17 Jan 2024, 07:19
ބޮލީވުޑްގެ ފިލްމުތަކުން ދެހާހުގެ އަހަރު ތަކުގައި މަގުބޫލުވި ފިލްމީ ތަރި ވިވެކް އޮބްރޯއި ބޭނުން ވަނީ ޑައިރެކްޓަރު ސަންދީޕް ރެއްޑީއާ އެކު މަސައްކަތް ކުރުމަށް ކަމަށް ބުނެފިއެވެ.
ފިލްމު "އެނިމަލް"ގެ ޑައިރެކްޓަރު ސަންދީޕް އަކީ ހީވެސް ނުކުރާ ކަހަލަ ހިޔާލުތަކެއްގެ މައްޗަށް ފިލްމު އުފައްދާ ފަރާތެއް ކަމަށާއި ކޮންމެ ވެސް ދުވަހަކުން އާދަޔާ ހިލާފު ޑައިރެކްޓަރާ އެކު މަސައްކަތް ކުރުމަކީ ވިވެކްގެ ހުވަފެނެއް ކަމަށް ވަނީ ބުނެފައެވެ.
ފިލްމު "އެނިމަލް"ގެ ކޮންސެޕްޓަށް ތައުރީފުކޮށް ވިވެކް ވާހަކަ ދައްކާފައިވާއިރު މި ފިލްމުގެ މުހިއްމު ރޯލުތަކުން ވިވެކްގެ ބައްޕަ އަދި ކުރީގެ އެކްޓަރު ސުރޭޝް އޮބްރޯއި ވަނީ ފެނިފައެވެ. ވިވެކް ބުނެފައިވަނީ ސަންދީޕްގެ ފިލްމު ތަކުން 2002ވަނަ އަހަރު ޑައިރެކްޓްރު ރާމް ގޯޕާލް ވަރުމާ އުފެއްދި ގޭންގް ސްޓާ ފިލްމު "ކޮމްޕެނީ"ގެ ހަނދާންތައް އާ ކުރުވާ ކަމަށެވެ. ފިލްމު "އެނިމަލް"ގައި އަންހެނުންނަށް އިހާނެތިކޮށް އަމަލު ކުރާ މަންޒަރު ހިމަނާފައިވާތީ ކްރިޓިކުން ވެސް ފާޑު ކިޔާފައިވާއިރު އާއްމުންގެ ފަރާތުން ވެސް ކޮންމެ ވެސް ވަރަކަށް ނުރުހުން އަމާޒުވިއެވެ. އެހެންނަމަވެސް މި ފިލްމު ވެފައިވަނީ މިދިޔަ އަހަރު ރިލީޒްކުރި ފިލްމުތަކުގެ ތެރެއިން ވިޔަފާރީގެ ގޮތުން ބޮޑެތި ރިކޯޑުތައް މުގުރާލީ ފިލްމަކަށެވެ.
ފިލްމީ ތަރި ވިވެކް އޮބްރޯއި ބައްޕަ ސުރޭޝް އޮބްރޯއި އާއެކު-- ފޮޓޯ/ ބޮލީވުޑް ހަންގާމާ
މި މަހުގެ 19ވަނަ ދުވަހު އެމޭޒަން ޕްރައިމްގައި ރިލީޒް ކުރުމަށް ތައްޔާރުވަމުން އަންނަ ވެބް ސީރީސް "އިންޑިއަން ޕޮލިސް ފޯސް"ގެ އެކްޓަރު ބުނެފައި ވަނީ ޑައިރެކްޓަރު ސަންދީޕު ރެއްޑީގެ ހުށަހެޅުމެއް ލިބޭ ދުވަހަކުން އެކަމަށް އިންކާރު ނުކުރާނެ ކަމަށާއި އެ ދުވަހެއްގެ އިންތިޒާރުގައި ހުރި ކަމަށެވެ.
ފިލްމު "އެނިމަލް"ގައި ވިވެކްގެ ބައްޕަ ސުރޭޝް ހޭދަކުރި ދުވަސްތަކަކީ އުފާވެރި ދުވަސްތަކެއް ކަމަށާއި ސުރޭޝްއަށް ފިލްމުގެ ކްރޫއިންގެ ފަރާތުން ދިން އެއްބާރުލުމަށް ވިވެކް ވަނީ ޝުކުރު އަދާކޮށްފައެވެ.