16 Jan 2024, 00:45
އޮސްޓްރޭލިއަން އޯޕަން ޓެނިސް މުބާރާތުގެ ދެވަނަ ބުރުން މުބާރާތުގައި ތިންވަނައަށް ސީޑް ކުރެވިފައިވާ ފިރިހެން ކުޅުންތެރިޔާ ރަޝިއާގެ ޑަނީލް މެޑްވެޑޭވް ޖާގަހޯދައިފިއެވެ.
މިމުބާރާތުގެ ދެވަނަ ބުރުން މެޑްވެޑޭވްއަށް ޖާގަ ލިބުނީ ފުރަތަމަ ބުރުގައި ކޮލިފައިން ކުޅެގެން މިމުބާރާތުން ޖާގަހޯދި ފަރަންސޭސިވިލާތުގެ ޓެރެންސް އެޓްމަންއާ ބައްދަލުކުރި މެޗުގެ ހަތަރު ވަނަ ސެޓު ފެއްޓި ތަނާ އެޓްމަން އަކުނި ވަޔަށް ދަމައިގަނެ އިތުރަށް ކުޅެވޭވަރު ނުވެގެން މެޗު ހުއްޓާލަން ޖެހުމުންނެވެ.
އެ މެޗު ހުއްޓާލިއިރު މެޑްވެޑޭވް އޮތީ ދެސެޓު އެއްސެޓުން ކުރީގައެވެ. އަދި ހަތަރު ވަނަ ސެޓުގައިވެސް އޭނާ އުޅުނީ އެއް ގޭމުން ކުރީގައެވެ. ނަމަވެސް މިމެޗުގެ ފެށުން ދިޔައީ މެޑްވެޑޭވްއަށް އެހާ ރަނގަޅަކަށް ނޫނެވެ. މިގޮތުން އެޓްމަންއިން ފުރަތަމަ ސެޓު ފަހެއް ހަތަކުން ކާމިޔާބުކޮށް މެޑްވެޑޭވް ސިއްސުވާލާފައެވެ. ނަމަވެސް ޖެހިގެން އައި ދެވަނަ ސެޓު މެޑްވެޑޭވްވަނީ ފަސޭހަ ކަމާއެކު ހައެއް ދެއަކުން ކާމިޔާބު ކޮށްފައެވެ. އަދި ތިންވަނަ ސެޓު މެޑްވެޑޭވް ކާމިޔާބުކުރީ ހައެއް ހަތަރަކުންނެވެ.
އެޓްމަންއަށް މައްސަލަ ދިމާވާން ފެށީ ތިންވަނަ ސެޓުގެ ތެރޭގައެވެ. ނަމަވެސް ހަތަރު ވަނަ ސެޓުގެ ފުރަތަމަ ގޭމްވެސް މެޑްވެޑޭވް ގެންދިއުމާއެކު އޭނާއަށް އިތުރަށް ކުރިއަށް ނުގެންދެވޭނެކަން އެނގުމުން މެޗު ހުއްޓާލީއެވެ.
މެޗަށްފަހު ވާހަކަ ދައްކަމުން މެޑްވެޑޭވް ހާމަކުރިގޮތުގައި އޭނާވެސް މީގެކުރިން އެފަދަ ހާލަތުގައި ކުޅެފައިވާނެކަމަށާއި އެޓްމަން މިމެޗުގައި އެހާލުގައިވެސް އެދެއްކި ކުޅުމަށް ބަލާއިރު އޭނާއަކީ މުސްތަގްބަލްގައި ރަނގަޅު ހިސާބަކަށް ދެވޭނެ ފެންވަރު ހުރި ކުޅުންތެރިއެއް ކަމަށް މެޑެވެޑޭވް ބުންޏެވެ.
އެ މުބާރާތުގެ ދެވަނަ ބުރުންވަނީ މުބާރާތުގައި ހަތް ވަނައަށް ސީޑް ކުރެވިފައިވާ ގްރީސްގެ ސްޓެފަނޯސް ސިޓްސިޕާސްވެސް ޖާގަހޯދައިފައެވެ. އޭނާ ދެވަނަ ބުރުން ޖާގަ ހޯދައިފާވަނީ ބެލްޖިއަމްގެ ޒީޒޫ ބާގްސްއާ ބައްދަލުކުރި މެޗު ތިން ސެޓު އެއް ސެޓުން ކާމިޔާބު ކޮށްގެންނެވެ. މިމެޗުގެ ފުރަތަމަ ސެޓު ބާގްސް ފަހެއް ހަތަކުން ކާމިޔާބު ކޮށްފައިވަނިކޮށް ޖެހިގެން އައި ތިން ސެޓު ސިޓްސިޕާސް ކާމިޔާބު ކޮށްފައިވަނީ ހައެއް އެކެއް، ހައެއް އެކެއް އަދި ހައެއް ތިނަކުންނެވެ.
މިމުބާރާތުގެ އަންހެން ބަޔަށް ބަލައިލާއިރު ޖަޕާންގެ ނައޯމީ އޮސާކާ ވަނީ މުބާރާތުގައި 16 ވަނައަށް ސީޑް ކުރެވިފައިވާ އަންހެން ކުޅުންތެރިޔާ ފަރަންސޭސިވިލާތުގެ ކެރޮލީން ގާސިއާ އަތުން ސީދާ ދެސެޓުން ބަލިވެފައެވެ. މިއީ މިދިޔަ އަހަރު ވިހެއުމަށްފަހު ކުޅުމާއި ދުރުގައި ހުރުމަށްފަހު އެނބުރި އައި ނައޯމީ ކުޅުނު ފުރަތަަމަ ގްރޭން ސްލޭމް މުބާރާތެވެ.
މިމެޗުގެ ސެޓުތައް ކެރޮލީން ކާމިޔާބު ކޮށްފައިވަނީ ހައެއް ހަތަރެއް އަދި ދެވަނަ ސެޓު ޓައި ބްރޭކަކަށް ގޮސް ހަތެއް ދެއަކުންނެވެ. އެންމެ ފަހުގެ ޔޫއެސް އޯޕަން ކާމިޔާބު ކުރި ކޯކޯ ގައުފް ވަނީ ފުރަތަމަ ބުރުގައި ސްލޮވާކިއާގެ އަނާ ކެރޮލިނާ ޝްމެއިޑްލޯވާއާ ބައްދަލުކުރި މެޗު ހައެއް ތިނެއް އަދި ހައެއް ސުމަކުން ކާމިޔާބުކޮށް މިމުބާރާތުގެ ދެވަނަ ބުރުން ޖާގަހޯދައިފައެވެ.