16 Jan 2024, 09:09
ޔުކްރެއިނަށް އިންސާނީ އެހީގެ ގޮތުގައި މި އަހަރު 4.2 ބިލިއަން ޑޮލަރު ފޯރުކޮށްދިނުމަށް ދަ ޔުނައިޓެޑް ނޭޝަންސް އޮފީސް ފޯ ދަ ކޯޑިނޭޝަން އޮފް ހިއުމަނިޓޭރިއަން އެފެއާޒް (އޯސީއެޗްއޭ)އިން އިލްތިމާސްކޮށްފިއެވެ.
ޔުކްރެއިނަށް އިންސާނީ އެހީ ފޯރުކޮށްދިނުމަށް އޯސީއެޗްއޭއިން އެހީދޭ ޖަމާއަތްތަކަށް ގޮވައިލައިފައިވަނީ ރަޝިޔާ-ޔުކްރެއިން ހަނގުރާމައަށް ދެ އަހަރު ފުރެން ކައިރިވެފައި ވަނިކޮށެވެ.
ހަނގުރާމައިގެ ސަބަބުން ޔުކްރެއިންގެ ގިނަ އަދަދެއްގެ ކުޑަކުދިން އަސާސީ ބޭނުންތަކުން މަހުރޫމުވެފައިވާ ކަމަށް އދ.ގެ އެހީއާ ބެހޭ ވެރިޔާ މާޓިން ގްރިފްތްސް ވިދާޅުވިއެވެ. އަދި، އެއީ ޔުކްރެއިނަށް އިންސާނީ އެހީ ފޯރުކޮށްދިނުމަށް ކުރެވެން ހުރި ހުރިހާ މަސައްކަތެއް ކުރުމަށް މަޖުބޫރުކުރުވާ ކަމެއް ކަމަށް ވެސް އޭނާ ވިދާޅުވިއެވެ.
އޯސީއެޗްއޭއިން ބުނާ ގޮތުން މި އަހަރު އެހީ ބޭނުންވާ 8.5 މިލިއަން މީހުންނަށް 3.1 ބިލިއަން ޑޮލަރު ބޭނުންވެއެވެ. އަދި، ޔުކްރެއިންގައި ތިބި 2.3 މިލިއަން ރެފިއުޖީންނަށް 1.1 ބިލިއަން ޑޮލަރުގެ އެހީ ވެސް އޯސީއެޗްއޭއިން އަންނަނީ ހޯދަމުންނެވެ.
މިދިޔަ އަހަރު އޯސީއެޗްއޭއިން އިންސާނީގެ އެހީގެ ގޮތުގައި ފޯރުކޮށްދިނުމަށް އެދުނު 3.9 ބިލިއަން ޑޮލަރުގެ ތެރެއިން އެހީގެ ގޮތުގައި ލިބިފައިވަނީ އެންމެ އެ އަދަދުގެ އެންމެ 67 އިންސައްތައެވެ.
ރަޝިޔާއިން ޔުކްރެއިނަށް ދޭ ހަމަލާތަކުގެ ސަބަބުން ޔުކްރެއިންގެ އާބާދީގެ 14.6 މިލިއަނަށްވުރެ ގިނަ މީހުން ނުވަތަ އާބާދީގެ 60 އިންސައްތައަށް ވުރެ ގިނަ މީހުންނަށް މި އަހަރު އިންސާނީ އެހީ ބޭނުންވެއެވެ.
ކުރިން 2022 ވަނަ އަހަރުގެ ފެބްރުއަރީ މަހު ފެށި ރަޝިޔާ ޔުކްރެއިން ހަނގުރާމައިގެ ސަބަބުން ޔުކްރެއިންގެ ގާތްގަޑަކަށް 6.3 މިލިއަން މީހުންނަށް ވަނީ އަމިއްލަ ގައުމު ދޫކޮށް ފިލަންދާން މަޖުބޫރުވެފައެވެ. ހަމަލާތަކުގެ ސަބަބުން ގާތްގަނޑަކަށް ހަތަރު މިލިއަން މީހުންގެ ގެދޮރު ދޫކޮށްލަން ވަނީ މަޖުބޫރުވެފައެވެ. އޭގެ ތެރޭގައި އެއް މިލިއަން ކުޑަކުދިން ވެސް ހިމެނެއެވެ.