16 Jan 2024, 00:37
ގިނަ ވިޔަފާރިތަކަށް ފުރުސަތު ދިނުމުގެ ގޮތުން، އެސްއެމްއީ ހަބުން ކާބޯތަކެތި ވިއްކަން ދޫކުރާ ކިއޮސްކްތަކުގެ ކުލި ކުޑަކޮށް، ޚާއްޞަ ޕްރޮމޯޝަނެއް ފަށައިފިއެވެ.
އެސްއެމްއީ ހަބް މެނޭޖު ކުރާ ބިޒްނަސް ސެންޓާ ކޯޕަރޭޝަން (ބީސީސީ)އިން ބުނީ އެ ޕްރޮމޯޝަންގެ ދަށުން އެސްއެމްއީ ހަބުގެ ފުރަތަމަ ފަންގިފިލާގައި ކާބޯތަކެތި ވިއްކަން މަހު ކުއްޔަށް ދޫކުރާ ސްޓޯލްތަކުގެ ކުލި 6750 ރުފިޔާއަށް ކުޑަ ކުރާނެ ކަމަށެވެ. އަދި، ދުވަހު ކުއްޔަށް ދޫކުރާ ކިއޮސްކުތައް 250 ރުފިޔާއަށް ދޫކުރުމަށް ހަމަޖެހިފައިވާ ކަމަށް ވެސް އެ ކޯޕަރޭޝަނުން ބުންޏެވެ.
އެ ކިއޮސްކުތައް މިހާރު ބީސީސީގެ ވެބްސައިޓް މެދުވެރިކޮށް ބުކް ކުރެވޭނެއެވެ.
ހަމައެއާއެކު، އެސްއެމްއީ ހަބުގެ އަހަރީ ދުވަހާ ދިމާކޮށް އުރީދޫއާއި، ކްރޮސްރޯޑްސްއާ ގުޅިގެން ޚާއްޞަ ޕްރޮމޯޝަނެއް ވެސް މިހާރު އެބަ ކުރިއަށްދެއެވެ.
އެ ކުންފުނިން ބުނީ އެ 'ސްޓޭމްޕް އެންޑް ވިން ޕްރޮމޯޝަން'ގައި ބައިވެރިވެވޭނީ އެސްއެމްއީ ހަބުން ކުރާ ކޮންމެ 50 ރުފިޔާއެއްގެ ވިޔަފާރިއަކަށް ދޫކުރާ ސްޓޭމްޕުގެ 10 ސްޓޭމްޕު ހަމަކުރާ މީހުންނަށް ކަމަށެވެ. މިދިޔަ މަހުގެ 23 ވަނަ ދުވަހު ފެށި މި ޕްރޮމޯޝަން ކުރިއަށް ދާނީ މި މަހުގެ 23 ވަނަ ދުވަހުގެ ނިޔަލަށެވެ.
މި ޕްރޮމޯޝަނުން އެއްވަނައަށްދާ ނަސީބުވެރިއަކަށް އައިފޯން 15އެއް ލިބެއެވެ. ދެވަނައަށް ދާ ނަސީބުވެރިއަކަށް ކްރޮސްރޯޑްސްގެ ސައި ލެގޫންގައި އިތުރު މީހަކާއެކު ދެ ރޭ ހޭދަކުރުމުގެ ފުރުސަތު ލިބެއެވެ. އަދި ތިންވަނައަށް ދާ މީހަކަށް ކްރޮސްރޯޑްސްގެ ދަރްޝަން ރެސްޓޯރެންޓުން އިތުރު މީހަކާއެކު ރޭގަނޑުގެ ކެއުމެއް، ކަލިނަރީ އެކްސްޕީރިއަންސާއެކު ލިބޭނެއެވެ. ހަތަރު ވަނަ އިނާމެއްގެ ގޮތުގައި ކަނޑައަޅާފައިވަނީ ކްރޮސްރޯޑްސްގެ ކަޅުއޮޑި ރެސްޓޯރެންޓުން ދެ މީހެއްގެ ކެއުމެވެ.
އެކި ބާވަތުގެ ދިވެހި އުފެއްދުންތައް އުފައްދާ ފަރާތްތަކަށް އެތަކެތި މާކެޓުކޮށް ވިއްކޭނެ މަގު ފަހި ކޮށްދިނުމައްޓަކައި ބީސީސީން ގާއިމު ކޮށްފައިވާ އެސްއެމްއީ ހަބަކީ ގިނަ އަދަދެއްގެ ފަތުރުވެރިންނާއި ދިވެހިން އާންމުކޮށް ކޮންމެ ދުވަހަކު ވެސް ޚިދުމަތް ހޯދާ ތަނެކެވެ.