16 Jan 2024, 00:32
ރާއްޖޭގެ ފަތުރުވެރިކަން އިޝްތިހާރުކުރާ އެމްއެމްޕީއާރުސީން ޗައިނާއަށް އަމާޒުކޮށްގެން ބާއްވާ އެންމެ ބޮޑު އެއް ވިޔަފާރި ޝޯ ކަމަށްވާ އައިޓީބީ ޗައިނާ 2024ގައި ބައިވެރިވުމަށް ޝައުގުވެރިކަން ފާޅުކުރުމުގެ ފުރުސަތު އެ ކުންފުނިން ހުޅުވާލައިފިއެވެ.
އެމްއެމްޕީއާރުސީން ނެރުނު ބަޔާނެއްގައިވާ ގޮތުން އެ ޝޯ ކުރިއަށްދާނީ އަންނަ މެއި މަހުގެ 27އިން 29އަށް، ޝަންހާއީ ވޯލްޑް އެކްސްޕޯ އެގްޒިބިޝަން އެންޑް ކޮންވެންޝަން ސެންޓަރުގައެވެ. އަދި އެ ޝޯއަށް ޝައުގުވެރިކަން ފާޅުކުރުމަށް ޓޫރިޒަމް އިންޑަސްޓްރީގެ ޕާޓްނަރުންނަށް މިހާރު ސާކިއުލާއެއް ފޮނުވާފައިވާ ކަަމަށް އެ ބަޔާނުގައިވެއެވެ.
އޭގެ މަގުސަދަކީ ޝޯގައި ބަހައްޓާ ސްޓޭންޑްތަކުގެ ޖާގަ ބުކް ކުރުމުގެ ކުރިން އެ އިވެންޓުގައި ބައިވެރިވާން ޝައުގުވެރިވާ ކުންފުނިތަކުގެ ޖުމްލަ އަދަދު ލަފާކުރުން ކަމަށް އެ ކުންފުނިން ބުންޏެވެ.
އެ ހަރަކާތުގައި ބައިވެރިވުމަށް ޝައުގުވެރިވާ، ރާއްޖޭގެ ފަތުރުވެރިކަމުގެ ދާއިރާއަށް ނިސްބަތްވާ ކުންފުނިތަކުން އަންނަ އާދިއްތަ ދުވަހުގެ 15:00ގެ ކުރިންގޫގުލް ފޯމެއްމެދުވެރިކޮށް ޝައުގުވެރިކަން ފާޅުކުރުމަށް އެމްއެމްޕީއާރުސީން ވަނީ އެދިފައެވެ.
އެ ކުންފުނިން ބުނީ، އައިޓީބީ ޗައިނާގައި ބައިވެރިވުމުގެ ސާކިއުލާއެއް ފަހުން، ވަކިން ފޮނުވާނެ ކަމަށެވެ.
އެމްއެމްޕީއާރުސީން ބުނީ އެ ކުންފުނީގެ އަމާޒަކީ އައިޓީބީ ޗައިނާއަށް ޝައުގުވެރިވާ ހުރިހާ ފަރާތްތަކަށް އެ ފެއާގައި ބައިވެރިވުމުގެ ފުރުސަތު ދިނުމާއި ރާއްޖޭގެ ފަތުރުވެރިކަމުގެ ސިނާއަތުގެ ބައިވެރިންނަށް އެ ފަރާތްތަކުގެ ވަކިވަކި އުފެއްދުންތަކާއި ތަޖުރިބާތައް ޕްރޮމޯޓް ކުރުމަށް ޕްލެޓްފޯމެއް ފަހިކޮށްދިނުން ކަމަށެވެ.
ޗައިނާއަކީ ރާއްޖޭގެ ފަތުރުވެރިކަމުގެ ސިނާއަތަށް އެންމެ މުހިންމު އެއް މާކެޓެވެ. އެގޮތުން ކޮވިޑް19ގެ ކުރިން ޗައިނާއަކީ ރާއްޖެއަށް އެންމެ ގިނައިން ފަތުރުވެރިން އަންނަ އެންމެ ބޮޑު މާކެޓެވެ. މިދިޔަ އަހަރު ޗައިނާއިން ރާއްޖެއަށް 172،163 ފަތުރުވެރިން އައިސްފައިވާއިރު މިހާރު އެގައުމުން އަންނަ ފަތުރުވެރިންގެ އަދަދު އަންނަނީ އިތުރުވަމުންނެވެ.