17 Jan 2024, 07:23
ޑައިރެކްޓަރު ވިނޯދު ޗޯޕްރާގެ ފިލްމު "12 ތު ފެއިލް"އަކީ މިހާތަނަށް އާލިއާ ބެލި އެންމެ ރީތި ފިލްމުތަކުގެ ތެރެއިން ފިލްމެއް ކަމަށް ބަތަލާ ބުނެފިއެވެ.
ފިލްމު އިންޑަސްޓްރީގައި ވަރަށް ތަފާތު ހުށަހެޅުންތަކާ އެކު އާއްމުންގެ މަގުބޫލުކަން ހޯދަމުން އަންނަ އެކްޓަރު ވިކްރާންތު މެސީ ފިލްމުގައި ދައްކާފައިވާ ހުށަހެޅުން ވަރަށް ކަމުދާ ކަމަށް އާލިއާ ވަނީ ބުނެފައެވެ.
ފިލްމު "ހަސީން ދިލްރުބާ"، "ލަވް ހޮސްޓެލް" އަދި "ގޭސް ލައިޓް"ފަދަ ފިލްމުތައް ކުޅެފައިވާ ވިކްރާންތަކީ ފިލްމުތަކުގެ އިތުރުން ވަރަށް ގިނަ ވެބް ސީރީސްތައް ވެސް ކުޅެމުން އަންނަ އެކްޓަރެކެވެ. ޑައިރެކްޓަރު ވިނޯދު ޗޯޕްރާގެ އަމިއްލަ ފިލްމު ކުންފުނި ވިނޯދު ޗޯޕްރާ ފިލްމްސްއިން ތައްޔާރުކުރި "12ތު ފެއިލް"އަކީ ބައޮގްރެފިކަލް ޑްރާމާ ފިލްމެކެވެ.
ފިލްމު ބެލުމަށްފަހު އިންސްޓަގްރާމް މެދުވެރިކޮށް އާލިއާ ކުރި ޕޯސްޓެއްގައި ބުނެފައިވަނީ އެކްޓަރު ވިކްރާންތު ފިލްމުގައި ދައްކުވައިދިން ރޯލު ވަރަށް ފުރިހަމަ ކަމުގައެވެ. މި ފިލްމުގައި އާއްމުކޮށް އިންޑިއާގެ ފިލްމުތަކުން ނުފެންނަ ތަފާތު ވާހަކައެއް ކިޔައިދީފައިވާ ކަމަށާއި މިފަދަ ވާހަކަތައް ސިނަމާއަށް ތައާރަފު ކުރުމަށް މިއީ ލިބުނު ހިތްވަރެއް ކަމުގައެވެ.
ފިލްމު"th12 ފެއިލް"ގެ މަންޒަރެއް-- ފޮޓޯ/ އިންޓަނެޓް
އާލިއާ ބަޓްގެ ކުރިން ބަތަލާ ކެޓްރީނާ ކައިފް، ވިޖޭ ދެވަރަ ކޮންޑާ އަދި ރިތިކް ރޯޝަން ވެސް ވަނީ ފިލްމު "12ތު ފެއިލް" ބެލުމަށްފަހު ފިލްމުގެ ޕްރޮޑަކްޝަން ޓީމަށާއި ކާސްޓުންނަށް ވަރަށް ބޮޑަށް ތައުރީފު ކޮށްފައެވެ.
އާއްމު ދިރިއުޅުމުގައި ދިމާވާ ހަގީގީ ގިނަ ހާދިސާތަކެއް ކިޔައިދީފައިވާ މި ފިލްމަކީ އިންޑިއާގެ ޔޫނިއަން ޕަބްލިކް ސާވިސް ކޮމިޝަން (ޔޫޕީއެސްސީ)ގެ އެންޓްރެންސް އިމްތިހާނަށް ތައްޔާރުވެ އެ އިމްތިހާނުގައި ބައިވެރިވާ އެތައް މިލިއަން ދަރިވަރުން ތަހައްމަލު ކުރާ ހިތްދަތި ދަނޑިވަޅުތައް ބެލުންތެރިންނާ ހަމައަށް ގެނެސްދީފައިވާ ފިލްމެކެވެ.