16 Jan 2024, 13:17
އެމްޓީސީސީ ދެފަޅިކޮށްފައި އިތުރު ކުންފުންޏެއް އުފެއްދުމަކީ އެމްޓީސީސީއަށް ހީނަރުކަން ލިބޭނެ ކަމެއް ކަމަށާއި މިހާރު އެއޮތް އެމްޓީސީސީގައި ބޮޑެތި މަޝްރޫއުތައް ހިންގަން ބޭނުންވާ ގާބިލުކަން އެބަހުރި ކަމަށް އެ ކުންފުނީގެ ސީއީއޯކަން މިދިޔަ ދައުރުގައި ކުރެއްވި މިހާރު މާލޭގެ އިންތިޚާބީ މޭޔަރު އާދަމް އާޒިމް މިއަދު ވިދާޅުވެއްޖެއެވެ.
އެމްޓީސީސީއަށް ބާރުބޮޑުވާތީ، އާ ކުންފުންޏެއް އުފައްދަން ވަޒީރުންގެ މަޖިލީހުން އާދިއްތަ ދުވަހު ވަނީ ނިންމައިފައެވެ.
އެ ނިންމުމަށް ފާޑު ވިދާޅުވެ، "ސަން"އަށް މިއަދު ދެއްވި ހާއްސަ އިންޓަވިއުއެއްގައި އިންތިޚާބީ މޭޔަރު އާޒިމް ވިދާޅުވީ، އެމްޓީސީސީއަށް ނުކަތާ ވަރު ވެގެންނޭ ކިޔާފައި ދެފަޅި ކުރަން ޖެހޭ އެއްވެސް ސަބަބެއް ނެތް ކަމަށާއި އެ ގޮތަށް އަމަލުކޮށްފި ނަމަ، އެމްޓީސީސީ ހީނަރުވެ، އެ ކުންފުނީގެ ގާބިލުކަން ދަށްވާނެ ކަމަށެވެ.
"ހަމަ އެ އެމްޓީސީސީ އަޅުގަނޑަށް ވެސް ހަވާލުކުރީ. މިހާރު އެ ތަން ނުކަތާ ވަރަށް މަސައްކަތް ހުރެގެންނޭ ކިޔާފައި، އެ ތަން ދެފަޅިއަށް ފަޅާލަން އުޅެނީ. އަޅުގަނޑު އަދިވެސް ނުދެކެން އެތަން ފަޅަން ޖެހޭ ސަބަބެއް. އަޅުގަނޑު ދެކޭ ގޮތުގައި އެތަން ބޮޑުކުރަންވީ،" ކުންފުނިތައް ހިންގުމުގެ ދާއިރާއިން 30 އަހަރުގެ ތަޖުރިބާ ހުންނެވި އާޒިމް ވިދާޅުވިއެވެ.
އޭނާ ވިދާޅުވީ، ބުރިޖުތައް ފަދަ ބޮޑެތި މަޝްރޫއުތައް ކުރިއަށް ގެންދެވޭ ވަރުގެ ބިޔަ ކުންފުންޏަކަށް އެމްޓީސީސީ ހެދޭނީ އެ ކުންފުންޏަށް އިތުރަށް އިންވެސްޓްކޮށް، ބޮޑުކޮށްގެން ކަމަށެވެ. އޭގެ ބަދަލުގައި، އެ ކުންފުނި ދެފަޅި ކޮށްފި ނަމަ، އަނެއްކާ ވެސް ބޮޑެތި މަޝްރޫއުތައް ހިންގަން ޖެހޭނީ ބޭރު ކުންފުނިތަކަށް ފައިސާ ދީގެން ކަމަށް އޭނާ ވިދާޅުވިއެވެ.
"އެތަން ފަޅާ ކުދިކުދި ކޮށްލީމަކާ، އަޅުގަނޑުމެން ބޭނުންވި ވަރުގަދަ ކުންފުނި ރާއްޖޭގައި ނުއުފެދޭނެ. އެ ތަން ކުޑަވެ، ހަނިވެ، އެ ތަނަކީ ނިކަމެތި ތަނަކަށް ބަދަލުވާން އެ ދަނީ،" އާޒިމް ވިދާޅުވިއެވެ.
