16 Jan 2024, 21:49
ސަރުކާރުގެ މުއައްސަސާތަކުގެ ޚިދުމަތްތައް އާއްމުންނަށް ލިބޭގޮތަށް ތައްޔާރުކޮށްފައިވާ ވަންގަވް ވިއުގަ މެދުވެރިކޮށް، ލޭންޑް ޔޫޒް ޕްލޭންތައް ފާސްކުރުމަށް ހުށަހެޅޭނެ ގޮތް މިހާރު ހަމަޖައްސައިފައިވާ ކަމަށް ލޭންޑް އެންޑް އާބަން ޑިވެލޮޕްމެންޓް މިނިސްޓްރީން މިއަދު ބުނެފިއެވެ.
އެ ޚިދުމަތް ރަސްމީކޮށް ލޯންޗުކޮށްދެއްވީ މިނިސްޓްރީގެ ސްޓޭޓް މިނިސްޓަރު، މުހައްމަދު ދިލްޝާން އަބްދުﷲ އެވެ.
އެ މިނިސްޓްރީން ނެރުނު ނޫސް ބަޔާނެއްގައި ބުނީ ލޭންޑް ޔޫޒް ޕްލޭން ފާސްކުރުމުގެ ޚިދުމަތް ފަސޭހަކަމާއެކު ފޯރުކޮށްދިނުމަށް، ޓްރޭޑް ނެޓު މޯލްޑިވްސް ކޯޕަރޭޝަން ލިމިޓެޑާއި ހައުސިން މިނިސްޓްރީ ގުޅިގެން އެ ޕްލެޓުފޯމު މެދުވެރިކޮށް ލޭންޑް ޔޫސް ޕްލޭން ހުށަހެޅުމަށާއި އެ ޕްލޭނަށް ބަދަލުގެނައުމުގެ އިންތިޒާމު ހަމަޖައްސައިފައިވާ ކަމަށެވެ.
އެ ޚިދުމަތަށް އެދި ހުށަހަޅާނީ ވަންގަވްގެ ވެބްސައިޓަށް ވަދެ، އީފާހަށް ލޮގިން ވުމަށް ފަހު ކަމަށް އެ މިނިސްޓްރީން ބުންޏެވެ.
ވަން ގަވް މެދުވެރިކޮށް ސަރުކާރުގެ ލޭންޑް ޔޫޒް ޕްލޭންފާސްކުރެވޭނެ ގޮތް ހަމަޖެއްސުމަށް ބޭއްވި ރަސްމިއްޔާތުގެ ތެރެއިން-- ފޮޓޯ: ހައުސިން މިނިސްޓްރީ
އެ ޚިދުމަތް ހޯދުމާ ގުޅުން ހުރި މަޢުލޫމާތު ނުވަތަ އެހީތެރިކަމެއް ބޭނުންވެއްޖެ ހިނދެއްގައި "ވަންގަވް" ސަޕޯޓް ސެންޓަރު ނަންބަރު 1500އަށް ނުވަތަ މިނިސްޓްރީގެ ނަންބަރު 4004946، 4004950 އަދި 4004947 އަށް ގުޅުމުން މައުލޫމާތު ލިބޭނެ ކަމަށް މިނިސްޓްރީން ބުންޏެވެ.
ރާއްޖޭގެ ރަށްރަށުގެ ބިން ބޭނުންކޮށް، ތަރައްގީކުރާނެ ގޮތް ކަނޑައަޅައި ކައުންސިލްތަކުން އެކުލަވާލާ ލޭންޑް ޔޫޒް ޕްލޭންތައް ފާސްނުވެ، ގިނަ ދުވަސް ނެގުމަކީ ކައުންސިލްތަކުން ބައެއް ފަހަރު ކުރާ ޝަކުވާއެކެވެ.