16 Jan 2024, 00:49
އެންބީއޭ ބާސްކެޓް ބޯޅަ މުބާރާތުގައި މިނެސޯޓާ ޓިމްބާވުލްވްސް އާއި ލޮސް އެންޖަލިސް ކްލިޕާސް ބައްދަލުކުރި މެޗު ޓިމްބާވުލްވްސް ކާމިޔާބު ކޮށްފިއެވެ.
މިނެއަޕޮލިސްގެ ޓާގެޓް ސެންޓާގައި ކުޅުނު މިމެޗު ވުލްވްސް ކާމިޔާބު ކޮށްފައިވަނީ 109 ޕޮއިންޓް 105 ޕޮއިންޓުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ވުލްވްސްގެ އެންތަނީ އެޑްވާޑްސްވަނީ 33 ޕޮއިންޓް ހޯދައިދީ ނުވަ ރީބައުންޑް ނަގައިދީ ހަ އެސިސްޓް ދީފައެވެ. އަދި ކްލިޕާސްއަށް އެންމެ ރަނގަޅު ކުޅުމެއް ދެއްކީ 26 ޕޮއިންޓް ހޯދައިދީ ނުވަ ރީބައުންޑް ނަގައިދީ ހަތަރު އެސިސްޓް ދިން ކައުހީ ލެއޮނާޑްއެވެ.
މިމުބާރާތުގައި މިލްވައުކީ ބަކްސް އާއި ސެކްރެމެންޓޯ ކިންގްސް ބައްދަލުކުރި މެޗު އޯވާ ޓައިމްއަށް ގޮސް 143 ޕޮއިންޓް 142 ޕޮއިންޓުގެ ކުޑަ ތަފާތަކުން ކާމިޔާބުކުރީ ބަކްސްއެވެ. މިމެޗުގެ ހަތަރު ކުރާޓާ ނިމުނު އިރު ދެޓީމް އޮތީ 128 ޕޮއިންޓުން އެއްވަރު ވެފައެވެ. އަދި އިތުރު ވަގުތުގައި ބަކްސް މިމެޗުން މޮޅުވި ބޯޅަ ޑާމިއަން ލިލާޑް ވައްޓާލީ މެޗު ނިމުން ބަޒާ އާއެކުކަހަލަ ގޮތަކާއެކުއެވެ.
މިމެޗުގައި ބަކްސްގެ ޖިއާނިސް އެންޓެޓޮކޮއުމްޕޯވަނީ 27 ޕޮއިންޓް ހޯދައިދީ 10 ރީބައުންޑް ނަގައިދީ 10 އެސިސްޓްކޮށް ޓްރިޕްލް ޑަބަލްއެއް ހަދާފައެވެ. މިމެޗުގައި ކިންގްސްއަށް އެންމެ ރަނގަޅު ކުޅުމެއް ދެއްކީ 21 ޕޮއިންޓް ހޯދައިދީ 13 ރީބައުންޑް ނަގައިދީ 15 އެސިސްޓް ދީ ޓްރިޕްލް ޑަބަލް ހެދި ޑޮމަންޓާސް ސަބޮނިސްއެވެ.
މީގެއިތުރުން އެންމެ ފަހުގެ ޗެމްޕިއަން ޑެންވާ ނަގެޓްސް އާއި އިންޑިއާނާ ޕޭސާސް ބައްދަލުކުރިމެޗު 117 ޕޮއިންޓް 109 ޕޮއިންޓުން ކާމިޔާބު ކުރީ ނަގެޓްސްއެވެ. މިމެޗުގައި ނަގެޓްސްގެ ނިކޮލާ ޔޮކިޗްވަނީ 25 ޕޮއިންޓް ހޯދައިދީ 12 ރީބައުންޑް ނަގައިދީ ނުވަ އެސިސްޓް ކޮށްފައެވެ. އަދި ޕޭސާސްއަށް އެންމެ ރަނގަޅު ކުޅުމެއް ދެއްކީ 18 ޕޮއިންޓް ހޯދައިދީ 10 ރީބައުންޑް ނަގައިދީ ހަ އެސިސްޓް ދިން ބްރޫސް ބްރައުންއެވެ.
މިމުބާރާތުގައި ކުޅުނު އެހެން މެޗުތަކަށް ބަލައިއިރު މައޭމީ ހީޓް އާއި ޗާލޮޓް ހޯނެޓްސް ބައްދަލުކުރިމެޗު 104 ޕޮއިންޓް 87 ޕޮއިންޓުން ހީޓް ކާމިޔާބު ކޮށްފައިވާއިރު ފީނިކްސް ސަންސް އާއި ޕޯޓްލަންޑް ޓްރެއިލް ބްލޭޒާޒް ބައްދަލުކުރި މެޗު 127 ޕޮއިންޓް 116 ޕޮއިންޓުން ކާމިޔާބު ކޮށްފައިވަނީ ސަންސް އެވެ.