16 Jan 2024, 16:29
މެދުއިރުމަތީގައި ބާއްވާ ފަތުރުވެރިކަމުގެ އެންމެ ބޮޑު ފެއާ، އަރަބިއަން ޓްރެވަލް މާކެޓު (އޭޓީއެމް)ގައި ދިވެހިރާއްޖެ އިޝްތިހާރުކުރުމުގައި ބައިވެރިމުގެ ފުރުސަތު، ފަތުރުވެރިކަމާ ގުޅޭ ކުންފުނިތަކަށް ހުޅުވާލައިފިއެވެ.
މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ)ން މިއަދު ނެރުނު ބަޔާނެއްގައި ބުނެފައިވާ ގޮތުން، މި ފެއާ އޮންނާނީ މެއި މަހުގެ ހަވަނަ ދުވަހުން ފެށިގެން އަށްވަނަ ދުވަހުގެ ނިޔަލަށް، ދުބާއީގެ ވާލްޑް ޓްރޭޑް ސެންޓަރުގައެވެ.
އޭޓީއެމް ފެއާގައި ރާއްޖެ އިޝްތިހާރުކުރަން ބައިވެރިވާން ބޭނުންވާ ކުންފުނިތައް، އަންނަ ހަފުތާގެ އަންގާރަ ދުވަހުގެ 12:00 ގެ ކުރިން މިގޫގުލް ފޯމުފުރުމަށް އެމްއެމްޕީއާރުސީން އެދެއެވެ.
މި ފެއާ ބާއްވާތާ މި އަހަަރަށް 30 އަހަރު ފުރޭއިރު، މީގެ ކުރިން ވެސް އެމްއެމްޕިއާރުސީން ވަނީ ރާއްޖޭގެ އެކި ކުންފުނިތަކާ އެކީ އޭޓީއެމް ފެއާގައި ބައިވެރިވެ، މެދު އިރުމަތީގައި ރާއްޖެ ޕްރޮމޯޓުކޮށްފައެވެ.
މެދު އިރުމަތީގެ ފަތުރުވެރިންނަކީ ރާއްޖެއަށް ޒިޔާރަތްކުރާ ފަތުރުވެރިންގެ ބޮޑު ބައެއް ހިއްސާ ކުރާ ބައެކެވެ.