ އަންނަ ފެބްރުއަރިމަހުގެ އަށްވަނަ ދުވަހު ބޭއްވުމަށް ހަމަޖެހިފައިވާ އާންމު އިންތިޚާބުގައި އިމްރާން ޚާންގެ ޕާޓީން ބޭނުންކުރަން ނިންމައިފައިވާ ކްރިކެޓް ބެޓްގެ ނިޝާން ބޭނުން ކުރުން ވެސް އެ ޕާޓީއަށް މަނާކުރުމުގެ އަމުރެއް ނެރެފައެވެ.
މިއީ ވެސް ޕާކިސްތާނުގެ އާންމު އިންތިޚާބުގައި އިމްރާން ޚާންގެ ޕާޓީ ކުރިހޯދަފާނެތީ ސިފައިންގެ ނުފޫޒުގައި ކުރިކަމެއްކަމަށް އެ ޕާޓީގެ ވެރިންނާއި ސަޕޯޓަރުން ދެކެއެވެ.
ޕާކިސްތާނަކީ 40 އިންސައްތަ މީހުން ލިޔަންކިޔަން ނުދަން ގައުމަކަށްވާއިރު ވޯޓު ކަރުދާސްކޮޅުގައި މި ފާހަގަ ނެތްނަމަ އިމްރާން ޚާންގެ ޕާޓީއަށް ތާއީދުކުރާ ޕާކިސްތާނުގެ ގިނަ ބަޔަކަށް އެ ޕާޓީގެ ކެންޑިޑޭޓުންނަކީ ކޮން ބައެއްކަން ދެނެގަތުން ވަރަށް ބޮޑަށް ދަތިވެގެންދާނެއެވެ. ޕާޓީގެ ކެންޑިޑޭޓުންގެ ނަމުން އެމީހުން ވަކިކުރާކަށް ލިޔަންކިޔަން ނުދަންނަ މީހުންނަކަށް ނޭންގޭނެއެވެ.
އެހެންކަމުން މިއީ އިމްރާން ޚާންގެ ޕާޓީގެ ކާމިޔާބަށް ހުރަސްއަޅައި ސިފައިންގެ ތާއީދުއޮތް ނަވާޒް ޝަރީފުގެ ޕާޓީއަށް ކާމިޔާބުގެ ފުރުސަތު ފަހިކޮށްދިނުމަށް ކުރިކަމެއްގެ ގޮތުގައި އިމްރާން ޚާންގެ ސަޕޯޓަރުންނާއި އެ ޕާޓީގެ ލީޑަރުން ގެންދަނީ ސިފަކުރަމުންނެވެ. ސިފައިންވަނީ އިންތިޚާބަށް ނުފޫޒު ފޯރުވާކަމަށް ކުރެވޭ ތުހުމަތުތަކަށް އިންކާރު ކުރަމުންނެވެ.