16 Jan 2024, 19:26
ދުނިޔޭގައި މިހާތަނަށް އެންމެ ގިނަބަޔަކު ހައިރާންކޮށްލި އަދި އެންމެ ގިނަބަޔަކު ބޭނުންކުރާ އެއް އެޕްލިކޭޝަން ކަމަށްވާ އޯޕަންއޭއައިގެ ޗެޓްޖީޕީޓީ ޗެޓްބޮޓް އުފެއްދި އެކުންފުނީގެ ސީއީއޯ ސޭމް އޮލްޓްމަން އެންމެ ގިނައިން ބޭނުންކުރާ މޯބައިލް އެޕަކީ ޗެޓްޖީޕީޓީ ނޫން ކަމަށް ބުނެފިއެވެ.
އޯޕަންއޭއައިގެ ޗެޓްޖީޕީޓީގެ މޮބައިލް އެޕް 2022 ވަނަ އަހަރުގެ ނޮވެމްބަރު މަހު ތައާރަފުކުރި ފަހުން މިހާތަނަށް އެ އެޕް ދުނިޔޭގެ އެކި ކަންކޮޅުތަކުގައި 110 މިލިއަނަށް ވުރެ ގިނަ ފަހަރު ޑައުންލޯޑްކޮށްފައިވެއެވެ.
އާޓިފިޝަލް އިންޓެލިޖެންސް ޗެޓްބޮޓަކީ ކޮންމެ ދުވަހަކު ވެސް އެތައް މިލިއަން ބަޔަކަށް ކޮންމެހެން ބޭނުންތެރި ޗެޓްބޮޓަކަށް ވެފައިވާއިރު، އެއީ އޮލްޓްމަން އެންމެ ގިނައިން ބޭނުންކުރި އެޕް ނޫން ކަމަށް އޭނާ ބުނުމުން ގިނަބަޔަކު ވަނީ އެ އެޕްލިކޭޝަނާ މެދު ސުވާލު އުފައްދާފައެވެ.
ބިލް ގޭޓްސްގެ "ވީކްލީ ޕޮޑްކާސްޓް އަންކޮންފިއުޒް"ގެ އެންމެ ފަހުގެ އެޕިސޯޑުގައި، އޮލްޓްމަން އެންމެ ގިނައިން ބޭނުންކުރަނީ ކޮން މޮބައިލް އެޕްލިކޭޝަނެއްތޯ ސުވާލު ކުރުމުން ލިބުނު ޖަވާބަކީ ހައިރާންކުރުވަނިވި ޖަވާބެކެވެ.
އޭނާބުނީ އެންމެގިނައިން ބޭނުންކުރެވެނީ ޗެޓްޖީޕީޓީ އޭ ބުނެވޭނެނަމައޭ ހިތަށް އެރި ނަމަވެސް ހަގީގަތުގައި އެންމެ އާންމުކޮށް ބޭނުންކުރަނީ "ސްލެކް" އެޕްލިކޭޝަން ކަމަށެވެ. އަދި އައިމެސެޖޭ ބުނަން ވެސް ހިތަށްއެރި ކަމަށާއި، އެކަމަކު އީމެއިލްއަށްވުރެ ވެސް ގިނައިން އޭނާ ބޭނުންކުރަނީ ސްލެކް ކަމަށް ތަކުރާރުކޮށް އޭނާވަނީ ބުނެފައެވެ.
މައިކްރޯސޮފްޓްގެ ބާނީ ބިލް ގޭޓްސް ބުނީ އޭނާ އެންމެ ގިނައިން ބޭނުންކުރާ އެޕްލިކޭޝަނަކީ މައިކްރޮސޮފްޓް އައުޓްލުކް ކަމަށެވެ.
"އަހަންނަކީ މުސްކުޅި ސްޓައިލްގެ އީމެއިލް މީހެއް، ނުވަތަ ބްރައުޒާއެއް،" ގޭޓްސް ބުންޏެވެ.
އޮލްޓްމަން ބުނީ އޭނާ މައިގަނޑު ގޮތެއްގައި ސްލެކް ބޭނުންކުރަނީ، މިހާރު ގާތްގަނޑަކަށް 500 އެއްހާ މުވައްޒަފުން މަސައްކަތް ކުރާ އޯޕަންއޭއައިގެ މަސައްކަތް ކޯޑިނޭޓް ކުރުމަށް ކަމަށެވެ.
ޗެޓްޖީޕީޓީގެ މަގުބޫލުކަން އިތުރުވި ފަހުން، ގާތްގަނޑަކަށް ކޮންމެ ބޮޑު ޓެކް ކުންފުންޏަކުން ވެސް ވަނީ ވާދަވެރި އޭއައި ޗެޓްބޮޓާއި އެހެނިހެން ޖެނެރޭޓިވް އޭއައި އެޕްލިކޭޝަންތައް އުފެއްދުމުގެ މަސައްކަތް ފަށައިފައެވެ.
އޯޕަންއޭއައިއަކީ މީގެ ގާތްގަނޑަކަށް އަށް އަހަރު ކުރިން އޮލްޓްމަން އާއި އެލޮން މަސްކް އެންމެ ފުރަތަމަ އުފެއްދި ރިސާޗް ލެބެކެވެ.
މިދިޔަ ޑިސެމްބަރު މަހު "ދަ އިންފޮމޭޝަން" ނޫހުން ރިޕޯޓުކޮށްފައިވާ ގޮތުގައި މިދިޔަ އަހަރު އޯޕަންއޭއައިގެ އަހަރީ އާމްދަނީ ވަނީ 1.6 ބިލިއަން ޑޮލަރަށް ވުރެ މައްޗަށް އަރާފައެވެ.
އޯޕަންއޭއައިގެ ސީއީއޯގެ މަގާމު 2019 ވަނަ އަހަރު އަދާކުރުމުގެ ކުރިން އޮލްޓްމަން ވަނީ ސްޓާޓްއަޕް އިންކިއުބޭޓާ ވައި ކޮމްބިނޭޓަރުގެ ރައީސްކަން ފަސް އަހަރު ވަންދެންކޮށް، ސްޓާޓްއަޕް ފައުންޑަރުންނަށް އެ މީހުންގެ ކުންފުނިތައް ކުރިއެރުވޭނެ ގޮތަށް ފަންޑުކޮށް ލަފާވެސް ދީފައެވެ.