16 Jan 2024, 10:11
އޮކްޓޫބަރު ހަތް ވަނަ ދުވަހު ޣައްޒާގެ ވެރިކަންކުރާ ހަމާސް ޖަމާއަތުން ރަހީނުކުރި މީހުންގެ ތެރެއިން ތިން މީހަކު ފެންނަ ވީޑިއޯއެއް އެ ޖަމާއަތުން އާންމުކޮށްފިއެވެ.
އެ ވީޑިއޯގައި އިސްރާއީލުގެ ފައުޖުތަކުން ޣައްޒާގައި ހިންގަމުންދާ ލާއިންސާނީ ހަނގުރާމަ ހުއްޓައިލުމަށް، އިސްރާއީލުގެ ސަރުކާރަށް ރަހީނުން ގޮވައިލައެވެ.
ގާތްގަނޑަކަށް 37 ސިކުންތުގެ އެ ވީޑިއޯ ނިމެނީ އެ ތިން މީހުންނަށް ވާނެ ގޮތެއް އެއް ދުވަސް ފަހުން ހާމަކުރާނެ ކަމަށް ބުނެއެވެ.
އަސީރުންގެ ވީޑިޔޯ އާންމު ކުރުމާ އެކު އިސްރާއީލުގެ އަސްކަރިއްޔާއިން ވަނީ ޣައްޒާގައި ހިންގަމުންދާ އުދުވާން އިތުރަށް ވަރުގަދަ ކުރަން ފަށައިފައެވެ.
އިސްރާއީލުން ޣައްޒާއަށް ދެމުންގެންދާ ހަމަލާތަކުގެ ސަބަބުން ބައެއް ރަހީނުންނާ މުވާސަލާތު ނުކުރެވޭ ކަމަށް ހަމާސުން މީގެ ކުރިން ވަނީ ބުނެފައެވެ. އަދި އެ ގޮތަށް ވީނުވީއެއް ނޭގި އޮތް ހާލަތުގައި އިސްރާއީލުގެ ހަމަލާތަކުން ބައެއް މީހުން މަރުވެފައި ތިބެދާނެކަމަށް ވެސް ހަމާސުން ވަނީ ބުނެފައެވެ.
އޮކްޓޫބަރު 7 ވަނަ ދުވަހު ހަމާސުން ހިންގި އަސްކަރީ ހަރަކާތުގައި އިސްރާއީލުގެ 240 މީހުން ރަހީނު ކުރިއެވެ. ނަމަވެސް، އިސްރާއީލާއެކު ހެދި އެއްބަސްވުމެއްގެ ދަށުން އޭގެ ތެރެއިން 80 އަށްވުރެ ގިނަ އަސީރުން ވަނީ މިނިވަން ކޮށްފައެވެ. އަދި އިސްރާއީލުގެ އަމިއްލަ ހަމަލާތަކުގައި އަސީރުންގެ ތެރެއިން 25 މީހުން މަރުވެފައިވާ ކަމުގައި ހަމާސުން ބުނެއެވެ. އެ ޖަމާއަތުގެ ބެލުމުގެ ދަށުގައި މިހާރު ތިބި ކަމަށް ބެލެވެނީ 132 އަސީރުންނެވެ.
އަސީރުން މިނިވަން ކުރުމަށް އަނެއްކާވެސް އިތުރު އެއްބަސްވުމެއް ގާއިމުކުރުމަށް ރަހީނުންގެ އާއިލާތަކުން އަންނަނީ އިސްރާއީލުގެ ރައީސް ބެންޖަމިން ނަތަންޔާހޫއަށް ގޮވައިލަމުންނެވެ.
ނަމަވެސް ނަޞްރު ލިބެންދެން ހަނގުރާމަ ހުއްޓައިނުލައި ކުރިއަށް ގެންދަން ނަތަންޔާހޫ ވަނީ ވައުދުވެވަޑައިގެންފައެވެ.
އޮކްޓޫބަރު ހަތް ވަނަ ދުވަހުން ފެށިގެން އިސްރާއީލުގެ ފައުޖުތަކުން ޣައްޒާއަށް ދެމުންގެންދާ އުދުވާނީ ހަމަލާތަކުގައި މިހާތަނަށް 24،000 އަށްވުރެ ގިނަ ފަލަސްތީނު މީހުން ވަނީ ޝަހީދުކޮށްލައިފައެވެ.
އޭގެތެރޭގައި ގިނައީ ކުޑަކުދިންނާއި އަންހެނުންނެވެ. ހަމަލާތަކުގައި 60،000 އަށްވުރެ ގިނަ މީހުން ވަނީ ޒަޚަމްކޮށްލައިފައެވެ.