17 Jan 2024, 00:28
އިސްރާއީލުގެ ވެރިރަށް ތެލް އަވީވްގެ އުތުރުން އޮންނަ ރަނައަނައިގައި ފަލަސްތީނުގެ ދެ މީހަކު ދިން ހަމަލާއެއްގައި އެކަކު މަރައިލައި 17 މީހަކު ޒަހަމްކޮށްލައިފިއެވެ.
އެ ހަމަލާދީފައި ވަނީ ދެ ކާރު ބޭނުންކޮށްގެންނެވެ. އެގޮތުން ދެ ކާރު ބާރު ސްޕީޑުގައި ދުއްވައި، މީހުންގެ ގައިގައި ކާރުން ޖެއްސުމުގެ އިތުރުން ބައެއް މީހުންނަށް ވަޅިން ވެސް ހަމަލާދީފައިވެއެވެ.
ހޯމަ ދުވަހު ދިން އެ ހަމަލާއާ ގުޅިގެން ތުހުމަތު ކުރެވޭ ދެ މީހުން ވަނީ ހުޅަނގު އައްސޭރިން ހައްޔަރުކޮށްފައެވެ.
އެ ހާދިސާގައި މަރުވީ، އަނިޔާތަކަށް ފަރުވާ ހޯދަމުން ދިޔަ އުމުރުން ދުވަސްވީ އަންހެނެކެވެ. އެ ހަމަލާގެ ސަބަބުން ޒަހަމްވި ބައެއް މީހުންގެ ހާލު ސީރިއަސްވެ ހޮސްޕިޓަލުގައި ފަރުވާދެމުން އަންނަ ކަމަށް ރިޕޯޓުތައް ބުނެއެވެ. ޒަހަމްވި މީހުންގެ ތެރޭގައި ކުޑަކުދިން ވެސް ހިމެނެއެވެ.
އޮކްޓޫބަރު ހަތް ވަނަ ދުވަހު އިސްރާއީލުގެ ފައުޖުތަކުން ފަލަސްތީނުގެ ޣައްޒާގައި ހަނގުރާމަ ފެށިފަހުން، އިސްރާއީލުން ހިފާފައި އޮންނަ ހުޅަނގު އައްސޭރީގައި ދިރިއުޅޭ ފަލަސްތީނު ރައްޔިތުންނަށްވެސް އިސްރާއިލު އަސްކަރިއްޔާއާއި، ހުޅަނގު އައްސޭރީގައި ވަޒަންވެރިވެގެންއުޅޭ އިސްރާއީލުގެ ރައްޔިތުން ދެމުންދާ ހަމަލާތައް ވަނީ އިތުރުކޮށްފައެވެ. ފާއިތުވި ދުވަސްތަކުގައި ހުޅަނގު އައްސޭރިން ހައްޔަރު ކޮށްފައިވާ މީހުންގެ އަދަދު ވަނީ 5،000އިން މަތިވެފައެވެ.