16 Jan 2024, 07:47
މީގެ ހަތަރު އަހަރު ކުރިން ބޮލީވުޑްގެ ބަތަލާ ނެހާ ދޫޕިއާ ގެނެސްދޭން ފެށި ޕޮޑް ކާސްޓް ޝޯވް "ނޯ ފިލްޓަ ނެހާ"ގެ ހަވަނަ ސީޒަން ގެނެސްދޭން ތައްޔާރުވެއްޖެއެވެ.
ފިލްމު އިންޑަސްޓްރީގައި މަސައްކަތްކުރާ ނެހާގެ ގާތް ރަހްމަތްތެރިންގެ އިތުރުން އިންޑިއާގެ މަޝްހޫރު ސެލެބްރިޓީން މެހެމާނުންގެ ގޮތުގައި ބައިވެރިވާ މި ޕޮޑްކާސްޓަކީ ހުދު ނިހާ އަމިއްލައަށް ޕްރޮޑިއުސް ކުރާ ޝޯއެކެވެ.
ފިލްމީ ތަރިން ކަމަށްވާ ކާޖޮލް، ކެޓްރީނާ ކައިފް، ޕަރިނީތީ ޗޯޕްރާ، ޝާހިދު ކަޕޫރު، ރަންވީރު ސިންގް އަދި ވަރުން ދަވަން ފަދަ ތަރިންނަކީ "ނޯ ފިލްޓަ ނެހާ"ގެ ވޭތުވެދިޔަ ސީޒަން ތަކުގައި ބައިވެރިވެފައިވާ ތަރިންނެވެ. ނެހާގެ "ނޯ ފިލްތަ ނެހާ"ގެ ހަ ވަނަ ޕޮޑްކާސްޓުގައި ފުރަތަމަ މެހެމާނުންގެ ގޮތުގައި ބައިވެރިވާނީ އުއްމީދީ ފިލްމީ ތަރިން ކަމަށްވާ ޓައިގާ ޝްރޮފް އަދި އަނަނިޔާ ޕާންޑޭއެވެ.
ފިލްމީ ދާއިރާގެ އިތުރުން އަމިއްލަ ދިރިއުޅުމުގެ ގިނަ ވާހަކަތައް ހިއްސާކުރާ މި ޕޮޑްކާސްޓް މި ފަހަރު ގެނެސްދޭން ނިންމާފައި ވަނީ ވީޑިއޯއާ ވެސް އެކުގައެވެ. މީގެ ކުރީގެ ސީޒަންތައް ގެނެސްދީފައި ވަނީ ހަމައެކަނި އޯޑިއޯ މެދުވެރިކޮށެވެ. ނަމަވެސް އާއްމުންގެ ފަރާތުން ލިބުނު ތަރުހީބަށް ބަލާފައި ވިހާވެސް ގިނަ ފަރާތްތަކަށް މި ޕޮޑްކާސްޓު ބެލުމުގެ ފުރުސަތު ހޯދައިދިނުމުގެ ބޭނުމުގައި ނެހާ ނިންމީ މި ފަހަރުގެ ސީޒަން ވީޑިއޯ މެދުވެރިކޮށް ގެނެސްދިނުމަށެވެ.
ބަތަލާ ނެހާ ދޫޕިއާ ފިލްމީ ތަރި ޝާހިދު ކަޕޫރާ އެކު-- ފޮޓޯ/ އިންޓަނެޓް
ޖިއޯ ޓީވީ މެދުވެރިކޮށް ނޮވެލް ވީޑިއޯ ފޯމެޓަށް ޝޯ ގެނެސްދެވޭތީ އެކަމާ ވަރަށް އުފާވާ ކަމަށް ބަތަލާ ނެހާ ވަނީ ބުނެފައެވެ.
ޖުމްލަ އަށް އެޕިސޯޑު ގެނެސްދޭން ހަމަޖެހިފައިވާ މި ފަހަރުގެ ސީޒަނުން ވެސް ހިންދީ ސިނަމާގެ ވަރަށް ވަރުގަދަ ޝަހުސިއްޔަތުތައް ފެންނާނެކަމުގެ ޔަގީންކަން ބަތަލާ ވަނީ ދީފައެވެ. ޖިއޯ ޓީވީއިން ލައިވް ސްޓްރީމިން މެދުވެރިކޮށް ބަލައިލެވޭ މި ޝޯ ދައްކަން ފަށާނެ ވަކި ދުވަހެއް އަދި އިއުލާނެއް ނުކުރެއެވެ.