16 Jan 2024, 09:33
ނުރައްކާތެރި އެކްސިޑެންޓުތައް ހިނގާ މިންވަރު މަދުކުރުމަށް ޓަކައި މިހާރަށް އެޅެން އޮތް އެންމެ މުހިންމު އެއް ފިޔަވަޅަކީ ލައިސަންސް ދޫކުރާ ނިޒާމު އަލުން މުރާޖާކޮށް، މިހާރަށްވުރެ ހަރުކަށިކުރުން ކަމަށް ފުލުސް ކޮމިޝަނަރު އަލީ ޝުޖާއު ވިދާޅުވެއްޖެއެވެ.
ނުރައްކާތެރި އެކްސިޑެންޓުތައް އެންމެ ގިނައީ މާލޭ ސަރަހައްދުގައެެވެ. އެ އެކްސިޑެންޓުތައް ހުއްޓުވުމަށް ޓަކައި ފުލުހުން ގިނަ މަސައްކަތްތަކެއް ކުރާ ކަމަށް ބުނެއެވެ. އޭގެ ތެރޭގައި ޖިނާއީ ތަހުގީގު ހިންގުމާއި، ވެހިކަލް ޓޯކުރުމާއި، ލައިސަންސް ހިފަހައްޓާކަމަށް ފުލުހުން ބުނެއެވެ.
ނަމަވެސް އަދިވެސް އެންމެ އެކަށީގެންވާ ނަތީޖާ ނުފެނި، އެކްސިޑެންޓުތަކުގެ ސަބަބުން ގަވައިދުން އުޅޭ މީހުން ވެސް ނުރައްކަލަށް ހުށަހެޅޭތީ އެކަމުގެ ކަންބޮޑުވުން ރައްޔިތުން ފާޅުކުރެއެވެ.
ސީޕީ ކަމާ ދާދިފަހުން ހަވާލުވެވަޑައިގެންނެވި ޝުޖާއު "ސަން"އަށް އިއްޔެ ދެއްވި ޚާއްސަ އިންޓަވިއުގައި ވިދާޅުވީ މިހާރު ވިސްނައިލުން އެންމެ މުހިންމީ ޑްރައިވިން ލައިސަންސް ދޫކުރަނީ އެންމެ ރަނގަޅު ނިޒާމުގެ ތެރެއިންތޯ ކަމަށެވެ.
އެއީ، ހިނގައިފައި ހުރި އެކްސިޑެންޓުތަކަށް ބަލައިއިރު ފާހަގަކުރެވޭ އެއް ކަމަކީ އެކްސިޑެންޓުތައް ހިނގަނީ އެންމެ ރަނގަޅަށް ދުއްވަން ނޭނގޭ މީހުންގެ ފަރާތުން ކަމަށް ޝުޖާއު ވިދާޅުވިއެވެ.
މިއަދު ހިނގި އެކްސިޑެންޓްގައި ދެ ގެއްލުން ލިބުނު ދެ ސައިކަލް: މި އެކްސިޑެންޓްގައި ދެ މީހަކަށް ވަނީ އަނިޔާ ވެފައި-- ސަން ފޮޓޯ: ކިޔުންތެރިއެއް
"އަޅުގަނޑަށް ހީވަނީ މިހާރު މި އޮތް ލައިސަންސް ދޭ ނިޒާމު އެބަޖެހޭ ކަންނޭނގެ އަޅުގަނޑުމެން އަނެއްކާ ވެސް ރީވިޒިޓްކޮށްލައި، އިށީނދެ މި ކަން މިއަށްވުރެ ރަނގަޅަށް ކުރެވޭނެ ގޮތަކަށް، ލައިސަންސް ދިނުމުގެ ނިޒާމު ބައްޓަންކުރަން،"
އެގޮތުން، މިހާރު ދޭ ޓެސްޓާއި، ޑްރައިވިން ލައިސަންސަށް ދޭ ތިއަރީ ސުވާލުތަކަކީ އެންމެ އެކަށީގެންވާ ސުވާލުތައްތޯ ބަލައި، މިހާރާ އެއް ފެންވަރަށް އަލުން މުރާޖާކުރަން ޖެހޭކަމަށް ޝުޖާއު ވިދާޅުވިއެވެ.
އަދި ލައިސަންސަކީ އެހާ ފަސޭހައިން ލިބޭ އެއްޗަކަށް ވެފައި އޮންނަ އޮތުން ބަދަލުކުރަންޖެހޭކަމަށް ވެސް ކޮމިޝަނަރު ފާހަގަކުރެއްވިއެވެ.
"މަގު ބޭނުންކުރާ މީހުން ޒިންމާދާރުވާންޖެހޭ"
އޭގެ އިތުރަށް ޝުޖާއު ވިދާޅުވީ، މަގުމަތި ބޭނުންކުރާ ރައްޔިތުން ވެސް މަގު ބޭނުންކުރުމުގައި ޒިންމާދާރުވާން ޖެހޭ ކަމަށެވެ.
"ހަމަ މަގުގެ ކޮންމެ ދިމާއަކުން ހުރަސްކުރުމުގެ ބަދަލުގައި މަގުގެ ހުރަސްކުރަން ކަނޑައަޅައިފައިވާ ސަރަހައްދުތަކުން ހުރަސްކުރުމާއި، އަދި ހުރަސްކުރާއިރު ވެސް ރަނގަޅަށް ބައްލަވައިފައި ހުރަސްކުރުން އެއީ އަޅުގަނޑުމެންނަށް ފަރުދީ ލެވެލްގައި ކުރެވިދާނެ ކަންކަން،" ޝުޖާއު ވިދާޅުވިއެވެ.
އޭނާ ވިދާޅުވީ، ކުރިއަށްހުރި ދުވަސްތަކުގައި ތަހުގީގުތައް އިތުރަށް ހަރުދަނާކޮށް، މަގުތަކަށް ގެންނަންޖެހޭ ބަދަލުތައް ވެސް ގެންނަވާނެ ކަމަށެވެ.
ފުލުހުން އެންމެ ފަހުން އާންމުކުރި ހިސާބުތައް ދައްކާގޮތުން ނިމިދިޔަ އަަހަރުގެ ތިންވަނަ ކުއާޓަރުގައި ދެވަނައަށް އެންމެ ގިނައިން ފުލުހުންނަށް ރިޕޯޓުކޮށްފައިވަނީ ޓްރެފިކް އެކްސިޑެންޓުތަކެވެ. ތިންވަނަ ކުއާޓަރުގައި އެކަނި ވެސް 1116 އެކްސިޑެންޓު ރިޕޯޓުކުރިއެވެ.
އޭގެ ތެރެއިން 606 އެކްސިޑެންޓެއްގެ މައްސަލަ ލޮޖުކޮށް ބަލައިފައިވެއެވެ. އޭގެ ތެރެއިން 549 މައްސަލަ ބަލައި ނިންމިއިރު ދައުވާކުރަން ފޮނުވީ އެންމެ މައްސަލައެއްގައެވެ.