"އެމްޓީސީސީ ވަރުގަދަކުރަންވީ. އެމްޓީސީސީގައި ތިބި މުވައްޒަފުންނަކީ ވަރުގަދަ ބައެކޭ، ވަރުގަދަ ޓީމެއް ވެސް އޮންނާނޭ. ވަރުގަދަ އިކުއިޕްމަންޓު ވެސް އެބަހުރި. ހަމައެކަނި ބޭނުންވަނީ ރަނގަޅު ލީޑާޝިޕެއް. ސަރުކާރުން އެކަމާ ވިސްނަންވީ،"
އޭނާ ވިދާޅުވީ، އެމްޓީސީސީގައި މިހާރު ތިބޭނީ ގާބިލު މުވައްޒަފުން ކަމަށާއި ބޮޑެތި މަޝްރޫއުތައް ހިންގަން ބޭނުންވާ އިކުއިޕްމަންޓާއި މުވައްޒަފުން ވެސް އެ ކުންފުނީގައި ތިބޭނެ ކަމަށެވެ.
އެކަމަކު، އެ ކުންފުނި އިތުރަށް ފުޅާކުރުމުގެ ބަދަލުގައި އެ ކުންފުނި ދެފަޅި ކޮށްފައި އިތުރު ކުންފުންޏެއް އުފައްދައިފި ނަމަ އެމްޓީސީސީ ހީނަރުވެ، ބޮޑެތި މަޝްރޫއުތައް ބޭރުގެ ކުންފިނިތަކަށް ދޭން މަޖުބޫރުވާނެ ކަމަށް އާޒިމް ގަބޫލުކުރައްވައެވެ. އޭނާ ވިދާޅުވީ، 'ގައުމިއްޔަތަކީ' އެއީ ނޫން ކަމަށެވެ.
އާޒިމް، އެމްޓީސީސީގެ ސީއީއޯއަކަށް ހުންނެވިއިރު: އޭނާ ވަނީ އިތުރު ކުންފުންޏެއް އުފައްދާތީ ނުރުހުން ފާޅުކުރައްވާފައި -- ސަން ފޮޓޯ/ ނާއިލް ހުސައިން
"އަޅުގަނޑުމެން އެމްޓީސީސީގައި ކުރީ ބޭރު މީހުން ކުރި މަސައްކަތް. މިއަދު އެދާ ޑައިރެކްޝަންގެ ސަބަބުން ދެން އެ ބުނާ މަސައްކަތްތައް ކުރާނީ ބޭރު މީހުން އަނެއްކާ ވެސް،" އާޒިމް ވިދާޅުވިއެވެ.
"ގައުމުގައި އަޅުގަނޑުމެން މަސައްކަތްކޮށްގެން 150، 200 އެއްހާ މިލިއަން ޑޮލަރު ހިފަހައްޓަދީފައި ހުންނާނެ. ބޭރު މީހުން ކުރި މަސައްކަތް އަޅުގަނޑުމެން ކުރީމާ. އެއީ ގައުމިއްޔަތަކީ. އެއީ ގައުމު ދެކެ ލޯބިވުމަކީ،"
އާޒިމް ވިދާޅުވީ، ސަރުކާރުގެ ސިޔާސަތު ބައްޓަން ކުރަންވާނީ ގައުމުގައި ފައިސާ ދެމެހެއްޓޭނެ ގޮތަކަށް ކަމަށެވެ. ބޮޑެތި މަޝްރޫއުތައް ބޭރުގެ ކުންފުނިތަކަށް ދޭން ވެއްޖެ ނަމަ، ދައުލަތުގެ ފައިސާއިން ބޮޑެތި އަދަދުތައް ބޭރަށް ދާނެ ކަމަށް އޭނާ ވިދާޅުވިއެވެ.
"އަޅުގަނޑު ދެކޭ ގޮތުގައި އެމްޓީސީސީ ދެފަޅި ކޮށްލާ ހިސާބަކަށް އަދި ނުދޭ. އަދި ގާތް ވެސް ނުވޭ، ގާތް ވެސް ނުވޭ،" އޭނާ ވިދާޅުވިއެވެ.
ސަރުކާރުން ބުނީ، އެމްޓީސީސީގައި މިހާރު ވެސް 100 އެތައް މަޝްރޫއެއް ފުނިޖެހިފައި ހުރި ކަމަށެވެ. އެހެންވެ، އެ ކުންފުންޏަށް ނުކަތާ ވަރަށް މަޝްރޫއުތައް ގިނަވުމުގެ ސަބަބުން އިތުރު ކުންފުންޏެއް އުފައްދަން ނިންމީ ކަމަށެވެ.
އެކަމަކު، އުފައްދަން ނިންމި އާ ކުންފުންޏާ ބެހޭ އިތުރު އެއްވެސް ތަފުސީލެއް މިހާތަނަށް ސަރުކާރުން ހާމަކޮށްފައެއް ނުވެއެވެ.