16 Jan 2024, 07:39
އިންޑިއާގެ ވެރިރަށް ނިއު ދިއްލީއިން ގޯއާއަށް ދަތުރުކުރި އިންޑިގޯގެ ފްލައިޓެއްގައި ފަސިންޖަރަކު ޕައިލެޓަކަށް އަނިޔާކުރި މައްސަލަ ބޮލީވުޑްގެ އެކްޓަރު ސޯނޫ ސޫދު ކުށްވެރި ކޮށްފިއެވެ.
މި ހާދިސާއާ ގުޅިގެން ބޮލީވުޑްގެ އެކްޓަރު ބުނެފައި ވަނީ، މި ހާދިސާ ހިނގި ދުވަހު ސޯނޫ ސޫދަށް ވެސް އެއާޕޯޓުގައި ތިން ގަޑިއިރު މަޑުކުރަން ޖެހުނު ކަމަށާއި އެފަދަ ވަގުތު ތަކުގައި ކެތްތެރިކަން އިސްކުރުމަކީ އެންމެ ބުއްދިވެރި ގޮތް ކަމަށެވެ.
އެއާލައިންތަކުގެ މުވައްޒަފުންނާ މެދު ބައެއް ފަސިންޖަރުން ވަރަށް އިހާނެތިކޮށް އަމަލުކުރާކަން ފާހަގަކޮށް ސޯނޫ ބުނެފައި ވަނީ އެއާލައިންތަކުގައި މަސައްކަތްކުރާ މުވައްޒަފުންނަކީ ވަރަށް ބުރަކޮށް މަސައްކަތްކުރާ ބަޔަކު ކަމަށާއި އެ މީހުންނަކީ ވެސް އިހުތިރާމު ހައްޤު ބައެއް ކަމުގައެވެ. ޕައިލެޓަށް ފަސިންޖަރަކު އަނިޔާކުރާ މަންޒަރުގެ ވީޑިއޯއެއްގެ ފޮޓޯއެއް ހިއްސާކުރަމުން ސޯނޫ ބުނެފައި ވަނީ އެއާލައިންތަކުން މުވައްޒަފުންނަށް 'ސެލްފް ޑިފެންސް ޓްރެއިނިން' ދިނުމާމެދު ކުންފުނިތަކުން ވަރަށް ފުންކޮށް ވިސްނަންވެއްޖެ ކަމުގައެވެ.
އެކްޓަރު ސޯނޫ ސޫދު އެމްޓީވީއިން ގެނެސްދިން ރޯޑީސް ޝޯވްގެ މަންޒަރެއްގައި-- ފޮޓޯ/ އިންޓަނެޓް
މި ދުވަސްވަރު އިންޑިއާގެ ދިއްލީއަށް ފިނީގެ އަސަރު ކުރަމުންދާ މިންވަރު މަތިވުމާ އެކު ޖައްވު ނުސާފުވުމުގެ މައްސަލަ ވަރަށް ބޮޑަށް ވަނީ ކުރިމަތިވެފައެވެ. އިންޑިއާގެ މީޓިއޮރޮލޮޖިކަލް ސެންޓަރުން ބުނެފައިވާ ގޮތުން މި މަހުގެ 19ވަނަ ދުވަހާ ހަމައަށް ދިއްލީއަށް ގަދަ ވިއްސާރަ ކުރާނެއެވެ.
މޫސުމީ ބަދަލުތަކަކީ އެއްވެސް މީހެއްގެ ކޮންޓްރޯލްގެ ދަށުގައި އޮންނަ ކަމަކަށް ނުވާއިރު ދަތުރު ފަތުރު ކުރުމުގައި އެއްބަޔަކު އަނެއް ބަޔަކަށް އެހީވެ އެއްބާރުލުން ދިނުމަކީ މި ދަނޑިވަޅުގައި ދަތުރުކުރާ މީހުން އެންމެ ބޮޑު އިސްކަމެއް ދޭންވީ ކަންތައް ކަމަށް ސޯނޫ ސޫދު ވަނީ ބުނެފައެވެ.
ފިލްމު "ދަބަންގް2"ގެ އެކްޓަރަކީ އަބަދުވެސް މަސްލަހަތު އިސްކޮށް އެއްބަޔަކު އަނެއްބަޔަކު އެހީތެރިވެ މުޖްތަމައުތެރޭ އެކުވެރިކަން އާލާކުރުމަށް ގޮވާލާ އެކަމަށް މަސައްކަތްކުރާ އެކްޓަރެކެވެ.